Ora Ku Pushi Bira Shimaron

DI UN ESKRITOR DI SPIÈRTA! NA OUSTRALIA

MOVIENDO pokopoko dilanti, kabes abou, wowonan klabá riba su proi, e yagdó ta slùip su víktima. E ta dobla su pianan bou di su kurpa, i ta para ketu. Su múskulonan ta tembla bou di su lana koló maron kla. Anto diripiente, manera un flecha e ta bula riba su proi tur sorprendí. Ku un gòlpi di su pata ku uña, e pushi ta gara su víktima i ta ten’é abou.

E sitio di e lucha aki di bida i morto no ta Afrika, sino Oustralia. E bestia ágil no ta un leon poderoso sino un pushi chikitu konosí komo pushi shimaron. Na Oustralia nan ta kalkulá ku tin 12 mion pushi shimaron ta kana rònt; tantu den e selvanan tropikal na e punta mas nort komo den e serunan haltu i friu den zùit i tambe den e desiertonan hopi kayente di e yanuranan sentral.

Kiko Ta un Pushi Shimaron?

E pushinan shimaron di Oustralia ta parse pushi di kas pasobra ta esei nan antepasadonan tabata. Nan lana tin mesun kolónan—pretu, blanku, shinishi, medio maron-oraño—i mesun dibuhonan, entre otro pintá, lizu òf strepiá. Sin embargo, pushi shimaron sa desaroyá un garganta i skouder mas muskular ku pushi di kas. Machunan ta pisa entre 3 pa 6 kilo, i hembranan entre 2 pa 4 kilo. Miéntras ku pushi di kas ta dependé pa gran parti di hende, pushi shimaron ta perkurá kompletamente pa nan mes nesesidatnan i no ta gusta ningun kontakto ku hende.

 E antepasadonan di e pushinan shimaron aki a kompañá e promé europeonan ku a bin establesé nan mes na Oustralia, i durante siglo 19, pushi a plama rònt e kontinente. Hopi pushi a hui bai mondi. Pero tambe hende mes deliberadamente a hiba hopi pushi den mondi durante dékada di 1880 den un intento pa frena e plaga di konènchi ku tabata destruí tur sabana ku tabatin yerba pa krio di bestia. No a tarda hopi ku e pushinan a adaptá nan mes na nan kas nobo i a bira e bestia mas plamá di e vários sortonan di bestia ku nan a introdusí na Oustralia. Awe, pushi shimaron ta biba den tur skina di Oustralia, inkluso riba hopi di e islanan chikí mas leu di e kontinente.

Kolonisadó Super Adaptabel

Pushi shimaron ta brui sinfin. Un hembra normalmente ta wèrp te ku shete yu promé ku e hasi un aña. Kaba e ta sigui wèrp tres biaha pa aña, i kada bes ku e wèrp e ta haña entre kuater pa shete yu. Anto e ta keda fruktífero durante tur e shete pa ocho añanan di bida ku e tin. Si e produsí solamente tres yu hembra i tres yu machu pa aña, i su yu hembranan hasi meskos, den shete aña un solo pushi shimaron lo por tin vários mil desendiente.

Pero pushi shimaron no a sobrebibí den e klima severo di Oustralia djis pasobra nan por a produsí hopi yu. E pushinan hopi bes ta yag anochi ora ta fresku òf mainta trempan. Nan ta evitá e kayente di dia dor di drumi den tronkonnan hòl òf den buraku di konènchi. Ademas, pushi shimaron a logra establesé nan mes den e desiertonan di mas inhospitalario pasobra nan no tin ku bebe awa pa sobrebibí; nan por optené tur e awa ku nan tin mester for di e karni di nan proi bibu.

Un otro kos ta ku pushi shimaron por adaptá nan dieta na loke tin den nan medio ambiente. Ounke nan ta preferá konènchi, segun e Servisio di Founa i Parkenan Nashonal di New South Wales: “Pushi ta mata i kome mas ku 100 sorto di para nativo di Oustralia, 50 sorto di mamífero i buideldier, 50 sorto di rèptil i kantidat di sapu i bestia sin wes’i lomba [manera insekto i bichi].” I nan tin un tremendo apetit. Un machu por kome entre 5 pa 8 porshento di su peso tur dia. Un hembra ku tin yu chikí por kome te ku 20 porshento di su peso pa dia. Riba un isla isolá, 375 pushi shimaron so a kome 56.000 konènchi i 58.000 para di laman den un solo aña.

Mayoria di e bestianan nativo di Oustralia no por defendé nan mes kontra un pushi shimaron. Segun e revista di medio ambiente Ecos, ekspertonan ta kere ku ta e manera haragan di yag di pushi shimaron, ta responsabel ku “programanan pa reintrodusí mamíferonan ku ta kore peliger di ekstinshon den partinan seku di Oustralia, no tin masha éksito.”

Maskota òf Plaga?

For di tempu di Egipto di antigwedat, pushi tabata popular komo maskota. Na Oustralia, 37 porshento di kas tin por lo ménos ún pushi. Hopi di e pushinan aki no ta sterilisá, i tin biaha hende ta djis benta e yunan indeseá den mondi, kaminda nan ta madurá, brui i oumentá e poblashon di pushi shimaron.

Pa evitá ku un dushi maskota ta bira un plaga pa medio ambiente, e Servisio di Founa i Parkenan Nashonal na Oustralia ta rekomendá lo siguiente: Tene bo pushi na kas, foral anochi. Perkurá sufisiente kuminda. Identifiká bo pushi ku un banchi, un ficho òf un mikrochip. Kologá tres bèl grandi na bo pushi pa spièrta bestia di mondi. Sterilisá bo pushi. Pone un waya di kurá di tal manera ku bo pushi ta keda den kurá.

Pa pone e sugerensianan aki na práktika ta kosta tempu i plaka. Pero pa amantenan di pushi na Oustralia, esei kisas ta un preis chikí ku nan tin ku paga.

[Plachi na página 20]

Un di Oustralia su 12 mion pushinan shimaron

[Rekonosementu]

Joel Winter/NSW National Parks and Wildlife Service, Oustralia

[Rekonosementu pa Potrèt na página 21]

Ku pèrmit di The Department of Natural Resources and Mines