Opservando Mundu

Un Toro den un Tienda di Porselana

Na ingles tin un dicho ku ta bisa di hende torpe ku nan ta manera un toro den un tienda di porselana. Bo a yega di puntra bo mes kiko lo pasa si di bèrdè un toro drenta un lugá di bende artíkulo di porselana? Wèl, BBC News ta informá ku esei ta nèt loke a tuma lugá. Un toro a hui for di un findishi di animal na Lancashire, Inglatera, i a kore drenta un tienda di kosnan antik. Un korant ku a duna informe dje insidente a bisa: “E tienda ta spesialisá den porselana antik i, manera bo por ferwagt, e toro a trapa i kibra vários obra karu.” Despues ku outoridatnan a konsultá ku doño di e toro i a konsiderá e riesgonan enbolbí pa purba kapturá e animal, nan a disidí ku ta mihó mata e toro. Pues polis a sera e área i a likidá e toro ku ainda tabata den e tienda.

 Kampeon Mundial den Kaida di Werlek

E korant O Globo ta informá ku investigadónan ku ta analisá datonan di satélite a deskubrí ku “Brazil ta e pais kaminda werlek ta kai mas tantu. Kada sekònde ta tuma lugá [na Brazil] entre dos pa tres deskarga eléktriko, pa un total di 70 mion pa aña.” Loke ta kousa nan ta e enorme selvanan di yobida kombiná ku un klima kayente. Esakinan ta krea e ambiente perfekto p’e tantísimo tormentanan eléktriko. Ademas di eksigí bida di rònt di 100 brasileño pa aña, werlek ta kousa daño na balor di 200 mion dòler na waya di telefon i koriente i tambe na fábrikanan i otro konstrukshonnan. I segun e sientífiko Osmar Pinto Jr. di e Instituto Nashonal pa Investigashon di Espasio, kontrali na un kreensia popular, “werlek por kai tres, sinku òf te asta dies biaha n’e mesun lugá.”

Spionahe via Telefon Selular

E korant Frankfurter Allgemeine Zeitung ta informá ku telefon selular ku kámara ‘build in’ ta formando un peliger pa asuntunan konfidensial den komersio. Ounke un tempu nan a pensa ku kámara ‘build in’ ta djis un aparato mas pa promové benta, e potrètnan digital ku e generashon nobo aki di telefon selular ta saka ta di hopi mas mihó kalidat i agentenan di siguridat di hopi kompania ta mir’é komo un problema kresiente. Fuera di ku e telefon-kámara aki no ta riparabel, distinto di kámaranan konvenshonal e por transmití potrèt instantáneamente, lokual ta hasié un hèrmènt perfekto pa spionahe industrial. Asta ora e intruso ser interseptá, ya e daño ta hasí kaba. P’e motibunan aki, un kantidat di kompania ya kaba a prohibí uso di telefon selular ku kámara ‘build in’ den áreanan konfidensial protehá pa sistemanan di siguridat, manera departamentonan di diseño i lugánan kaminda ta tèst produktonan nobo.

Víktimanan Trágiko di Aksidente di Tráfiko

“Kada aña aksidente di tráfiko ta mata míles di hende mas tantu ku krímen violento,” segun e korant spañó El País. Na Europa, aksidente di tráfiko ta kousa 55.000 morto i 3,5 mion herido pa aña. Na Spaña, 35 porshento di e mortonan ta di hende entre 15 pa 29 aña. Esei ta hasi aksidente di tráfiko e kousa prinsipal di morto p’e grupo aki. Jeanne Picard Mahaut, bosero pa La Ligue, un organisashon no-gubernamental dediká na mehorá siguridat riba kaminda, ta bisa ku “esaki ta e problema di mas serio pa salubridat públiko.” E ta agregá: “Si bo no ta kere mi, puntra e dòkternan ku ta atendé kasonan di emergensia tur fin di siman.” Komo medida pa mehorá siguridat, La Ligue i dos otro grupo europeo ta haña ku fabrikantenan di outo mester instalá aparatonan ku ta limitá velosidat i un ‘black box’ ku ta revelá e posibel kousa di un aksidente.

