PA HOPI akadémiko i krítiko, Moisés no ta nada mas ku un personahe di mitologia. Nan ta rechasá e relato bíbliko dor di apliká sierto kriterionan komo prueba, pero segun e kriterionan ei lo mester rechasá hòmbernan manera Plato i Sócrates tambe komo mito.

Pero manera nos a mira, no tin motibu válido pa rechasá e relato bíbliko di Moisés. Al kontrario, pa hende ku tin fe, tin prueba na abundansia ku henter e Beibel ta “e palabra di Dios.” * (1 Tesalonisensenan 2:13; Hebreonan 11:1) Pa hende  asina, un análisis di e bida di Moisés no ta simplemente un aktividat teorétiko sin balor práktiko, sino mas bien e ta un manera pa edifiká fe.

Trahadónan di pelíkula hopi bes ta destaká Moisés su aktonan di héroe i su kurashi físiko, kualidatnan ku e públiko ku ta bai wak pelíkula gusta. I ta sierto ku Moisés definitivamente tabatin kurashi. (Eksodo 2:16-19) Pero mas ku tur kos e tabata un hòmber ku fe. Dios tabata un realidat pa Moisés; asina real ku despues apòstel Pablo a bisa ku Moisés “a keda firme, komo si fuera e tabata mira Esun ku ta invisibel.”—Hebreonan 11:24-28.

Pues Moisés ta siña nos ku ta nesesario pa nos kultivá un relashon ku Dios. Den nos bida diario, nos tambe por komportá nos mes komo si fuera nos ta mira Dios! Si nos hasi asina, nunka nos lo aktua den un manera ku ta desagrad’é. Tuma nota tambe ku e fe di Moisés a ser inkulká den dje miéntras ku e tabata simplemente un mucha chikí. Pero su fe tabata asina profundo ku el a keda fuerte apesar di “a wòrdu eduká den tur e siñansa di e egipsionan.” (Echonan 7:22) Esei sigur ta un animashon pa mayornan kuminsá siña nan yunan tokante Dios for di infansia.—Proverbionan 22:6; 2 Timoteo 3:15.

Un otro kos remarkabel tabata Moisés su humildat. E tabata “masha humilde, mas ku tur hòmber ku tabatin riba superfisie di tera.” (Numbernan 12:3) Pues Moisés tabata dispuesto pa atmití su erornan. El a skirbi kon e mes a neglishá di laga sirkunsidá su yu hòmber. (Eksodo 4:24-26) El a konta frankamente kon na un okashon el a faya di duna Dios gloria i e kastigu severo ku Dios a imponé riba dje. (Numbernan 20:2-12; Deuteronomio 1:37) Ademas, Moisés tabata dispuesto na aseptá sugerensia for di otro hende. (Eksodo 18:13-24) Lo no ta bon pa esposonan, tatanan i otro hende hòmber den puesto di outoridat imitá Moisés?

Ta bèrdat ku algun krítiko ta kuestioná si Moisés realmente tabata humilde, i nan ta sita e akshonnan violento ku el a tuma. (Eksodo 32:26-28) Segun e eskritor Jonathan Kirsch: “E Moisés deskribí den Beibel rara bes ta humilde i nunka e ta suave, i no ta semper por konsiderá su kondukta komo hustu. Na sierto momentunan spantoso, . . . Moisés ta resaltá komo un hòmber arogante, sangriento i kruel.” E tipo di krítika ei lamentablemente ta indiká un mente hopi será. E ta pasa por haltu di e echo ku Moisés su akshonnan no tabata motivá pa krueldat, sino pa un amor intenso pa hustisia i un rechaso kompletu di maldat. Den e tempu aki ku ta na moda pa aseptá estilonan di bida inmoral, Moisés ta un rekordatorio pa nos ku ta nesesario pa nos tin normanan moral firme.—Salmo 97:10.

Moisés a laga atras un kolekshon asombroso di obranan skirbí. Entre nan tin poesia (Jòb, Salmo 90), narashon históriko (Génesis, Eksodo, Numbernan), listanan di desendensia (Génesis, kapítulo 5, 11, 19, 22, 25) i un kantidat remarkabel di legislashon ku ta ser yamá e Lei di Moisés (Eksodo, kapítulo 20-40; Levítiko; Numbernan; Deuteronomio). E Lei divinamente inspirá aki ta kontené konsepto-, lei- i prinsipionan di gobernashon ku tabata siglonan mas avansá ku otronan di su tempu.

Den paisnan kaminda e hefe di Estado tambe ta sirbi komo kabes di Iglesia, esei hopi bes ta resultá den intoleransia, opreshon religioso i den abusu di poder. Den e Lei di Moisés tabatin e prinsipio di separashon di Iglesia i Estado. No tabata permití pa rei efektuá debernan di saserdote.—2 Krónikanan 26:16-18.

