Sea Puntual!

“DIREKTORNAN di empresa tin un problema króniko ku yegamentu lat,” segun USA Today. Sitando un enkuesta bou di 2.700 direktor, e ta agregá: “Di kada 10 reunion, na seis nan ta yega lat.”

E mundu di komersio ta mira yegamentu lat komo algu hopi mas serio ku djis un muestra di mal manera. Un estudio ku nan a efektuá bou di 81.000 persona ku ta buska trabou a konkluí: “E oranan ku ta bai pèrdí na yegamentu lat i ousensia sin pèrmit ta un fuente prinsipal di pèrdida finansiero.” Klaru ku no ta den e mundu di komersio so yegamentu lat ta krea problema. Un enkuesta bou di kabesnan di skol sekundario a mustra ku “yegamentu lat di studiantenan tabata e motibu prinsipal i mas frekuente pakiko muchanan ta haña straf.”

Nos Kreadó tabata ke pa nos ta konsiente di tempu. P’esei el a traha “e dos lusnan grandi”—solo ku luna—pa yuda nos midi tempu. (Génesis 1:14-16) Awendia, oloshinan moderno ta permití nos midi nos tempu den minüt i sekònde. Sin embargo, apesar di teknologia, tòg hopi di nos tin problema pa yega na tempu na trabou, skol òf otro sitanan importante.

E problema realmente ta falta di tempu? No tin duda ku trabou i famia por ta eksigiendo hopi tempu di nos. No opstante, Wanda Rosseland, un mama ku ta traha, a bisa: “Dia mi a realisá ku nos tur tin 24 ora pa dia, mi a stòp di keha tokante falta di tempu. Mi a pensa riba esaki i mi a yega n’e konklushon ku den nos mundu moderno, e problema no ta ku nos tin tiki tempu, sino ku nos tin hopi kos ku ta kita nos tempu i distraí nos.”

Tuma tambe e kaso di Renee, * un Testigu di Yehova, mama di sinku yu. E ta kòrda: “Tempu mi yunan tabata chikitu, no tabata fásil pa prepará nan pa skol i pa reunionnan kristian. Tòg, mi no tabatin problema pa yega na tempu. Pero awor ku nan tur a bira grandi, mi a krea e mal kustumber di yega lat.” Abo tambe tin e mal kustumber aki? Si ta asina, ta posibel pa kambia! Aki ta sigui algun kos ku por yuda bo.

● PENSA RIBA E KONSEKUENSIANAN. Yegamentu lat por parse un kos insignifikante. Pero pensa riba e siguiente palabranan di Beibel: “Muska morto ta hasi zeta di un trahadó-di-perfume hole malu; asina un poko bobedat ta pisa mas ku sabiduria i onor.” (Eklesiastés 10:1)  Sí, djis “un poko bobedat” den e forma di falta di konsiderashon pa otro hende por daña bo reputashon serka un mener di skol òf doño di trabou.

Tempu ku un señora ku yama Marie tabata sigui algun kurso na un skol lokal, el a ripará ku algun di su koleganan di klas “no tabata wòri mashá ku ora.” Hopi bes nan tabata yega lès lat. El a sigui bisa: “Pero nan a haña nan purá ta kambia pasobra dos di e maestronan sí tabata hopi eksigente tokante puntualidat. Si un studiante a yega djis un par di minüt lat, nan tabata mark’é komo ousente. I pa kada tantu biaha ousente, e studiante tabata haña un mal punto.”

Ora bo ta semper lat, bo por haña mal nòmber serka bo amigunan tambe. Un hòmber di rònt di kuarenta aña ku yama Joseph ta kòrda un ruman kristian ku el a konosé hopi aña pasá. Ounke e hòmber aki a gosa di rèspèt pa su abilidatnan komo maestro, e tabatin un debilidat fastioso. Segun Joseph: “Semper e tabata lat. Mi kier men lat pa tur kos! I aparentemente nunka e no tabata wòri ku esei. E hendenan tabata hasi wega ku su yegamentu lat.” Kiko di abo? Hende a kuminsá referí na bo komo un persona ku semper ta lat? Si ta asina, fásilmente nan por pasa bo bon kualidatnan por haltu.

