Opservando Mundu

Kriminalnan ku “Kabei Blanku”

“A establesé e promé sekshon di prizon na Gran Bretaña spesialmente adaptá pa prizonero di edat, pa por akapará e kresiente kantidat di penshonado ku ta kometé krímen,” segun informe di The Sunday Times di Lònden. E unidat aki den un prizon di Portsmouth tin un sistema di stulnan eléktriko pegá na trapi ku rel pa yuda hende grandi subi i baha, ekipo adaptá pa gimnastik i personal entrená pa duna kuido. Investigashonnan ta mustra ku mas di 100.000 penshonado “a kometé—òf a pensa di kometé—krímen” pa oumentá e plaka ku nan ta haña di gobièrnu i di nan penshon. Algun a bai dil den droga, a kuminsá hòrta, importá sigaria i alkohòl di kontrabanda den Gran Bretaña, i asta a roba banko. Na 1990 tabatin 355 penshonado ku a kai será, pero pa aña 2000 e sifra aki tabata 1.138. Segun e kriminólogo, Bill Tupman, hopi di e hendenan aki no a haña nan den kontakto ku hustisia anteriormente, pero “nan ta bou di un preshon inmenso pa mantené nan estilo di bida. E penshonadonan aki no ta esnan di mas pober, pero esnan di klase medio kendenan ta siudadano ku a traha duru i kumpli ku lei henter nan bida.”

 E Manera Ku Mama i Yu di Kachó di Awa Ta Haña Otro

Ora ku mamanan kachó di awa bolbe kas despues di a keda simannan largu den laman pa alimentá nan mes, e mamanan i nan yunan resien nasí tin ku haña otro meimei di un multitut bochinchero di sentenáres di otro kachó di awa adulto i yu. Kon nan ta hasié? Segun The Vancouver Sun di Canada, “despues ku e yunan nase, denter di dos dia nan ta siña rekonosé e stèm di nan mama, i masha lihé e mamanan ta siña rekonosé e gritu di nan yunan.” Un estudio ku nan a hasi riba Isla Amsterdam den Oséano Indio, a mustra ku “denter di shete minüt ku e mama regresá di su promé biahe den laman, e i su yuchi ta haña otro,” segun Sun. Dr. Isabelle Charrier, kende a efektuá e estudio, a bisa: “Un mama ta alimentá su propio yu so i e por bira masha violento pa ku otro yu. Pues, ta masha importante pa e yu rekonosé su mama.”

Idioma Chines Mandarin i e Selebro

Resientemente, e sikólogo Dr. Sophie Scott i su koleganan na Lònden i Oxford a usa skèn di selebro pa determiná kua partinan di nos selebro ta yuda nos komprondé loke hende ta papia. E investigadónan a deskubrí ku ora hende di abla ingles a tende ingles, nan slaapkwab na banda robes a bira aktivo. Sin embargo, “ora hende di abla chines mandarin a tende nan lenga natal, a surgi un eksploshon di aktividat tantu den e slaapkwab na banda drechi komo esun na banda robes,” e korant The Guardian ta informá. Dikon? “Normalmente e slaapkwab na banda robes ta ser asosiá ku e proseso di konektá zonidu huntu pa forma palabra; esun na banda drechi ku prosesamentu di melodia i tono,” e korant ta splika. “Na mandarin un tono diferente ta duna un palabra un nifikashon distinto: por ehèmpel, e sílaba ‘ma,’ por nifiká mama, skual, kabai òf fibra di hennep,” dependiendo di e tono. Dr. Scott a remarká: “Nos ta pensa ku hende di abla mandarin ta usa nan slaapkwab na banda drechi pa interpretá tono i melodia pa nan por duna e nifikashon korekto na e palabranan ku a ser papiá.”

