For di Nos Lektornan

For di Nos Lektornan Mi gusta lesa e rúbrika “For di Nos Lektornan.” Tin bes mi ta usa remarkenan ku e lektornan a hasi pa motivá e personanan ku mi ta studia Beibel kuné, pa presta atenshon spesial na sierto artíkulo. E rúbrika ta mustra ku boso esfuerso pa alkansá kurason di hende no ta enbano.

S. A., Rusia

Awa Mi ta traha den e ramo di nutrishon i kontròl di peso, i e artíkulo “Awa, e Líkido Balioso i Vital pa Bida,” tabata nèt loke mi tabatin mester. (8 di yüni 2003, na spañó) Boso a logra resumí den un solo artíkulo, tur loke mi a siña den un kurso di nutrishon ku a dura 30 ora. Mi tin intenshon di usa e informashon aki pa yuda mi klientenan.

J.F.S.F., Brazil

Spik Danki pa e artíkulo “Hóbennan Sa Puntra . . . Ki Tin di Malu den Spik?” (8 di febrüari 2003) E muchanan den mi klas kier a paga mi un suma grandi pa mi traha prufwèrk pa nan. Dor ku mi no kier a hasi esei pa nan, nan a pensa ku mi ta irasonabel. E artíkulo a rekordá mi ku nos mester tene Dios su normanan na haltu i nunka komprometé nos prinsipionan.

F.A.C., Nigeria

Nunka mi no tabata traha hùiswèrk mi mes. Semper mi tabata skirbié over for di e muchanan den mi klas. E artíkulo aki a yuda mi komprondé ku skirbi hùiswèrk over for di otro mucha ta meskos ku hòrta. Ounke e muchanan di mi skol no a gusta esei, ami sí a tuma mi desishon.

Y. D., Rusia

Diabétis Ora mi a lesa e seri “Kon pa Biba ku Diabétis” (8 di mei 2003) i a lesa ku ora bo tin ku orina kada bes tambe ta un síntoma, mi a realisá ku mi tambe por tin diabétis. Pues, mi a bai kontrolá i mi a haña sa ku mi ta diabétiko. Tin mas ku un luna kaba ku mi a hasi chèkòp i mi ta trahando pa baha e nivel di suku den mi sanger dor di usa remedi, sigui un dieta i hasi ehersisio. Si mi no a mira e revista, kisas lo mi no a haña sa ku mi tin e malesa ei.

Y. N., Hapon

Mi no ta un Testigu di Yehova, ma mi ta haña boso revistanan serka un bon bisiña. Mi a gusta e seri tokante diabétis masha hopi mes. Dor ku mi ta siñando pa duna kuido na hende grandi, mi mester a traha un scriptie riba e tema di diabétis. Si mi a haña e revista un par di dia promé, esei lo a skapa mi e trabou di buska den asina hopi buki. Boso artíkulonan ta hopi útil.

A. S., Alemania

Set Spiritual E artíkulo “Kon Mi Set Spiritual A Ser Sasiá” a pone awa basha for di mi wowo. (8 di yüli 2003) Mi a lanta den un famia katóliko i pa ocho aña largu mi a bai skol katóliko. Ounke nunka nos no tabata lesa Beibel na skol ni na misa, semper mi tabatin apresio pa Beibel i mi tabata lesa for di mi ehemplar tur anochi. Meskos ku Lucia Moussanett, mi tambe kier a hasi e kosnan ku mi a siña for di Beibel, pero mi no tabata sa kon. Ora mi a kuminsá studia Beibel ku Testigunan di Yehova, mi set spiritual a ser sasiá. Masha danki p’e historianan di bida konmovedor manera esun aki!

K. F., Merka