Hóbennan Sa Puntra . . .

Kiko Tin di Malu den Sèks via Telefon?

“SÈKS VIA TELEFON a remplasá karta di amor komo e medio preferí di komunikashon romántiko entre parehanan ku ta leu for di otro,” segun un revista merikano bon konosí.

Kiko ta sèks via telefon? E ta enserá papia i skucha kosnan erótiko via telefon. * Hopi bes esnan ku ta partisipá den e práktika aki, ta masturbá pa satisfasé nan deseo seksual. Sea e kòmbersashon opseno ta tuma lugá entre parehanan ku ta namorá otro òf hende straño, sèks via telefon ta hopi popular i esei ta motibu di preokupashon. De echo, algun hende ta defend’é públikamente.

Un señora a bisa: “Esei ta e sèks di mas safe.” Aparentemente, hopi hende ta di akuerdo kuné. Por ehèmpel, den òktober 2000, komo reakshon riba un oumento di infekshon di HIV, un grupo di eksperto ruso riba tereno di salú a usa propaganda di korant pa promové sèks via telefon.

Sin embargo, otro hende ta promoviendo sèks via telefon puramente pa gana plaka. Na Merka so kaba servisionan di sèks via telefon—kaminda hende ta paga pa tende kosnan opseno—a bira un industria di mil mion dòler.

Pakiko eksaktamente e práktika aki a bira asina popular? E buki The Fantasy Factory ta bis’é asin’aki: “Kontakto íntimo, tantu físiko komo emoshonal, ta peligroso. Tin riesgonan físiko di enfermedat transmití seksualmente, e riesgo di daña imágen personal/profeshonal si e kontakto íntimo sali na kla, miedu di ser kondená dor di otro hende i tin tambe e konsekuensianan di deseo ‘apnormal.’ Sèks via telefon ta baha e riesgo.”

Ta bèrdat ku sèks via telefon no ta enserá kontakto físiko ku un otro persona. Pero esei kier men ku no tin nada  malu den dje òf ku no tin niun peliger ni riesgo kuné?

Sèks via Telefon Ta Algu Inofensivo?

Deseo seksual ta spesialmente intenso durante hubentut. Beibel ta yama e periodo aki durante kua deseo seksual ta mas fuerte ku nunka e ‘flor di hubentut.’ (1 Korintionan 7:36) Durante e tempu krusial aki den bida, un hóben kristian mester siña “kon pa tene su mes kurpa den santifikashon i onor.” (1 Tesalonisensenan 4:4) Esei ta nifiká ku bo tin ku siña kon pa anda ku bo deseonan seksual i dominá nan. Si bo kier tin un punto di bista saludabel i balansá di sèks, esaki ta masha importante.

Sin embargo, sèks via telefon ta siña hende pa satisfasé nan impulsonan seksual, en bes di dominá nan. Mas ku esei, e ta promové un punto di bista degradá i trosí di e persona di sekso opuesto. Beibel ta siña ku ta entre hende kasá so por tin intimidat seksual. (Hebreonan 13:4) Pero sèks via telefon ta animá hóbennan pa eksperimentá ku plaser seksual pafó di matrimonio. Beibel ta siña ku berdadero felisidat ta bini for di duna—no di risibí. (Echonan 20:35) Pero sèks via telefon ta siña bo usa otro hende komo un medio pa haña satisfakshon seksual. Beibel ta siña parehanan kasá pa desaroyá berdadero intimidat dor di kultivá amor i konfiansa mutuo. (Efesionan 5:22, 33) Sin embargo, sèks via telefon, ta promové indiferensia i e idea di keda anónimo.

Un Adikshon Perhudisial

Korinto di antigwedat tabatin e fama di tabata un stat di bisionan inmoral. Ku bon motibu anto, apòstel Pablo a skirbi e kristiannan ei: “Mi tin miedu ku, meskos ku e kolebra a gaña Eva ku su astusia, boso mentenan lo wòrdu desviá for di e deboshon simpel i puru na Kristu.” (2 Korintionan 11:3) Sèks via telefon ta un di e medionan ku Satanas e Diabel ta usando pa korumpí hóbennan djawe.

Pa algun hóben, yamamentu di liñanan di sèks a bira un adikshon inkontrolabel. E ehèmpel di un yònkuman ku nos lo yama Jim ta demostrá kon “adikto” un hende por bira. Jim a mira e number di un liña di sèks via telefon riba un bòrchi di propaganda. El a memorisá e number i despues, kuriosidat a pon’é yama e number. Su yamadanan n’e number a bira mas i mas frekuente. No a tarda muchu ku el a akumulá un debe di telefon di 600 dòler!

Stimulashon di deseo seksual miéntras ku bo no ta kasá ainda ta bai kontra di e Palabra di Dios. E ta hasi un apelashon fuerte riba nos: “Konsiderá e miembronan di boso kurpa terenal komo morto pa inmoralidat, impuresa, pashon [i] deseo malu.”—Kolosensenan 3:5.

