Kon Bo Por Konosé Dios na Su Nòmber

UN KOLUMNISTA di korant a risibí e siguiente karta for di un lektor: “Henter mi bida mi a lucha ku e pregunta aki, i mi ta spera ku bo por duna mi un kontesta. Kiko ta Dios su nòmber? Hudiunan ta bisa ku su berdadero nòmber a bai pèrdí den transkurso di siglonan. Kristiannan ta yam’é Hesus. Mòslemnan ta yam’é Alah. . . . Pues, ta kon yam’é?” E korant a publiká e pregunta huntu ku e kontesta aki: “Segun siñansanan hebreo di antiguo, Dios ta todopoderoso, pues no por limit’é na un solo nòmber. Sin embargo, mi ta sigurá bo ku lo e reakshoná (sea ku e ta maskulino òf femenino) riba kualke nòmber ku respetuosamente bo yam’é.”

 Tal aktitut superfisial pa ku e nòmber di Dios no ta algu raro awe. Ounke hopi hende tin un inklinashon religioso i ta kere den Beibel, tòg nan no ta pensa mashá riba e kuestion di e nòmber di Dios. Pero kiko Dios ta pensa di esei? Esaki ta un asuntu asina insignifikante p’e?

E No Ta un Asuntu Insignifikante

Konsiderá e echo ku Beibel ta menshoná Dios su nòmber personal, Yehova, míles di biaha. Den e Tradukshon di Mundu Nobo di e Santu Skritura, e nòmber divino ta aparesé 7.210 biaha! * Ta Dios mes a inspirá eskritornan di Beibel pa usa su nòmber asina hopi. Un di e eskritornan aki, e salmista Asaf, a skirbi: “Abo so, kende su nòmber ta [“Yehova,” NW], ta e Haltísimo riba henter tera.” (Salmo 83:18) David tambe a skirbi den un salmo: “Ma nos ta konfia den e nòmber di [Yehova], nos Dios.”—Salmo 20:7.

Beibel ta mustra ku Yehova Dios ta saminá nos kurason pa determiná kiko nos ta pensa di su nòmber. E salmista a bisa: “Si nos a lubidá e nòmber di nos Dios, . . . Dios lo no a deskubrí esaki? Pasobra e konosé e sekretonan di kurason.” (Salmo 44:20, 21) Profeta Isaias a skirbi: “Duna gradisimentu na [Yehova], invoká su nòmber. Hasi su echonan konosí entre e pueblonan; hasi nan kòrda ku su nòmber ta halsá.”—Isaias 12:4.

 Dios mes a bisa: “Nan lo sa ku mi nòmber ta [Yehova].” (Jeremias 16:21) Na un otro okashon el a deklará: “Lo mi santifiká mi nòmber grandi ku a wòrdu profaná meimei di e nashonnan . . . E ora ei e nashonnan lo sa ku ami ta [Yehova].” (Ezekiel 36:23) Algun di e deklarashonnan aki ta señalá na un tempu ora ku Yehova lo aktua ku rabia kontra esnan ku a mustra falta di rèspèt pa su nòmber. E kuestion di su nòmber personal no ta un asuntu insignifikante pa Dios.

Yehova Dios No Ta Leu di Bo

Kon bo por siña konosé Dios na su nòmber? Kiko ke men konosé Dios na su nòmber? Beibel ta kontestá: “Esnan ku konosé bo nòmber lo pone nan konfiansa den bo.” (Salmo 9:10) Pues ta bisto ku konosé Dios na su nòmber ta enserá mas ku djis sa kon su nòmber ta. Bo tin ku konfi’é. Esei ta nifiká ku bo tin ku haña sa ki klase di Dios e ta i siña tokante su kualidatnan i su manera di pensa. Esaki lo motivá bo pa konfia den dje.

