Edifisionan Antiguo Ta Ekshibí Dios Su Nòmber

DI UN ESKRITOR DI SPIÈRTA! NA SLOVENIA

Atraves di siglonan, hende a konstruí misa i monasterio riba kabesnan di seru rònt Europa. E edifisionan antiguo aki su arkitektura ta varia for di e estilo romano di Edat Medio—ku nan muraya- i bognan típikamente diki i kurvá—te na e estilo baròk super elaborá i dramátiko di siglonan despues. Un kos interesante ta ku den hopi di e edifisionan aki bo por haña e Tetragramaton, e kuater lèternan hebreo ku ta spèl Dios su nòmber personal.

Por ehèmpel, tuma e monasterio di Stična, un di e monasterionan mas bieu di e órden sistersiense, situá na Slovenia. Nan a konstruyé na aña 1135, un 40 aña so despues ku nan a funda e órden di sùr ku frater sistersiense na Fransia. Ounke nan a renobá e monasterio vários biaha, el a keda ku su estilo original romano, pero awor ku adornonan baròk. Paden e ta dòrná ku vários kuadro i estatua. Un altar den banda ta dekorá ku lèternan grandi di oro di e Tetragramaton ku un krans di plata rònt di dje.

E stat di Slovenj Gradec ta ser menshoná pa promé bes den registronan skirbí di siglo 10. Nan a traha un misa di arkitektura estilo gótiko ku un hospital pegá na dje na aña 1419. Parti paden tin un kuadro pintá riba henter un banda di muraya. E ta data di siglo 15 i ta presentá 27 esena bíbliko. E ta kuminsá ku e resurekshon di Lázaro i ta terminá ku Pentekòste. Na un otro sitio den e mesun edifisio, bo ta haña e nòmber di Dios skirbí na lèternan hebreo pretu riba un fondo di oro.

Den e region nortwèst di e pais tin e stat di Radovljica. Den e añanan di 1400, e pueblito tabata rondoná pa muraya i un kanal di awa, i a konsistí di un kastel, un misa i vários otro edifisio. Riba un di e altarnan di e misa tin un plakat di oro ku ta kontené e Tetragramaton.

Serka di e pueblito di Podčetrtek tin un monasterio antiguo ku nan a konstruí den siglo 17. Paden, un opservadó atento lo deskubrí un pintura riba muraya dòrná ku e nòmber divino.

Den hopi otro edifisio bieu na Slovenia bo por mira e Tetragramaton. Pues, segun ku turistanan ta atmirá e artesania i talento artístiko di tempu antiguo, nan por siña ku habitantenan di ántes tabata konosí ku e nòmber di Dios.

[Plachi na página 31]

Altar den banda den e monasterio Stična

[Plachi na página 31]

Paden di misa Sveti Duh na Slovenj Gradec

[Rekonosementu]

Slovenj Gradec-Cerkev Sv. Duha, Slovenija