E Peligernan den Namorashon

Kiko di adultonan hóben ku ta namorá otro seriamente? Klaru ku ta masha normal pa hende ku stima otro deseá di ekspresá nan sintimentunan pa ku otro. Den tempu di Beibel, un mosa temeroso di Dios a bisa relashoná ku su komprometido: “Mi ta di mi stimá, i su deseo ta pa mi.” (Kantika di Salomon 7:10) Segun ku e dia di kasamentu ta aserká, no tin nada malu pa un pareha komprometí papia di sierto asuntunan íntimo. Pero sèks via telefon ta un manera safe pa ekspresá sintimentunan romántiko?

Nò. Asta parehanan komprometí ta obligá pa sigui e konseho di apòstel Pablo: “No laga inmoralidat òf kualke sorto di impuresa òf golosidat ni wòrdu mentá mes meimei di boso, manera ta pas pa santunan, ni sushedat, ni papiamentu di ko’i loko, ni chansanan vulgar, ku no ta pas, ma mas bien duna gradisimentu. Pasobra esaki boso sa ku siguridat, ku ningun fornikadó, persona impuru òf hende kudisioso, ku ta un adoradó di dios falsu, no tin herensia den e reino di Kristu i Dios.”—Efesionan 5:3-5; Kolosensenan 3:8.

Papiamentu íntimo ku deliberadamente ta lanta pensamentunan inmoral òf ku ta pone un hende  masturbá, opviamente, ta impuru den bista di Yehova. I esei por hiba na violashonnan asta mas serio di prinsipionan bíbliko. Por ehèmpel, dos hende ku tabata biba leu for di otro tabata namorá di otro. Den prinsipio nan tabata usa nan frekuente kòmbersashonnan via telefon komo un medio pa konosé otro. Pero, no a tarda muchu ku nan a kuminsá papia riba kosnan inmoral. Nan kòmbersashonnan a bira mas i mas eksplísito, bayendo den detaye. Nada straño anto ku ora ku finalmente nan sirkunstansianan a permití nan pa ta huntu, no a dura mashá pa nan a kai den kondukta inmoral.

Sin duda, si nos kier agradá Dios nos tin ku hasi tur nos esfuerso pa evitá di kai den e trampa di sèks via telefon. Kon nos por logra den esei?

‘Gòlpia Bo Kurpa’

Sèks via telefon por bira un adikshon. Nos tin ku ‘gòlpia nos kurpa i hasié esklabo’ pa por haña e aprobashon di Yehova. (1 Korintionan 9:27) Si bo ta yamando liñanan di sèks aktualmente, pakiko no buska yudansa? Lo ta bon pa kuminsá na bisa bo mayornan kristian. Klaru ku nan por rabia ku bo. Pero tambe nan por ta den e mihó posishon pa yuda bo kontrolá bo komportashon pa bo no sufri un rekaida. E ansianonan den bo kongregashon lokal di Testigunan di Yehova tambe lo ta dispuesto i lo por yuda bo.

Si bo ta namorá, sea determiná pa keda limpi, asta ora bo ta papia na telefon. Un mucha muhé kristian komprometí ku yama Leticia ta bisa: “Ami ku mi namorado huntu a lesa artíkulonan basá riba Beibel enkuanto kon pa keda desente. Nos ta masha gradisidu p’e manera ku esakinan a yuda nos mantené un konsenshi limpi.” Tuma kurashi i kambia di tema ora boso kòmbersashon bira muchu sugestivo. Papia ku otro tokante e nesesidat pa tene boso kòmbersashonnan limpi.

Den algun pais, anochi lat televishon ta pasa propaganda pa sèks via telefon. Podisé ta mihó pa bo simplemente evitá di wak televishon anochi lat. Siendo ku masturbashon lo lanta pensamentunan inmoral en bes di kore ku nan, ta vital pa bo evitá e práktika sushi aki. * Bo por logra saka pensamentu impuru for di bo mente dor di konsentrá riba kosnan rekto. (Filipensenan 4:8) Asosiá ku amigunan ku ta usa abla saludabel, i lesa e Palabra di Dios i publikashonnan kristian diariamente pa fortifiká bo determinashon. Den e manera aki lo bo no laga espasio pa fantasianan inmoral drenta den bo mente i korumpié. I mas importante ku tur kos, resa pidi Dios yudansa. Apòstel Pedro a skirbi: “[Tira] tur boso preokupashon riba dje, pasobra e ta perkurá pa boso.”—1 Pedro 5:6, 7.

Un mosa kristian di Brazil a bisa: “E preshon riba hóbennan pa haña nan enbolbí den sèks ilísito ta hopi fuerte.” Sin embargo, Yehova sa di e retonan ku bo por haña bo kuné. Sea sigur ku lo e duna bo tur e yudansa ku bo tin mester pa bo keda limpi den su bista.—Efesionan 6:14-18.

[Nota]

[Plachinan na página 20, 21]

Tantu sèks via telefon komo sèks sibernétiko ta birando popular

[Plachinan na página 20, 21]

Parehanan ku ta namorá mester tene kuidou pa nan kòmbersashonnan no bira impuru

[Plachi na página 22]

Bo por fortalesé bo determinashon pa keda limpi dor di lesa Beibel i publikashonnan kristian