Ta solamente dor di lesa i studia Beibel kuidadosamente bo por siña komprondé ki klase di Dios Yehova ta. E ta primintí ku lo e protehá hende ku ta demostrá kariño p’e i pa su nòmber. Dios ta bisa di e persona ku hasi esei: “Pasobra el a stima mi, p’esei lo mi libr’é; lo mi proteh’é, pasobra e konosé mi nòmber. E lo sklama na mi, i ami lo kontest’é; lo mi ta kuné den angustia; lo mi reskat’é i onr’é. Ku bida largu lo mi satisfas’é, i lag’é mira mi salbashon.”—Salmo 91:14-16.

Ki un relashon maravioso Yehova Dios tin ku esnan ku konos’é na su nòmber! Abo tambe por tin un relashon asina kuné. Den bo orashonnan sinsero, nunka vasilá pa yam’é na su nòmber. Lo e kontestá bo, pasobra manera Beibel ta bisa, “e no ta leu di kada un di nos.”—Echonan 17:27.

[Nota]

[Kuadro/Plachi na página 11]

Dios Konosé Bo na Bo Nòmber

Dios a bisa Moisés: “Mi a konosé bo pa nòmber.” (Eksodo 33:12) E relato bon konosí di e palu na kandela ta konfirmá esaki. Beibel ta bisa ku Dios “a yam’é for di meimei di e mata i a bisa: ‘Moisés, Moisés!’” (Eksodo 3:4) Esaki ta djis un ehèmpel di e vários okashonnan ku Dios a papia ku hende usando nan nòmber personal. Klaramente, e Kreadó di universo ta interesá den nos individualmente.

Beibel ta bisa ku Dios konosé kada un di e míles di miónes di streanan na nan nòmber. (Isaias 40:26) Kuantu mas lo e mester ta interesá den hende ku ta ador’é! Apòstel Pablo a skirbi ku Yehova “konosé esnan ku ta di dje.” (2 Timoteo 2:19) Esaki ta indiká mas ku simplemente kòrda nan nòmber for di kabes. Dios konosé su adoradónan íntimamente. Nos na nos turno lo mester konosé Dios na su nòmber i buska pa konosé su kualidatnan íntimamente.

E último buki di Beibel ta deskribí un buki simbóliko den kua Dios ta skirbi nòmber di tur ku a ador’é den transkurso di historia. E buki aki ta wòrdu yamá “e buki di bida” pasobra Yehova Dios lo duna bida eterno na tur esnan ku nan nòmber ta skirbí den dje. (Revelashon 17:8) Esaki ta un bunita speransa pa esnan ku konosé Dios na su nòmber.

[Kuadro/Plachi na página 12]

Nan A Proklamá Dios Su Nòmber

● E kantika di Moisés djis promé ku Israel a drenta e Tera Primintí: “Mi ta proklamá e nòmber di [Yehova].”—Deuteronomio 32:3.

● E palabranan di David na e gigante Goliat: “Ami ta bin riba bo den e nòmber di [Yehova] di ehérsitonan.”—1 Samuel 17:45.

● E palabranan di Jòb despues ku el a pèrdè tur su pertinensianan i tur su yunan a muri repentinamente: “Bendishoná sea e nòmber di [Yehova].”—Jòb 1:21.

● Apòstel Pedro sitando e Skritura Hebreo den un diskurso: “Ken ku invoká e nòmber di [Yehova] lo ta salbá.”—Echonan 2:21.

● Profeta Isaias: “Duna gradisimentu na [Yehova], invoká su nòmber. . . . Hasi nan kòrda ku su nòmber ta halsá.”—Isaias 12:4.

● Hesukristu siñando su disipelnan resa: “Pues, hasi orashon anto asin’aki: ‘Nos Tata ku ta den shelu, bo nòmber sea santifiká.’”—Mateo 6:9, 10.

● Hesukristu den orashon na Dios: “Mi a manifestá bo nòmber.”—Juan 17:6.

● Dios papiando ku su pueblo: “Ami ta [Yehova], esei ta mi nòmber; lo mi no duna mi gloria na un otro.”—Isaias 42:8.