Amate—Papiro di Mexico

DI UN ESKRITOR DI SPIÈRTA! NA MEXICO

E PUEBLO mèksikano tin un historia riku i fasinante. Entre e tesoronan kultural balioso ku hende a reskatá for di pasado ta e “testimonionan,” es desir, kodèks- òf manuskritonan ku a konsistí di plachi. Mediante e kodèksnan aki ta posibel pa hende haña sa tokante hopi kampo di konosementu—historia, siensia, religion i kronologia—i tokante e bida diario di sivilisashonnan desaroyá di e parti sur di Norteamérika, inkluso di e pueblonan asteka i maya. Tlacuilos (eskribanan) ku tabatin abilidat sorprendente a registrá nan historia riba vários material.

Ounke algun kodèks tabata trahá di repi di paña, kueru di biná òf papel di maguey (un tipo di mata di pita), e material prinsipal ku nan a usa tabata amate. E nòmber amate ta tumá for di e palabra nahuatl amatl, ku ta nifiká papel. Nan a optené amate for di e kaska di un fíkus (òf palu di figu) di e famia Moraceae. Segun e Enciclopedia de México, “ta difísil pa distinguí e tantísimo espesienan di Fíkus, a ménos ku eksaminá detayadamente e tronkon, blachi- i flornan i fruta.” E fíkus por  ta amate blanku, amate blanku di mondi òf amate maron skur.

Kon Ta Traha e Papel

Ora e spañónan a konkistá e pais den siglo 16, nan a kuminsá hasi esfuerso pa para e aktividat di traha amate. Dikon? Desde punto di bista di e konkistadónan, amate tabata estrechamente ligá ku ritonan religioso di e era prehispániko ku Iglesia Katóliko tabata kondená. Den su obra Historia de las Indias de Nueva España e Islas de la Tierra Firme, e frater spañó Diego Durán a señalá ku e nativonan “a komponé historianan ekstenso di nan antepasadonan. E historianan aki lo a duna nos bastante informashon si hende ignorante i yen di selo no a destruí nan. Pasobra tabatin algun ignorante ku, keriendo ku [e papelnan] tabata ídolo, a kima nan, siendo ku nan tabata historianan digno di ser rekordá.”

Sin embargo, e intentonan pa eradiká e tradishon di traha papel di amate no tabatin éksito, i afortunadamente e ta eksistí te awe. Den parti nort di e serunan di Sierra Madre di e estado Puebla, ainda nan ta traha papel na lugánan manera San Pablito, munisipio di Pahuatlán. E revista Arqueología Mexicana, sitando informashon registrá dor di Francisco Hernández, dòkter ofisial di Rei Felipe II, ta bisa ku “trahadónan di papel tabata kòrta solamente e takinan mas diki di e palunan, i a laga e ramanan mas yòn. Kaba nan tabata pone e takinan muhá den riunan den serkania durante anochi pa nan bira moli. E siguiente dia, nan tabata kita e kaska for di e taki i separá e kaska djafó for di e kaska di paden, i tabata keda solamente ku esun di pafó.” Despues ku nan a limpia e kaska, nan tabata plama e segmentonan di fibra riba un superfisie plat i bati nan ku un martin di piedra.

Awendia, pa suavisá e fibranan i a la bes eliminá sierto supstansianan for di nan, nan ta herebé e fibranan den ketel grandi den kua nan ta agregá shinishi i kalki. Nan por lag’é te ku seis ora riba kandela. Despues nan ta hawa e fibranan i laga nan den awa. Artesanonan ta pone e drachinan di fibra un pa un riba un superfisie plat di palu pa forma e patronchi di un bòrchi di dam. Despues, ku un martin di piedra, nan ta bati e fibranan ku gòlpinan regular te ora ku nan mara den otro i forma un vèl di papel. Por último, nan ta dobla e rant di e papel banda paden pa reforsá e rant, anto nan ta laga e papel seka den solo.

Tin vários koló di amate. Maron ta e koló tradishonal, pero tambe bo ta haña amate na blanku òf krèm, pikpik maron ku blanku, i na kolónan manera hel, blou, ros i bèrdè.

Su Uso Moderno

E mèksikanonan ta traha bunita obra di man ku amate. Ounke algun pintura riba e papel aki tin un nifikashon religioso, otronan ta representá diferente animal i tambe fiestanan i esenanan típiko ku ta reflehá e bida felis di e pueblo mèksikano. Fuera di bunita plachinan tur na koló, tin tambe tarheta, markadó di buki i otro obranan di man trahá di amate. E tipo di artesania ei ta fasiná tantu hende nativo komo stranhero, kendenan ta kumpra nan pa dekorashon. E arte aki a plama mas ayá di e frontera di Mexico, i ta ser eksportá pa vários parti di mundu. Nan a traha duplikado di e kodèksnan di antigwedat. E spañónan lo mester a haña e arte aki masha interesante ora nan a opserv’é pa promé bes. De echo, Diego Durán, e frater di e órden dominikano menshoná anteriormente, a remarká ku e nativonan “tabatin tur kos skirbí i pintá den buki i riba repinan largu di papel, ku kalkulashon di aña, luna i dia riba kua e susesonan a tuma lugá. Nan leinan i dekretonan, nan listanan di senso, etc., tabata skirbí den e pinturanan aki, tur kos masha ordená i armonioso.”

Ta maravioso ku e tradishon di traha amate a sobrebibí te ku nos tempu i huntu kuné e beyesa di e patrimonio mèksikano. Meskos ku e tlacuilos (eskribanan) di antigwedat, artesanonan simpel i moderno ta disfrutá di e maravia di amate, ku apropiadamente ta ser yamá e papiro di Mexico.

[Plachi na página 18]

Batimentu di e fibranan