Un Showcase na Aire Liber di Kasnan di Palu

Di un eskritor di Spièrta! na Slovakia

DEN algun pais, ku amor hende a konserbá e historia i beyesa di e kasnan di antaño den museonan na aire liber. E museonan ei ta konsistí di kolekshonnan na aire liber di edifisionan tradishonal tresé huntu na un solo lugá pa laga e generashon moderno sera konosí ku e estilo di bida i gustu artístiko di nan antepasadonan.

Laga nos bishitá un ekselente ehèmpel di un museo na aire liber, situá den kurason di Europa na e region Orava den parti nort di Slovakia.

E Museo di e Pueblito Orava

E museo na aire liber di Orava na Zuberec ta duna hende un idea realístiko di e region aki su historia. E museo, ku a keda fundá na aña 1967, tin entre otro, kasnan for di 74 pueblito i boerderij den bisindario i tambe di poblashonnan alehá i solitario. Nan a trese tur e edifisionan aki na pida-pida na e sitio i a arma nan kuidadosamente.

Einan nos por tuma un tour di 11 kas i boerderij kompletu, ku ta representá tantu e kasnan di hende prominente komo esnan di e pueblo komun di Orava, manera kas di alkalde, hende di noblesa, kampesino, peon i artesano. Komo ku pa siglonan agrikultura, huntu ku krio di baka i karné, tabata e okupashon prinsipal di habitantenan di Orava, tin bastante struktura di boerderij. Nan ta entre otro, hooizolder, plenchi di bati maishi, stal di baka di lechi, i e kabaña i kurá di bestia di un wardadó di karné i tambe mangasinanan trahá di palu pa warda grano i otro produkto. Tambe nos ta haña un kas di abeha, hèrmèntnan tradishonal trahá na man, un toren ku klòk aden, i un misa di palu ku tin asta un santana di imitashon!

Ora nos tira bista paden di e kasnan, nos ta ripará ku un kas típiko di Orava a konsistí di kuater sekshon prinsipal: un sala dilanti, un gang di entrada, un kushina i un kuarto òf mangasina chikí parti patras. Tambe e kas por tabatin un bodega no muchu hundu di pleister ku piedra plat. Nan tabata konstruí e kasnan di palu labrá, i hopi bes tabata fèrf un rant blanku rònt di bentana i porta. E daknan i e fachadanan sumamente elaborá tabata tapá ku panchi di dak òf ku planki. Tin biaha e sala tabatin flur di tera, pero asina mes e murayanan lo tabata blanchá òf podisé furá ku plachi di palu natural fini akabá. Nan tabata kushiná riba fogon den kushina, i e huma tabata sali via un skorsten. E kushina tabata manda kayente te den sala.

Traha i Dibertí Huntu

E diseño di e strukturanan di palu aki ta duna evidensia palpabel ku tabatin lasonan fuerte entre hende di vários generashon i di e komunidat. Nan a organisá kasnan i pueblitonan pa traha den koperashon ku otro. De echo, pa sobrebibí bou di e kondishonnan ekstremo di e region yen di seru aki lo tabata kasi imposibel si hende no a koperá estrechamente ku otro. Famia i bisiña a traha huntu pa hiba baka, karné i gans na sabana pa kome. I henter e pueblito a uni forsa pa kosechá e kunukunan i hiba nan produktonan merkado. Tambe e komunidat mes a mantené e sabananan p’e bestianan por kome i kamindanan di tera.

Apesar di e trabou pisá, bida den e pueblito por lo general tabata felis, spesialmente na tempu di kosecha. Bon produkshon di lechi i nasementu di bisé i lamchi a kousa alegria. Na okashonnan asina e seritunan tabata resoná ku kanto i melodianan folklóriko, kantá na armonia i kompañá pa flùit, sinfonia òf akordion. Den wenter, mucha muhénan i señoranan  kasá tabata reuní huntu pa kita pluma di gans pa yena kusinchi i deken. Hende hòmber a pasa nan tempu kontando historia segun ku nan tabata traha, i na fin di dia, tur hende a bin huntu pa baila. Den algun lugá di e region aki, te awe e tradishonnan aki ta sigui.

Un Bistaso den Pasado

E artesanonan ábil ku a konstruí e ekselente strukturanan di palu aki a basa nan diseñonan riba prinsipionan di konstrukshon i mapanan ku a pasa di un generashon pa otro. E diseñonan a hasi bon uso di e materialnan lokal. Ademas, sabiduria práktiko i sentido di beyesa ta bisto den e manera agradabel ku e edifisionan ta pas den nan medio ambiente. Bo por mira bon kla ku e konstruktornan a hinka nan kurason i mente den nan trabou.

E arkitekto mundialmente renombrá Ludwig Mies van der Rohe a komentá: “Kada kap di hacha tin un nifikashon i kada gòlpi di beitel ta ekspresá algu. . . . E perisia di generashonnan kompletu a keda konserbá den e konstrukshonnan aki. Esta un gran apresio pa e materialnan i esta un gran intensidat di ekspreshon tin den e edifisionan aki! Nan ta sumamente agradabel i enkantador! Nan ta parse e eko di kantikanan di antaño!”

Miéntras nos ta pousa pa atmirá e arkitektura den e museo na aire liber, nos tambe ta purba imaginá e hendenan ku a biba den e kasnan aki segun ku nan tabata hasi nan aktividatnan diario. Nos ta spera ku nos por hiba un poko di e trankilidat di e bida mas lento aki huntu ku nos den nos mundu moderno hopi agitá.

[Mapa na página 14]

(Pa e teksto den su formato kompleto, wak e publikashon)

Zuberec

[Plachinan na página 15]

(1) Kasnan di palu; (2) bista parti paden; (3) habitantenan ta toka muzik i baila den nan trahenan tradishonal