E Punto di Bista Bíbliko

Pakiko Mira Matrimonio Komo Algu Sagrado?

M AYORIA hende awe probablemente lo pretendé ku nan ta kere ku matrimonio ta algu sagrado. Pero dikon anto tin asina tantu pareha ta divorsiá? Pa algun hende, matrimonio ta djis un promesa basá riba amor romántiko i un kontrakt legal. Pero segun nan, bo por keda sin kumpli ku e promesa ei tambe. Pa hende ku tin tal punto di bista di matrimonio, ta masha fásil pa nan kibra matrimonio ora ku kosnan no ta bai manera nan a spera.

Kiko ta Dios su punto di bista dje areglo di matrimonio? Nos por haña e kontesta den su Palabra, Beibel, na Hebreonan 13:4: “Laga matrimonio wòrdu onrá pa tur hende.” E palabra griego tradusí komo “onrá” ta transmití e idea di duna algu hopi balor i konsider’é komo presioso. Ora nos ta balorá algu, nos ta hasi nos bèst pa konserb’é, ya nos no ta pèrd’é ni pa kasualidat. Ta asina nos mester konsiderá e areglo di matrimonio tambe. Kristiannan mester mira matrimonio komo algu onorabel, algu di hopi balor ku nan kier protehá.

Ta opvio ku Yehova a instituí matrimonio komo un areglo sagrado entre esposo i esposa. Pero kon nos por mustra ku nos tambe tin Yehova su punto di bista enkuanto matrimonio?

Amor i Rèspèt

Pa mustra onor na e areglo di matrimonio, kasánan mester mustra onor na otro. (Romanonan 12:10) Apòstel Pablo a skirbi e kristiannan di promé siglo: “Laga kada un di boso tambe stima su esposa manera su mes; i e esposa perkurá pa e respetá su esposo.”—Efesionan 5:33.

Ta sierto ku sa sosodé ku un di e partnernan no ta aktua  na e manera di mas amoroso ni di mas respetuoso. Tòg, kristiannan mester mustra e amor i rèspèt ei. Pablo a skirbi: “Boso soportá otro i pordoná otro, si un di boso tin un keho kontra un otro; meskos ku Señor a pordoná boso, asina boso tambe mester hasi.”—Kolosensenan 3:13.

Tempu i Atenshon

Parehanan kasá ku ta mira nan matrimonio komo algu sagrado ta tuma tempu pa satisfasé nesesidatnan físiko i emoshonal di nan partner. Esaki ta konta tambe pa loke ta trata intimidat seksual. Beibel ta bisa: “Laga e esposo kumpli ku su deber di matrimonio pa ku su esposa, i meskos tambe e esposa pa ku su esposo.”—1 Korintionan 7:3.

Sin embargo, algun pareha kasá a haña ku ta nesesario pa e esposo bai biba temporalmente den un otro área pa e por gana mas plaka. Tin biaha e separashon aki a dura hopi mas tantu ku nan a ferwagt. Hopi bes e tipo di separashonnan aki a pone e matrimonio bou di asina tantu tenshon ku tin bes esaki a hiba na adulterio i divorsio. (1 Korintionan 7:2, 5) P’esei, hopi pareha kristian ta preferá di keda sin sierto benefisionan material, pa no pone nan matrimonio na peliger. Pasobra pa nan, e ta algu sagrado.

Ora Surgi Problema

Ora surgi problema, kristiannan ku ta onra nan matrimonio, no ta kore separá ni divorsiá. (Malakias 2:16; 1 Korintionan 7:10, 11) Hesus a deklará: “Ken ku divorsiá su esposa, si no ta pa motibu di inmoralidat, ta hasi e muhé kometé adulterio; i ken ku kasa ku un muhé divorsiá ta kometé adulterio.” (Mateo 5:32) Parehanan ku disidí di divorsiá òf separá for di otro sin ku nan tin base bíbliko, no ta mustra onor pa matrimonio.

E konseho ku nos ta duna personanan ku tin problemanan serio den nan matrimonio tambe ta mustra kiko nos ta pensa di matrimonio. Nos ta kla pa rekomendá hende pa separá òf divorsiá? Ta sierto ku tin bes tin motibunan válido pa separashon, manera den kaso di maltrato físiko severo òf ku e hòmber ta nenga opstinadamente di sostené su famia. * Ademas, manera e artíkulo ta bisa mas promé, Beibel ta permití divorsio solamente si un di e kasánan a kometé inmoralidat, esta, fornikashon. Pero apesar di esei, kristiannan no mester forsa otronan pa tuma sierto desishon den kasonan asina. Al fin i al kabo, ta e persona ku tin e problema den su matrimonio lo tin ku biba ku e konsekuensianan di su desishon, i no esun ku ta duna konseho.—Galationan 6:5, 7.

Evitá un Punto di Bista Indiferente

Den algun área a bira masha normal pa hende usa matrimonio komo un medio pa nan por keda legalmente na un otro pais. Por lo general un persona asina ta drenta un areglo ku un siudadano di e pais ei i ta pag’é pa kasa kuné. Hopi bes ounke e parehanan aki ta kasá, nan no ta biba huntu. Podisé nan no tin ni sikiera amistat ku otro. Asina ku nan haña e pèrmit ku nan tabata ke, nan ta divorsiá. Nan ta mira nan matrimonio únikamente komo un kombenio di negoshi.

Beibel no ta aprobá e punto di bista indiferente ei. Sin importá e motibu pakiko hende ta kasa, ora nan kasa nan ta drenta un areglo sagrado ku den bista di Dios mester dura henter nan bida. Den e areglo ei nan ta keda uní komo esposo i esposa, i nan no tin mag di divorsiá i kisas bolbe kasa, sin ku nan tin e base bíbliko pa divorsio.—Mateo 19:5, 6, 9.

Meskos ku den kaso di kualke otro proyekto ku ta bale la pena, pa logra un matrimonio eksitoso, bo tin ku hasi esfuerso i perseverá. Hende ku no ta rekonosé matrimonio komo algu sagrado, ta kla pa kore pone un fin na e matrimonio. Òf nan ta djis konformá nan mes numa ku un matrimonio infelis. Di otro banda, esnan ku ta rekonosé ku matrimonio ta algu sagrado, sí sa ku Dios ta ferwagt pa nan keda huntu. (Génesis 2:24) Tambe nan ta realisá ku ta dor di hasi esfuerso pa tin armonia den nan matrimonio, nan ta duna onor na Yehova komo Esun ku a diseñá e areglo di matrimonio. (1 Korintionan 10:31) E punto di bista aki ta duna nan e motivashon pa perseverá i traha pa nan matrimonio por ta un éksito.

[Nota]