● TENE KUENTA KU OTRO HENDE. Yegamentu lat ta un muestra di mal manera i e ta distraí otro hende. Tambe e por duna e impreshon ku bo ta sinti bo mas importante ku otro hende. Splikando pakiko asina tantu ehekutivo di negoshi tin tendensia di yega lat pa reunion, un komersiante a atmití: “Mayoria di nos ta simplemente arogante.” Na kontraste, kristiannan ta trata otro hende komo superior na nan. (Filipensenan 2:3) Tambe nan ta apliká e Regla di Oro i ta trata otro hende manera nan ke wòrdu tratá. (Mateo 7:12) Bo no ta disgustá ora bo tin ku warda riba otro hende? Anto, no pone otro hende warda riba bo.

● SIÑA MANEHÁ BO TEMPU. Bo sa posponé kosnan i kore hasi kosnan purá-purá na último ora? Bo ta programá muchu kos di hasi, purbando pa hasi muchu kos den un tempu muchu kòrtiku? E prinsipio na Eklesiastés 3:1 por ta útil pa bo: “Tin un tempu stipulá pa tur kos.” Ora bo tin “un tempu stipulá” pa kada kos, lo bo por hasi nan na un manera ordená.

 Na promé lugá, traha un lista di tur loke bo tin ku hasi. Despues, sigui e prinsipio na Filipensenan 1:10 [NW]: “Hasi sigur dje kosnan mas importante.” Sí, sigui un órden di prioridat. Kiko ta e kosnan ku bo tin ku hasi sin falta? Kiko ta algun di e kosnan ku bo por posponé trankilamente pa mas despues? Finalmente, kalkulá kuantu tempu bo mester pa kada kos i ki ora òf dia bo por hasi nan. Sea realístiko i evitá di programá muchu kos den muchu tiki tempu.

Un señora ku yama Dorothy a bisa ku ta danki na su mayornan ku e ta puntual. E ta konta: “Si nos mester tabata na un reunion kristian 7:30 p.m., mi mama tabata kuminsá prepará nos 1 ora i 45 minüt promé ku esaki. Nos tabatin ku saka tempu pa kome, pa laba kos, pa bisti i pa kore yega e lugá di reunion. Tabata algu normal pa nos ta na ora.” Tin biaha ta bon pa tene kuenta ku kosnan inesperá. Dorothy a bisa: “Resientemente mi tabatin ku pasa buska un par di hende pa un reunion. Riba kaminda mi a haña un flèt tayer. Mi a kambia tayer i tòg yega na tempu pa rekohé e hendenan. Wak, semper mi ta sali mas trempan, teniendo kuenta ku un posibel problema ku outo òf tráfiko pisá.”

● PIDI OTRO HENDE SUGERENSIA. Beibel ta bisa na Proverbionan 27:17: “Manera heru ta mula heru, asina un hende ta mula kara di su amigu.” Na armonia ku e prinsipio ei, papia ku otro hende ku tin kasi mesun sirkunstansianan ku bo, pero ku tòg semper sa ta na tempu. Hopi bes nan lo por tin algun sugerensia útil.

Renee, sitá anteriormente, ta determiná pa kambia su aktitut di yega lat. El a bisa: “Resientemente mi a pone pia abou pa mehorá. Ounke no tabata fásil, pokopoko mi ta bayendo dilanti.” Bo tambe por. Ku e aktitut korekto i ku esfuerso, bo por siña ser puntual!

[Nota]

[Plachinan na página 18]

Un empleado ku semper ta lat por kousa un mal impreshon serka su doño di trabou i ta mustra ku e no tin kunes ku otro hende

[Plachi na página 19]

Bon organisashon personal por yuda bo evitá di pèrdè tempu