Lugá di Empleo òf Zona di Guera?

DI UN ESKRITOR DI SPIÈRTA! NA ALEMANIA

“Simplemente mi no por a soportá mas. Mi tabatin mas ku 30 aña na e kompania. Mi a subi te na e nivel di supervisor. Anto un dia nos a haña un shèf nobo. E tabata hóben i dinámiko, i ku hopi idea nobo. Segun é, mi tabata un opstákulo pa e kompania, p’esei el a kuminsá teima ku mi. Despues di lunanan di insulto, mentira i humiashon, mi nervionan tabata na wèrki. Ora ku e kompania a ofresé mi un pakete pa baha ku penshon prematuro, mi a disidí di asept’é.”—Peter. *

PETER tabata un víktima di tèrmentu sikológiko na trabou. Na Alemania, kaminda Peter ta biba, tin segun kálkulo rònt di 1,2 mion hende ku ta wòrdu di tèr na trabou. Na Hulanda, 1 di kada 4 persona lo konfrontá esei na un momentu dado durante nan añanan na trabou. I un informe di e Organisashon Internashonal di Trabou ta bisa ku teima ku hende na trabou òf tèr nan, ta un problema kresiente na Dinamarka, Inglatera, Merka, Oustralia, Oustria i Suisa. Pero kiko presis tèrmentu sikológiko na trabou ta enserá?

Un “Guera pa Kaba ku Bo Nervionan”

Segun e revista notisiero aleman Focus, tèrmentu sikológiko ta ora koleganan ta “teima ku un hende frekuentemente, repetidamente i sistemátikamente.” E no ta simplemente hasimentu di chansa na trabou, lokual por inkluí sarkasmo, krítika, tentamentu i asta mal chansa. Mas bien, e ta un kampaña pa terorisá un hende sikológikamente. E meta ta pa ekskluí e víktima, lag’é sinti ku e no ta un parti di e grupo. *

E táktikanan di tèr un trahadó òf teima kuné por varia for di teima pa ko’i kèns te na aktonan kriminal. Koleganan ta kuminsá daña reputashon di e víktima i papia malu kuné, tambe nan no ta aster e i ta trat’é na un manera agresivo. Tin víktima ku deliberadamente koleganan ta duna mas trabou ku tur otro hende òf ku regularmente  nan ta skohe pa hasi e tareanan di mas desagradabel ku ningun otro hende ke hasi. Koleganan por sabotiá e víktima su esfuerso pa ta produktivo, podisé dor di keda sin dun’é informashon nesesario. Den algun kaso, esnan responsabel pa e tèrmentu a kòrta tayer di outo di e víktima òf a bai sin outorisashon den su kòmpiuter.

Algun trahadó ta bira víktima di un solo persona ku ta teima ku nan òf tèr nan. Pero mayoria biaha, ta un grupo di kolega ta sera kabes pa ataká un víktima.

Podisé e echo mas sorprendente ta ku den hopi kaso e shèf ta di akuerdo ku e tèrmentu. Den algun estudio ku nan a hasi na Europa a bin dilanti ku e supervisor a hunga un papel aktivo den 50 porshento di e kasonan di tèrmentu, i hopi biaha ta e so tabata responsabel pa e tèrmentu. Tur e táktikanan aki ta kombertí un persona su empleo den “un guera largu i angustioso; un guera pa kaba ku bo nervionan,” segun e korant aleman Frankfurter Allgemeine Zeitung.

Efektonan Mas Ayá ku e Lugá di Empleo

Hopi bes, e efektonan di tèrmentu ta bai hopi mas leu ku e lugá di empleo. Hopi víktima ta sufri di problemanan serio di salú debí na e trato kruel. Depreshon, problema ku drumimentu i atake di pániko ta algun konsekuensia di tèrmentu sikológiko na trabou. Kiko di Peter, menshoná den e introdukshon? Su balor propio a baha te na suela. Un señora ku yama Margaret, tambe di Alemania, a ser konsehá pa su dòkter pa buska tratamentu na un klínika  di salú mental. E kousa? Na trabou nan tabata tèr e. Esei por asta afektá un persona su matrimonio òf bida di famia.

Na Alemania, tèrmentu na trabou a bira asina komun ku un kompania di seguro médiko a pone un number di telefon disponibel pa yuda víktimanan. E kompania a deskubrí ku mas ku mitar di esnan ku a yama no por a bai traha pa kasi seis siman, rònt di un tersera parti no por a traha durante tres luna, i mas ku 10 porshento no por a traha pa mas ku tres luna. Un revista médiko di Alemania ta kalkulá ku “te ku 20 porshento di tur suisidio ta debí na tèrmentu na trabou.”

Pues ta bisto ku ora nan ta tèr bo na trabou òf teima ku bo, esei por kombertí trabou den un pesadia. Tin manera pa prevení esei? Kiko bo por hasi pa logra pas na trabou?

[Nota]

[Plachinan na página 4]

Tèrmentu ta kombertí trabou den un pesadia