E Fe di un Famia Ta Pasa den Prueba

INDIA, un mucha muhé lif di nuebe aña ku ta biba na Wisconsin, Merka, sa bon kiko ta malesa. De echo, ya kaba el a hasi tres operashon grandi i un kantidat di operashon chikí. Su mama, Lori, a bisa: “Durante seis aña largu, India su bida tabata drei rònt di salanan di emergensia, estadia na hospital i baimentu di dòkter.”

Tur kos a kuminsá tempu ku India tabatin un aña i mei. El a kuminsá haña síntomanan straño, entre otro, diarea króniko, keintura haltu, stoma di blas i pèrdida apnormal di peso. Tambe e tabatin doló den su barika. Tur anochi pa dos aña largu, pobersitu India tabata lanta kada bes yorando, keñando i tin biaha asta gritando di doló.

Miéntras ku dòkternan tabata purba saka afó ta kiko falt’e, India a sigui sufri teriblemente. Lori a bisa: “Nos beibi básikamente tabata muriendo di hamber.” Mark, tata di India, a agregá: “Pa mas ku un aña nos mester a mira nos yu muhé ta para kaba na nada, sin sa kon pa yud’é. Mi ta kòrda kon impotente mi a sinti mi un anochi ku ami ku Lori tabata papia tokante su entiero, ya ku na e punto ei nos a kere ku esei tabata inevitabel.”

Ku tempu dòkternan a saka afó ku India tabatin un malesa ku ta ataká e parti paden di e tripa i forma úlsera. Tambe e tabatin un malesa ku ta inflamá e tubunan di hal di e higra. E malesanan aki tabata tratabel. Sin embargo, lo e mester a operá, i pa e úlseranan na tripa, lo e mester a usa remedi. Ámbos kondishon a rekerí kontròl i kuido konstante durante su rekuperashon.

Ya ta mas ku shete aña ku India a bira malu pa promé bes. Grásias na e kuido di dòkternan hopi atento, India ta riba kaminda di rekuperashon. Komo Testigunan di Yehova, Mark ku Lori ta sinti ku ta nan fe den e Palabra di Dios a yuda nan perseverá, foral pa loke Beibel ta bisa tokante malesa,  morto i e speransa di un futuro resurekshon. Esei ta loke a yuda India tambe perseverá. Lori a bisa: “India semper a papia libremente tokante e speransa di resurekshon ku tin den Beibel. E ta algu masha real p’e.”

Un biaha ku India tabata den e sala di hunga na un hospital, el a topa un mucha chikí kende su ruman muhé tabatin leukemia. Lori a konta kiko a pasa: “E mucha a bisa India ku e tin miedu ku su ruman lo por muri. Anto India a kont’é kiko Beibel ta bisa ku morto ta i ku é sí no tin miedu di muri. E siguiente dia, mama di e mucha a bin serka mi ku vários pregunta. E tabata hopi asombrá ku India por a papia asina libremente i sin miedu tokante kosnan asina.”

Mark ku Lori a deskubrí ku e orashonnan di rumannan den fe tabata un sosten enorme. Mark a bisa: “Ántes ora mi bisa hende ku lo mi hasi orashon pa nan òf asta ora mi hasi orashon ku nan, semper mi tabata deseá ku lo mi por a hasi mas pa nan. Awor mi ta realisá kon importante e orashonnan ei ku nan—i pa nan—ta. Orashon tabata e kos di mas importante ku un hende por a hasi pa nos durante e tempu difísil ei. Esta un hermandat amoroso nos tin!”

Tambe Mark ta haña ku e malesa di India a yuda nan eksaminá nan prioridatnan. El a bisa: “Un kos ku sigur a kambia ta nos punto di bista pa ku kosnan material. Ora bo yu ta malu, ta manera ku e kosnan ei no tin niun tiki balor! E kosnan balioso den bida tabata—i ta—nos relashon ku Yehova Dios i nos hermandat amoroso.”

Mark ku Lori i tambe India ku su rumannan ta spera ku anhelo riba e tempu ku Isaias a profetisá di dje. E tempu ora ku “ningun habitante lo no bisa: ‘Mi ta malu.’”—Isaias 33:24; Revelashon 21:4.

[Plachi na página 18]

India Erickson

[Plachi na página 19]

Hospital di Mucha di San Diego

[Plachi na página 19]

India huntu ku su famia