Kompetensia pa e Edifisio Mas Haltu na Mundu A Bolbe Kuminsá

The Wall Street Journal ta deklará ku “planifikadónan di stat rònt mundu ta kompetí atrobe pa wak ken ta konstruí e edifisio mas haltu na mundu.” Ya kaba na Taipei, Taiwan, nan ta konstruyendo un edifisio ku nan ta spera lo bira 508 meter haltu, rònt di 90 meter mas haltu ku e Twin Towers tabata na New York City. Miéntras tantu, Shanghai, China ta sigui padilanti ku su plannan pa konstruí un Sentro Finansiero Mundial di 492 meter haltu. E funshonarionan di Shanghai ta pretendé ku e edifisio aki lo bira mas haltu ku e edifisio di Taiwan ya ku esun na Taiwan tin un antèna di televishon di 50 meter komo parti di su haltura. Pa bai asta mas haltu ainda, Seoul, Sur Korea, ke konstruí un sentro komersial internashonal ku ta 540 meter haltu. I pa nan no keda atras tin algun ta plania pa konstruí e edifisio mas grandi na mundu pa remplasá loke a bai pèrdí dor di atakenan terorista dia 11 di sèptèmber 2001 na New York City. “Ta masha poko hende ku a sufri a konsekuensia di e atakenan na 2001 lo por a premirá ku un kompetensia pa e edifisio mas haltu lo a bolbe surgi asina rápido,” segun Journal.

Hóbennan Agresivo Ta Pone Nan Kurason na Peliger

“Investigadónan a deskubrí ku mucha i teenager ku ta hopi agresivo tin tres bes mas chèns di haña síndrome di metabolismo—òf síndrome di resistensia kontra insulina, ku ta un señal peligroso di malesa di kurason—ku nan pareunan ku tin karakter mas suave,” The Gazette di Montreal ta informá. Investigadónan merikano i finlandes ku a tèst e nivel di agresividat di 134 teenager i mucha a ripará ku e hóbennan agresivo tin 22 porshento mas chèns di desaroyá e faktornan di rísiko pa malesa di kurason, ku hóbennan ku tin un nivel di agresividat mas abou. Dr. Kristen Salomon, ko-outor di e estudio, a deklará: “No ta di anochi pa mainta hende ta lanta ku malesa di kurason ora nan tin 50 aña. Malesa kardiovaskular ta kuminsá hopi trempan den bida.”

Gran Bretaña Su Para Mas Bieu?

E korant di Lònden, The Times, ta informá ku “e para mas bieu konosí di Gran Bretaña ainda ta sano i salvo despues di a biba 52 aña i bula ocho mion kilometer.” E para, un noordse pijlstormvogel chikitu koló pretu ku blanku, “a haña su promé renchi di identifikashon na mei 1957, ora e tabatin mas o ménos seis aña di edat.” Nan a bolbe koh’é den trampa na 1961, 1978 i na 2002, despues di kua e ornitólogonan no a spera di mir’é mas. Pero na prinsipio di 2003, el a bolbe aparesé na kosta di Nort Wales. E Asosiashon di Ornitologia di Gran Bretaña ta kalkulá ku e para a bula por lo ménos 800.000 kilometer pa e bai i bini for di Suramérika. Agregando na esaki su biahenan regular di 1.000 kilometer pa buska kuminda, sientífikonan ta konkluí ku el a bula mas ku ocho mion kilometer. Graham Appleton di e Instituto di Estudio di Para di Bardsey na Nort Wales, a bisa: “E para bieu a haña su di kuater renchi; esaki tambe ta algu sin presedente. E otro renchinan no ta sirbi mas.”

Programanan di Televishon pa Mucha Ta Disparsiendo na Spaña

E diario di Spaña, El País, ta informá ku “e programanan pa mucha na televishon atardi ta disparsiendo.” Manuel Cereijo, un bosero di Televishon di Estado na Spaña, ta splika ku “muchanan no ta un oudiensia sufisientemente konfiabel pa hustifiká transmishon rendabel di programanan spesial pa nan durante atardi.” Pero e situashon aki ta preokupá ekspertonan manera Lola Abelló, un presidente di Komishon di Mayor na Spaña, kende a remarká: “Mucha ta wak loke nan haña.” E rapòrt ta mustra ku ún di kada 3 mucha na Spaña tin televishon den su kamber. I e resultado di esaki ta ku muchanan no ta papia mas di karikaturanan den programa pa mucha pero en bes di esei nan ta papia tokante streanan di músika popular i di tópiko di programanan pa adulto. Segun Abelló, “esei ta tristu, pasobra nan ta pèrdè e oportunidat di ser hóben. For di un tierno edat nan ta wak programanan pa hende grandi.”