Hóbennan Sa Puntra . . .

Kiko di Diskoteka pa Hóbennan?

“E úniko motibu pakiko mi tabata bai, ta pa mi ègt dibertí.”—Shawn.

“Pa bisa bèrdat: tabata dushi, masha dushi mes! Hopi bailamentu, bo ta baila henter anochi.”—Ernest.

DISKOTEKA i fiesta grandi pa hóbennan a bira masha popular durante e último añanan aki. Hopi hóben ku kier pasa bon ta bishitá e sitionan aki regularmente.

Klaru ku nos tur gusta pasa bon. I Beibel ta bisa ku tin un “tempu pa hari” i asta un “tempu pa baila.” (Eklesiastés 3:4) Sin embargo, baimentu di diskoteka pa hóbennan ta un rekreo sano? Òf tin bon motibu pa nos pensa dos bes promé ku nos bai un lugá asina?

“Fiestanan Desenfrená”

Ounke Beibel no ta kondená reunionnan sosial moderá, e ta spièrta nos kontra di “parandiamentu” òf “fiestanan desenfrená.” (Galationan 5:19-21; Byington) Den tempu bíbliko, hopi bes parandiamentu a hiba na komportashon fuera di kontròl. Profeta Isaias a skirbi: “Ai di esnan ku ta lanta mainta trempan pa kore tras di bebida stèrki, ku ta keda lantá te anochi lat, te ora biña subi na nan kabes! Nan tin lirio, arpa, tamburein, flùit i biña na nan banketenan, ma nan no ta paga atenshon na e echonan di SEÑOR.”—Isaias 5:11, 12.

Un karakterístika di e fiestanan aki tabata e uso di “bebida stèrki” i muzik desenfrená. Nan tabata kuminsá for di trempan i a dura te anochi lat. Tuma nota tambe di e aktitut di e koredónan di paranda: nan a komportá nan mes komo si fuera Dios no a eksistí! P’esei no ta straño ku Dios a kondená e tipo di reunionnan sosial ei. Pero kiko Dios ta pensa di loke ta tumando lugá awe den hopi diskoteka pa hóbennan?

Konsiderá algun kos ku ta sosodé. Pa di promé, algun diskoteka ta sigui promové un tipo di baile violento ku yama “mòsh.” Segun un  fuente, e baile aki ‘a desaroyá den diskoteka meimei di dékada di 1980, despues di e periodo di punk na Merka. El a originá for di un tipo di baile den kua e bailadónan ta dal duru den otro.’ Hopi bes ora bailadónan ta ‘mòsh,’ nan ta keda bula den laira, sagudí nan kabes violentamente, imitá e manera ku bestia ta dal otro ku kachu i tambe nan ta dal duru den e otro bailadónan. Pia òf man kibra i kòrtá na kurpa ta kosnan masha normal. Tin hende tambe ku ta haña sla na nan wes’i lomba i na kabes. Tabatin hende ku a asta muri. Ademas, den algun diskoteka nan ta hisa un hende na laira i e multitut ta keda pas’é di un man pa otro riba nan kabes. I e ta keda komo si fuera ta sùrf e ta sùrf riba olanan di laman. Hopi hende ku nan a hisa asina a yega di kai i a heridá nan mes. I ora ta trata di mucha muhé, no ta nada straño ku nan ta mishi ku nan na maneranan inapropiá.

No tin duda ku Dios ta kondená e tipo di komportashon ei, pasobra su Palabra ta manda kristiannan ‘renunsiá impiedat i deseonan mundano i biba huisioso.’—Tito 2:12.

Muzik i Droga

Pensa tambe riba e tipo di muzik ku nan ta toka den algun diskoteka. Tin diskoteka ta konsentrá prinsipalmente riba hard rock òf heavy metal, muzik ku ta ser karakterisá pa un ritmo fuerte i vibrante i letranan vulgar. Sin embargo, den algun diskoteka e muzik preferí ta rap òf hiphòp. E tipo di muzik aki tambe ta ser karakterisá pa sèks, violensia i rebeldia. Ora bo ta bai e lugánan aki bo ta eksponiendo bo mes na e klase di muzik ei den un ambiente insaludabel. Esaki por afektá bo? David Hollingworth, un outoridat den e ramo di diskoteka, a bisa: “Muzik tin un tremendo impakto sikológiko riba hende. Ora bo pone hopi hende huntu, muzik por stimulá nan pa komportá nan mes na un manera agresivo.” P’esei no ta un sorpresa ku tabatin un oumento drástiko di violensia den diskoteka den vários siudat na Merka. Hopi hende ta pensa ku esaki ta un resultado direkto di e klase di muzik ku ta promové aktividatnan vulgar i aktitut violento. *

Den último añanan droga tambe a bira parti di e ambiente den diskoteka. Un investigadó a deklará ku ‘loke a hasi diskotekanan popular ta e echo ku einan mes bo por haña un variedat di droga i bo por us’é tambe.’ De echo, tin droga ku generalmente nan ta yama droga di baile. Algun hende ku regularmente ta bai diskoteka ta asta usa un kombinashon di droga. Un di e droganan ku mas nan ta kombiná ku otro droga ta ketamina (nan ta yam’é tambe spesial K). E ta un droga ku por deskonektá un hende su mente for di su emoshonnan, tambe e por kousa halusinashon, problema ku halamentu di rosea i daño n’e sistema nervioso. Metanfetamina por kousa pèrdida di memoria, agresividat, violensia i posiblemente daño na kurason i na e sistema nervioso. Loke ta hopi popular ta e droga basá riba anfetamina ku yama ecstasy (XTC). E por kousa konfushon, ansiedat, pulso aselerá, preshon di sanger haltu i tambe keintura haltu. Tin usadó di ecstasy ku asta a muri.

