For di Nos Lektornan

Norma i Balor Mi a keda sorprendí ora mi a lesa e deklarashon den e promé paragraf di e segundo artíkulo di e seri “Kiko A Pasa ku Norma i Balor?” (8 di yüni 2003) El a bisa: “Entre e regalonan di mas grandi ku mayornan por duna nan yunan ta amor inkondishonal, i un sèt di norma i balor ku e mayornan . . . mes ta kumpli kuné.” Ora yunan i mayornan ta aktua komo si fuera nan tin derecho di risibí amor di otro, norma i balor semper ta bai atras.

K. B., Merka

“Spièrta” ta kontestá: A usa e frase “amor inkondishonal” pa indiká ku mayornan no mester laga e yunan sinti ku e mayornan su amor pa nan ta algu frágil i instabil—i ku nan lo stòp di stima e mucha un ora pa otro pasobra el a kometé un fayo òf ku e mucha mester hasi tur kos perfekto pa e meresé e amor di su mayornan.—Efesionan 6:4; Kolosensenan 3:21.

Mi ta haña ku e último artíkulo den e seri aki ta masha bon mes skirbí. E informashon ta hopi simpel, lógiko i animante. E plachi ta bunita. Danki pa e artíkulonan ei, nan ta un konsuelo pa nos.

M. P., Merka

Matemátika Mi a disfrutá ora mi a lesa e artíkulo “Matemátika Ta Útil pa Tur Hende.” (8 di yüni 2003) Sifra semper a fasiná mi. Manera boso a deklará, Yehova ta e Gran Matemátiko i, sin duda, nos tur lo siña mas tokante e lógika di sifra den e mundu nobo. Masha danki pa e informashon hopi útil aki.

G. C., Gran Bretaña

E artíkulo aki a ègt yuda mi. Na skol, wiskunde ta e vak ku mas mi ta odia. Maske mi ta skucha den klas i hasi anotashon, tòg mi no por komprond’é. Pero despues ku mi a lesa e artíkulo aki mi ta sinti ku mi por domin’é. Mi ta masha gradisidu ku boso a publiká e artíkulo aki. Mi tin 13 aña.

Y. I., Hapon

Ta pa mi mes e artíkulo aki tabata! Mi tin 15 aña i mi no ta bon den wiskunde. Ora mi ta wak e sòmnan di wiskunde mi ta bisa mi mes: ‘E kos aki no por yuda mi ku nada ora mi bira grandi, pues no ta bal la pena pa siñ’é.’ Sin embargo, debí na e artíkulo aki, mi ta komprondé ku wiskunde ta útil den hopi manera. P’esei, mi a disidí awor pa traha mas duru i no entregá. Por fabor, sigui publiká artíkulonan manera esaki!

M. N., Hapon

Sentidonan Danki pa e seri “Bo Ta Apresiá e Sentidonan Asombroso di Bida?” (8 di mart 2003) Nos sentidonan di bèrdat ta yuda nos apresiá bida i nos medio ambiente. Artíkulonan manera esakinan ta fortalesé nos amor pa Dios. Danki pa publiká nan.

J. N., Burundi

Materialismo Mi kier a gradisí boso pa e artíkulo “E Punto di Bista Bíbliko: Kiko Ta Hasi Hende Materialista?” (8 di aprel 2003) Ta sierto ku awendia tin hopi hende ku ta opseshoná ku e idea di bira riku i, desafortunadamente, e problema aki por afektá kristiannan tambe. E artíkulo aki a yuda mi komprondé kiko ta hasi hende materialista, i kon pa evitá esei. Awor lo mi hasi tur loke ta posibel pa konsentrá riba kosnan spiritual i no riba kosnan material. Hopi danki ku boso a publiká un artíkulo asina instruktivo!

Z. K., Rusia