Mal Aña pa Gletsjernan Alpino

E zomer sumamente kayente di 2003 tabata, “te asina leu ku hende por kòrda, e pió temporada” p’e gletsjernan alpino, segun e korant italiano Corriere della Sera. Segun ku zomernan a bira mas kayente i temperaturanan promedio a subi, e sneu i eis ku tin akumulá riba e serunan den nort di Italia a bin ta smèlt “mas lihé ku nunka.” Entre e sorpresanan ku resientemente a surgi for di e eis ku ta smèlt, tabatin un kañon di 3.300 kilo trahá na Oustria. Nan a hañ’é na un altura di 3.178 meter riba nivel di laman. A usa e arma aki pa ataká posishonnan italiano durante promé guera mundial. E artíkulo ta sigui bisa: “E tipo di hayasgonan aki a bira mas i mas frekuente durante e último 20 añanan. E zomernan mas kayente ta pone nos gletsjernan smèlt manera ora laga vrizer porta habrí.”

E Problema di Suisidio di Sur Korea

The Korea Times ta informá ku desde 1999 suisidionan na Sur Korea ta oumentando bárbaramente tur aña. E korant ta bisa ku “den lunanan resien kasi tur dia tabatin kasonan tristu di hende ku a kita nan bida, prinsipalmente pa motibu di difikultatnan ekonómiko, manera debe di tarheta di krédito, pero tambe pa motibu di desesperashon. Di akuerdo ku estadístikanan di e Agensia Nashonal di Polis, un total di 13.055 persona a kometé suisidio [na 2002], un oumento di 6,3 porshento kompará ku 12.277 e aña anterior. Esaki ta nifiká 36 suisidio pa dia i 1,5 pa ora.” Pero tin algu mas alarmante ainda. Times ta bisa: “Mayornan desesperá ta disidí di mata nan yunan i despues nan mes ta mata kurpa.” Un ehèmpel di esei ta di un señora di 37 aña di edat ku a kometé suisidio despues ku el a haña sa ku su esposo a pèrdè e ekivalente di 140.000 dòler riba merkado di balor. Nan a haña tur su dos yunan—un yu hòmber di 14 aña i un yu muhé di 12 aña—tambe morto. E artíkulo ta konkluí bisando: “Sikólogonan ta bisa ku mas i mas hende ta bou di preshon pa kometé suisidio ya ku komunidat no ta dunando nan ningun speransa pa vense nan difikultatnan.”

Biaheronan Vulnerabel pa Malesa

The Medical Post di Canada ta bisa ku “rònt mundu, mas ku un den kada nuebe biahero ta haña nan ku problemanan respiratorio.” Un estudio ku GeoSentinel a hasi a pone nan yega n’e konklushon aki. GeoSentinel ta un asosiashon di e Sosiedat Internashonal di Remedi pa Biahe i e Sentronan Merikano pa Kontròl i Prevenshon di Enfermedat. Via un ret di komunikashon i kolekshon di datos di 25 klínika rònt mundu spesialisá den remedi pa ora di biaha, nan ta reuní informashon tokante salú. Entre yanüari 1997 i desèmber 2002, tabatin 18.817 biahero ku a bishitá e klínikanan aki, i serka 2.173 biahero a konstatá ku nan tabatin problemanan respiratorio ku a varia for di doló di garganta i orea i sinusítis te na pulmonia, bronkítis i infekshon di miko-bakteria. Biaheronan ku ta bishitá paisnan kaminda e riesgo ta haltu ta ser konsehá pa hasi sigur ku ainda nan vakunanan ta válido i pa pensa riba e posibilidat di pasa angua kontra grip; no ta importá kua temporada di aña. Segun Dr. Isabelle Nuttall, un spesialista di malesa kontagioso n’e Organisashon Mundial di Salú, bon higiena ta e promé protekshon kontra un enfermedat kousá pa bakteria òf vírus. El a deklará: “Si tin un mensahe ku nos no ta kansa di duna, anto esei ta pa ‘laba man.’”