E Punto di Bista Bíbliko

Bebementu di Mas Ta Realmente Asina Malu?

PA HOPI aña e figura di un buraché simpátiko ku ta pone hende hari, ta hungando su ròl riba esenario. Ounke ta trata solamente di aktuashon, e tipo di humor aki ta tipifiká e punto di bista kontradiktorio ku hopi hende tin pa loke ta bebementu pisá. Nan ta mir’é komo un debilidat sí, pero na mes momentu práktikamente inofensivo.

Klaru ku e realidat sí no ta nada prèt. E Organisashon Mundial di Salú ta klasifiká mal uso di alkohòl komo un di e peligernan prinsipal pa salú mundial. Aparentemente, ku eksepshon di adikshon na tabako, mal uso di alkohòl ta kousa mas morto i enfermedat ku mal uso di kualke otro supstansia ku ta krea adikshon, i e ta kosta e ekonomia di Merka so kaba mas ku 184 mil mion dòler pa aña.

Apesar di e echonan aki, hopi hende ta sigui minimisá e seriedat di bebementu di mas. Ounke kisas nan ta rekonosé e efektonan perhudisial ku mal uso riba término largu ta trese kuné, nan no ta mira nada malu pa de bes en kuando kore un paranda di bebementu. Den algun parti di mundu hóbennan ta mira birament’i fuma komo un rito pa mustra ku nan ta birando adulto. I apesar di e atvertensianan serio di parti di organisashonnan di salú, paranda di bebementu ku ta enserá sinku òf mas ‘drinks’ tras di otro, ta oumentando drástikamente den tur grupo di edat. P’esei, ta di komprondé ku hopi hende ta puntra nan mes si bebementu pisá ta realmente dje malu ei. Kiko Beibel ta bisa?

 Biña i Bebida Stèrki—Donnan di Dios

Na vários kaminda Beibel ta hasi referensia na biña i bebida stèrki. Rei Salomon a skirbi: “Bai anto, kome bo pan den felisidat i bebe bo biña ku kurason kontentu, pasobra Dios a aprobá bo obranan kaba.” (Eklesiastés 9:7) E salmista a rekonosé ku Yehova Dios ta e Perkuradó di “biña ku ta hasi kurason di hende kontentu.” (Salmo 104:14, 15) Aparentemente biña ta un di e donnan ku Yehova a bendishoná humanidat kuné.

Opviamente Hesus no a mira nada malu den bebe biña. De echo, su promé milager tabata di kambia awa den un biña di kalidat superior na un bankete di boda. (Juan 2:3-10) Tambe el a usa biña komo un símbolo apropiá di su sanger ora el a inougurá e Sena di Señor. (Mateo 26:27-29) Beibel ta asta menshoná e balor medisinal di biña, pasobra apòstel Pablo a animá Timoteo pa “tuma un poko biña pa motibu di [su] stoma.”—1 Timoteo 5:23; Lukas 10:34.

E Klave Ta Moderashon

Ripará ku Pablo a rekomendá Timoteo pa bebe solamente “un poko biña.” Bon kla, Beibel ta kondená tur uso inmoderá di alkohòl. E saserdotenan hudiu por a bebe ku moderashon ora nan no tabata na trabou. Sin embargo, ora nan tabata kumpli ku nan tareanan saserdotal sí Dios a prohibí nan di bebe kualke bebida alkohóliko. (Levítiko 10:8-11) Hopi aña despues, e Skritura a spièrta e kristiannan di promé siglo ku e burachénan “lo no heredá e reino di Dios.”—1 Korintionan 6:9, 10.

Ademas, den e instrukshonnan ku Pablo a duna Timoteo, e ta bisa ku esnan ku ta dirigí e kongregashon no por ta “bisiá na hopi biña.” * (1 Timoteo 3:3, 8) De echo, Beibel ta manda pa ekspulsá burachénan no-repentí for di e kongregashon kristian. (1 Korintionan 5:11-13) Manera e Skritura ta bisa aptamente, “biña ta un hasidó di bofon.” (Proverbionan 20:1) Esun ku ta bebe di mas por pèrdè su dominio propio i su sano huisio.

Pakiko e Palabra di Dios Ta Kondená Bebementu di Mas

Yehova, ‘esun ku ta siña nos pa nos mes bon,’ sa ku ora nos hasi mal uso di algu, finalmente nos ta perhudiká nos mes i tambe otro hende. (Isaias 48:17, 18, NW) Esaki ta konta pa bebida alkohóliko tambe. E Palabra di Dios ta puntra: “Ken tin ai? Ken tin ferdrit? Ken tin pleitu? Ken tin keho? Ken tin herida sin kousa? Ken tin wowo kòrá?” E ta kontestá: “Esnan ku ta sinta oranan largu ku biña, esnan ku ta bai pa purba biña mesklá.”—Proverbionan 23:29, 30.

Bou di influensia di demasiado alkohòl, hende a hasi hopi kos deskabeyá i peligroso: kore outo betrá i pone tantu nan mes komo otro hende na peliger; bira muchu familiar ku kasá di otro hende i kousa daño serio na relashonnan matrimonial; papia i hasi ko’i kèns òf asta kosnan pèrvèrso. (Proverbionan 23:33) Korektamente, mal uso di alkohòl a ser yamá un di e malesanan sosial mas perhudisial ku ta tormentá humanidat awe. Nada straño anto ku Dios ta duna e atvertensia: “No anda ku esnan ku ta gusta dal nan biña.”—Proverbionan 23:20.

Na Galationan 5:19-21, Pablo ta menshoná buracheria i parandiamentu komo “obranan di karni” na kontraste ku e fruta di Dios su spiritu. Bebementu di mas ta daña bo relashon ku Dios. Ta bon kla anto ku kristiannan mester evitá tur uso inmoderá di alkohòl.

[Nota]