Un Tèst di Fe

DI UN ESKRITOR DI SPIÈRTA! NA GRAN BRETAÑA

RICHMOND ta un pueblo pintoresko den North Yorkshire, Inglatera. Su kastel, konstruí djis despues di e konkista di Willem e Konkistadó na aña 1066, ta duna un bista impreshonante riba e vaye di Riu Swale, ku ta hiba na e Parke Nashonal Yorkshire Dales.

E dokumentario na televishon The Richmond Sixteen (E Dieseisnan di Richmond) a revelá un aspekto importante di e kastel su historia moderno: destino di 16 persona enkarselá einan durante Promé Guera Mundial pasobra nan a nenga di drenta servisio militar a base di nan konsenshi. Kiko a pasa ku nan?

Servisio Militar Obligatorio

Despues ku Gran Bretaña a deklará guera na 1914, patriotismo a motivá rònt di 2,5 mion hòmber pa drenta servisio militar boluntariamente. Sin embargo, segun e historiadó di guera Alan Lloyd, despues outoridatnan ‘a kuminsá pone preshon riba hende hòmber pa drenta servisio militar, en bes di roga nan pa hasié,’ debí na e kresiente kantidat di sòldá ku tabata muri den e guera, i dor ku nan a realisá ku e guera no tabata bai kaba lihé manera polítikonan a primintí. P’esei na mart 1916, pa promé bes den historia britániko, tabata obligá hòmbernan soltero sirbi den forsanan armá.

Outoridatnan a establesé 2.000 tribunal pa tende kasonan di apelashon, pero masha poko di esnan ku a nenga di drenta servisio militar a base di konsenshi a haña dispensashon kompletu. Nan a ordená mayoria di e personanan ei pa djòin e kuerponan ku nan a establesé pa apoyá e guera i ku a konsistí di hende ku no ta den kombate. E hòmbernan ku a nenga di hasi esei, a wòrdu konsiderá tòg komo den servisio militar i a hiba nan dilanti di korte militar. Outoridatnan a trata nan severamente i a enkarselá nan, hopi bes den kondishonnan pèrtá i horibel.

E Dieseisnan di Richmond

Entre e Dieseisnan di Richmond tabatin sinku Studiante Internashonal di Beibel, manera Testigunan di Yehova tabata konosí e tempu ei. Herbert Senior, kende a bira un Studiante di Beibel na 1905 na edat di 15 aña, a skirbi un 50 aña despues: “Nan a pone nos den sèlnan ku tabata mas manera kashòt. Probablemente e sèlnan ei tabatin hopi aña sin wòrdu usá, ya ku e flur tabata kubrí ku 5 pa 8 centimeter di sushi.” Resientemente nan a kuminsá laga públiko mira grafiti i otro skirbimentu riba muraya ku e prezunan a pinta i skirbi riba e murayanan blanchá di nan sèl. Pero nan ta tur blikiá i na algun parti bo no por ni lesa nan mas. Bo por mira nòmber, mensahe, i pintura di sernan kerí, huntu ku deklarashonnan di fe.

Un prezu simplemente a skirbi: “Mihó mi muri pa un prinsipio ku mi muri pasobra mi no tin ningun.” Hopi mensahe ta menshoná entre otro Hesukristu i su siñansanan, tambe nan a pinta kuidadosamente e emblema di krus i korona, ku e tempu ei e Asosiashon di Studiantenan Internashonal di Beibel (IBSA) tabata usa. Herbert Senior a menshoná ku riba muraya di su sèl el a pinta e “Mapa di Épokanan” for di e buki pa studia Beibel E Plan Divino di Épokanan, pero nan no a haña esaki. Podisé el a bai pèrdí meskos ku e otro kosnan skirbí na otro  parti òf riba e murayanan di e sèlblòk prinsipal. Un di e prezunan a skirbi: ‘Clarence Hall, Leeds, I.B.S.A. 29 di mei 1916. Mandá Fransia.’

Mandá Fransia—I Bèk!

E kantidat di víktima den e guera na Fransia i Bèlgika tabata oumentá na un velosidat alarmante. Minister di guera Horatio Herbert Kitchener i general britániko Douglas Haig tabatin mester di mas tropa desesperadamente, inkluso hòmbernan kasá, kende pa mei 1916 tambe a kuminsá ser reklutá obligatoriamente. Pa preshoná e hòmbernan ei pa djòin den e guera, outoridatnan a disidí di kastigá esnan ku nenga a base di nan konsenshi, pa asina spanta otronan. P’esei a punta di pistola nan a pone e Dieseisnan di Richmond ilegalmente riba un trein, ku nan man di bui, i den sekreto a hiba nan Fransia via di un ruta indirekto. Segun e revista Heritage, na e playa di Boulogne, Fransia, “nan a mara e hòmbernan na palu ku prikkeldraad, kasi komo si fuera nan tabata ser krusifiká,” i a pone nan para wak kon un peloton di fusilamentu a ehekutá un desertor britániko. Anto a bisa nan ku si nan no obedesé òrdu, nan lo a haña e mesun destino.

Meimei di yüni 1916, outoridatnan a pone e prezunan marcha dilanti 3.000 sòldá pa nan tende nan sentensia di morto, pero pa e tempu aki Kitchener a muri, i e promé minister britániko a intervení. Un hende a manda un pòstkart ku un mensahe sekreto pa outoridatnan na Lònden, i nan a revoká e órden militar. General Haig a haña òrdu pa kambia tur sentensia di morto na dies aña di trabou fòrsá.

Ora ku e prezunan a regresá Gran Bretaña, nan a hiba algun di e dieseisnan na un mina di granit pa hasi “trabou di importansia nashonal” bou di kondishonnan horibel, segun un informe ofisial. E otronan, manera Herbert Senior, nan a manda bèk prizon, pero no prizon militar sino prizon sivil.

E Herensia

Awor Kastel Richmond ta bou di kuido di e organisashon Patrimonio Ingles. Nan tin un ekshibishon ekstenso einan, pero debí na e estado delikado di e murayanan di e sèlnan, e ta inkluí un sistema via screen di kòmpiuter ku ta permití bishitantenan eksaminá djaserka tantu e sèlnan komo loke tin skirbí riba nan, sin daña nan. Gruponan di mucha di skol ta ser enkurashá pa komprondé dikon personanan ku a nenga di drenta servisio militar pa motibu di nan konsenshi, tabata dispuesto pa sufri kastigu, enkarselashon i posibel ehekushon pa loke nan tabata kere sinseramente.

E Dieseisnan di Richmond ku éksito “a trese e kuestion di nenga servisio militar a base di konsenshi na atenshon públiko i a kuminsá gana aseptashon i rèspèt pa esei.” Esaki a pone ku durante Segundo Guera Mundial outoridatnan a desplegá un aktitut mas komprensivo pa ku esnan ku a registrá nan mes komo personanan ku ta nenga servisio militar a base di konsenshi.

Na aña 2002, nan a dediká un parti di e bunita hardin di e kastel na memoria di e Dieseisnan di Richmond komo tributo na nan konvikshonnan moral.

[Plachinan na página 12, 13]

Di robes pa drechi: E toren di siglo 12 di Kastel Richmond, ku e blòk ku a kontené e sèlnan di prizon

Herbert Senior, un di e Dieseisnan di Richmond

Un di e sèlnan kaminda e Dieseisnan di Richmond tabata detené

Rant di e páginanan aki: Parti di loke a wòrdu skirbí riba muraya di e prizon atraves di añanan