Uso di droga ta na konflikto ku e mandato di Beibel pa “purifiká nos mes di tur impuresa di karni i spiritu.” (2 Korintionan 7:1) Ta sabí pa bo  hinka bo mes den un ambiente kaminda nan ta usa droga libremente?

Mal Asosiashon

Kòrda riba e spièrtamentu ku hende sa sita hopi: “Mal kompania ta daña bon kustumber.” (1 Korintionan 15:33) Meskos ku e koredónan di paranda den tempu bíbliko, ta parse ku hopi hóben ku ta frekuentá diskoteka awe no ta interesá den agradá Dios. De echo, bo por deskribí mayoria di nan komo personanan ku ta “mas bien stimadó di plaser ku stimadó di Dios.” (2 Timoteo 3:4) Abo realmente ke tin asosiashon estrecho ku e tipo di hendenan ei?

Algun hóben kisas ta rasoná ku si nan bai un diskoteka ku otro hóbennan kristian, esei ta minimisá e peligernan. Sin embargo, hóbennan kristian ku realmente ta ‘un ehèmpel den kondukta pa esnan ku ta kere,’ probablemente lo no ta dispuesto pa bai. (1 Timoteo 4:12) Asta si ta un grupo di hóben kristian a bai diskoteka òf fiesta huntu i a logra keda huntu, e muzik i ambiente insaludabel ta keda. Nan por haña nan den un situashon tenso òf inkómodo si hende ku no ta Testigu invitá nan pa baila. Algun hóben a haña nan asta enbolbí den bringamentu! Pues e siguiente palabranan di Beibel a resultá di ta bèrdat: “Esun ku anda ku hende sabí lo ta sabí, ma un kompañero di hende bobo lo sufri daño.”—Proverbionan 13:20.

Bailamentu Provokativo

Un otro punto pa konsiderá tambe ta e bailamentu mes. Tin un tipo di baile masha straño ku a bira hopi popular, foral entre hóbennan na Merka. En general nan ta baila e baile aki riba muzik di hiphòp ku tin letranan ku ta deskribí aktividatnan seksual na plaka chikí. Ademas, e baile mes ta imitá relashon seksual. P’esei nan ta yama e movementunan di e baile aki ‘sèks ku paña bistí.’

Un hóben kristian lo ke ta enbolbí den e tipo di baile aki? No si e ke agradá Dios. Pasobra Dios ta manda nos “hui for di inmoralidat.” (1 Korintionan 6:18) Algun hóben kisas ta rasoná: ‘Si tur hende ta hasié, e no por ta dje malu ei.’ Sin embargo, e manera ku mayoria hende ta aktua por ta robes. (Eksodo 23:2) Tene e kurashi pa resistí bo pareunan i mantené un bon konsenshi pa ku Dios!—1 Pedro 4:3, 4.

Kon pa Tuma e Desishon

Esaki no ta nifiká ku tur bailamentu ta malu. Beibel ta konta nos ku Rei David tabata asina kontentu despues ku el a hiba e arka sagrado di pakto Yerusalèm, ku e “tabata baila . . . ku tur su forsa.” (2 Samuel 6:14) Den Hesus su parábola di e yu pèrdí, e alegria ku tabatin pasobra e yu a regresá, tabata kompañá pa “muzik i bailamentu.”—Lukas 15:25.

Asina tambe por tin sierto tipo di baile ku ta aseptabel pa kristian kaminda bo ta biba. Pero asta ora esei ta e kaso, ta importante pa bo ta balansá i distinguí bon. Ta muchu mas safe pa disfrutá di muzik i bailamentu na fiesta di kristiannan kaminda tin kontròl i supervishon adekuá, ku den diskoteka pa teenager. Na fiestanan bon supervisá di kristiannan, hóbennan no ta isolá nan mes, mas bien nan ta disfrutá di asosiashon saludabel huntu ku kristiannan di tur edat.

Ta sierto ku den bo komunidat por tin algun restorant kaminda tin muzik i bailamentu aseptabel. Pero promé ku bo aseptá un invitashon pa bai kualke un di e establesimentunan ei, ta bon pa bo puntra bo mes lo siguiente: Ki reputashon e lugá ei tin? Su entretenimentu, bebida i kuminda ta estriktamente pa hóben? Si esei ta e kaso, kuantu chèns tin ku e ambiente ta unu saludabel? Ki klase di muzik nan ta toka? Kon nan ta baila einan? Mi mayornan ta eens pa mi bai? Dor di hasi e tipo di preguntanan aki, bo por evitá di hasi bo mes daño.

Shawn ku nos a sita na prinsipio di e artíkulo, a resumí e asuntu hopi bon. Promé ku el a bira kristian e tabata bai diskoteka regularmente. E ta konta: “Tin hopi kondukta inmoral den diskoteka. Por lo general e muzik ta degradá, e bailamentu por lo general ta masha inmoral, i un gran mayoria di hende ku ta bai diskoteka tin un solo propósito: ora nan bandoná e diskoteka nan ke sali ku un persona ku nan por bai tene relashon seksual kuné.” Despues ku Shawn a studia Beibel ku Testigunan di Yehova, el a stòp di bai diskoteka. Basá riba eksperensia doloroso, su opinion ta: “E lugánan ei no ta kaminda pa kristiannan bai.”

[Nota]

[Plachi na página 26]

Algun hóben a haña nan mes den situashonnan inkómodo den diskoteka