Kon un Trahadó Por Bira Víktima

Poko despues ku Monika a kaba skol el a kuminsá kore stage komo ofisinista na un kantor di abogado. Monika a antisipá un transishon suave di bida di skol pa trabou.

Horst tabata un dòkter di 30 i piku aña. E tabata kasá ku yu, i tur kos tabata indiká ku lo el a bira un dòkter respetá i haña un bon entrada.

Tantu Monika komo Horst a bira víktima di tèrmentu sikológiko na trabou.

E KASONAN di Monika i Horst ta siña nos un lès balioso: No ta fásil pa predisí ken lo bira víktima di tèrmentu sikológiko na trabou. De echo, kualke persona den kualke trabou ta un posibel blanko. Pues anto, kon bo por protehá bo mes? Un manera ta dor di siña kon pa logra pas na trabou, asta ku koleganan trabahoso.

 Traha Bon ku Bo Koleganan

Pa hopi hende, nan trabou ta rekerí pa nan traha bon ku un tim di kolega i yuda e tim ei funshoná suavemente komo un unidat. Si koleganan ta bai bon ku otro, e trabou ta bai dilanti. Si nan no ta bai bon ku otro, e trabou ta bai atras i tin mas chèns ku nan ta kuminsá tèr un kolega òf teima kuné.

Kiko por stroba un tim di kolega di funshoná suavemente? Un faktor por ta kambionan konstante den personal. Den tal situashon, ta difísil pa sera lasonan amistoso. Ademas, koleganan nobo no konosé e rutina di trabou, i esei ta slow tur hende su aktividat. Si e trabou ta akumulá, e grupo probablemente ta konstant bou di strès.

Mas ainda, si un tim no tin metanan bon definí, e koleganan no ta sinti nan uní. Por ehèmpel, esaki por ta e kaso ora ku un shèf insigur ta pasa mas tempu na defendé su posishon komo shèf ku na dirigí e trabou. Lo e por asta purba mantené kontròl dor di instigá koleganan kontra otro. Loke por empeorá e asuntu ta ora e struktura di e grupo no ta bon definí, lokual ta pone ku algun kolega no ta komprondé kiko presis ta nan responsabilidat. Por ehèmpel, por surgi konflikto ora ku dos empleado ta pensa ku nan tur dos tin e responsabilidat final di aprobá kuentanan ku mester paga.

Den un situashon asina, ta bira difísil pa komuniká ku otro i hopi bes no ta resolvé konfliktonan den kua un kolega a sintié di hùrt. Envidia ta daña e ambiente di trabou, i koleganan ta kompetí ku otro pa nan por keda bon mirá serka e shèf. Malkomprendementunan chikí ta ser mirá komo gran insulto. De echo, koleganan ta kuminsá hasi di un pieu un baka. Situashonnan asina ta forma e base pa kuminsá tèr un kolega òf teima kuné.

Kon Ta Skohe un Víktima

Despues di transkurso di tempu, nan por skohe un empleado pa kuminsá teima kuné. Ki klase di persona tin hopi chèns di bira víktima? Probablemente lo ta un hende ku ta destaká komo diferente. Por ehèmpel, kisas e ta e úniko hende hòmber den un ambiente femenino òf e ta un hende muhé ku ta hasi un trabou ku ta hende hòmber so sa hasi. Tambe nan por mira un persona ku tin konfiansa den su mes komo un hende agresivo, miéntras ku un persona reservá nan lo por mir’é komo bou di man. E posibel víktima por ta diferente tambe den e sentido ku e ta mas bieu òf mas yòn ku tur otro kolega òf asta mihó kualifiká pa e trabou.

Ken ku e víktima por ta, e koleganan “ta kuminsá hasi kos di frepòstu i malisioso ku e víktima ku nan a skohe i asina nan ta sinti un alivio di nan propio strès,” segun e revista médiko aleman mta. Intentonan di e víktima pa remediá e situashon lo no tin masha éksito i por asta empeorá e asuntu. Segun ku e intimidashon ta bira mas frekuente i sistemátiko, e víktima ta sintié mas isolá i rechasá. Na e punto aki, tin hopi chèns ku e víktima di e tèrmentu no por resolvé e situashon su so.

Naturalmente, semper tabatin e posibilidat ku trahadónan ta bira víktima di maltrato na nan lugá di empleo. Pero hopi hende por kòrda kon ántes koleganan tabata parse mas dispuesto na yuda otro. Masha poko bes tabata surgi kasonan di tèrmentu organisá. Pero atraves di añanan, a tuma lugá loke un dòkter a deskribí komo “un deterioro general di e spiritu di solidaridat i un desaparishon na gran eskala di e sentido di bèrgwensa personal.” Awendia hende tin ménos rèspèt pa étika i nan no tin problema pa partisipá den guera abierto na trabou.

Pues, ku rason tur hende ku ta traha ta interesá pa sa e kontesta riba e preguntanan aki: Bo por prevení tèrmentu? Kon bo por logra pas na trabou?

[Plachi na página 6]

E meta di tèrmentu ta pa laga e víktima sinti ku e no ta un parti di e grupo