Tambe e Lei di Moisés a kontené konseptonan di higiena i reglanan pa kombatí i prevení malesa ku ta kuadra ku siensia aktual, kosnan manera isolá hende ku ta malu i deshasí di sushi humano. (Levítiko 13:1-59; 14:38, 46; Deuteronomio 23:13) Esaki ta un kos remarkabel si nos tuma na kuenta ku den tempu di Moisés gran parti di medisina egipsio tabata un  meskla peligroso di práktikanan médikamente inkorekto i superstishon. Den paisnan den desaroyo awe, miónes di hende lo por evitá malesa i morto si nan praktiká e normanan di higiena basá riba e Lei di Moisés.

Kristiannan no ta bou di obligashon di sigui e Lei di Moisés. (Kolosensenan 2:13, 14) Pero te ainda ta di gran balor pa nan studi’é. E Lei ei a urgi Israel pa duna Dios deboshon eksklusivo i pa keda leu di idolatria. (Eksodo 20:4; Deuteronomio 5:9) El a manda yunan onra nan mayornan. (Eksodo 20:12) Tambe e Lei a taha pa no mata, kometé adulterio, hòrta, gaña ni kudishá. (Eksodo 20:13-17) Kristiannan te ainda ta duna hopi balor na e prinsipionan ei.

Nos ta biba den tempunan trabahoso. Humanidat definitivamente tin mester di un lider manera Moisés; un hende ku no solamente tin poder i outoridat sino tambe integridat, kurashi, kompashon i un amor sinsero pa hustisia. Ora Moisés a muri, e israelitanan sigur lo a puntra nan mes: ‘Mundu lo bolbe mira un hende  manera Moisés?’ Moisés mes a kontestá e pregunta ei.

E bukinan ku Moisés a skirbi ta splika kon malesa i morto a originá i dikon Dios a permití pa maldat kontinuá. (Génesis 3:1-19; Jòb, kapítulo 1, 2) Na Génesis 3:15, nos ta haña e promé profesia divino registrá—un promesa ku maldat ku tempu lo ser aplastá! Kon? E profesia a indiká ku lo nase un persona mediante ken salbashon lo bin. E promesa aki tabata e base pa e speransa ku un Mesias lo lanta i libra humanidat. Pero ken e Mesias lo ta? Moisés ta yuda nos identifik’é inekibokablemente.

Na final di su bida, Moisés a ekspresá e palabranan profétiko aki: “SEÑOR bo Dios lo lanta pa bo un profeta manera ami for di meimei di bo, for di bo paisanonan; boso mester skucha na dje.” (Deuteronomio 18:15) Apòstel Pedro despues a apliká e palabranan ei direktamente na Hesus.—Echonan 3:20-26.

Mayoria komentarista hudiu vigorosamente ta nenga ku tin similaridatnan entre Moisés ku Hesus. Nan ta argumentá ku e palabranan di e teksto aki ta apliká na tur profeta berdadero ku a bin despues di Moisés. Sin embargo, segun Tanakh—The Holy Scriptures, di e Sosiedat di Publikashonnan Hudiu, Deuteronomio 34:10 ta bisa: “Nunka mas a lanta den Israel un profeta manera Moisés—kende SEÑOR a skohe spesialmente, [papiando kuné] kara-kara.”

Sí, despues di Moisés tabatin hopi profeta fiel, manera por ehèmpel Isaias i Jeremias. Pero ningun di nan tabatin e relashon úniko ku Dios ku Moisés a disfrutá di dje: papia ku Dios “kara-kara.” P’esei Moisés su promesa di ku lo bin un profeta ‘manera dje,’ mester ta apliká na un solo persona: e Mesias! Un kos interesante ta ku promé ku komienso di kristianismo—i e persekushon religioso di parti di kristiannan falsu—eruditonan hudiu tabata pensa meskos. Nos ta haña rastronan di e punto di bista aki den obranan skirbí hudiu, manera Midrash Rabbah, ku ta deskribí Moisés komo e predesesor di e “futuro Redentor,” òf Mesias.

Hende no por nenga e echo ku Hesus tabata manera Moisés den hopi aspekto. (Wak e kuadro “ Hesus—Un Profeta Manera Moisés.”) Hesus tin poder i outoridat. (Mateo 28:19) Hesus ta “mansu i humilde di kurason.” (Mateo 11:29) Hesus ta odia maldat i inhustisia. (Hebreonan 1:9) Ta p’esei e por duna nos e liderato tan nesesario! Ta é ta esun ku pronto lo aplastá maldat i kombertí e tera den e Paradeis ku Beibel ta deskribí. *