Bonbiní na e Kongreso di Distrito “Kana ku Dios”

▪ Miónes di hende lo asistí na sentenáres di kongreso ku lo ser tené rònt mundu. Lo tin tres kongreso di tres dia na papiamentu. Esun promé lo ta na Aruba dia 23 pa 25 di yüli, esun di dos lo ta na Kòrsou dia 30 di yüli pa 1 di ougùstùs i e último lo ta na Hulanda dia 6 pa 8 di ougùstùs. Probablemente lo bo por bai un di e reunionnan di tres dia aki. Por lo general e reunionnan aki ta di djabièrnè pa djadumingu.

Na mayoria lugá e seshon lo kuminsá tur dia 9:30 a.m ku un programa musikal. E tema pa djabièrnè ta “Esaki Ta e Kaminda, Kana den Dje.” Despues di e diskurso di bonbiní, “Kongregá pa Laga Yehova Siña Nos Su Kaminda,” lo sigui un parti den kua lo tin entrevista ku rumannan ku ta kana fielmente ku Dios. Despues di e diskursonan “Sigui Duna Prueba di Loke Boso Mes Ta,” i “Laga e Palabra di Dios Guia Bo Pasonan Tur Dia,” e seshon di mainta lo konkluí ku e diskurso klave, “Kana ku Dios den Tempu Turbulento.”

Durante e seshon di djabièrnè atardi lo tin un simposio di tres parti, “E Profesia di Oseas Ta Yuda Nos Kana ku Dios.” Despues di esaki lo sigui e diskursonan, “No Separá ‘Loke Dios A Uni,’” i “Mustra Rèspèt pa Nos Reunionnan Sagrado.” E último diskurso pa e dia ei, “Bon Nobo pa Hende di Tur Nashon,” lo enkurashá nos pa alkansá hende di tur idioma ku e bon nobo.

E tema pa djasabra ta “Mira Bon Kon Boso Ta Kana.” Den e simposio di parti mainta, “Kana Progresivamente Komo Minister,” lo tin un parti ku ta duna mas sugerensia tokante kon pa alkansá hende ku ta papia otro idioma. E programa parti mainta ta konkluí ku e diskurso importante “Kana ku Yehova Segun Afsprak.” I despues di esei lo tin oportunidat pa personanan kualifiká batisá.

Djasabra atardi tin e diskursonan “Evitá Kualke Kousa di Tropieso,” i “Aktividatnan Sano Ku Ta Refreská.” Lo tin entrevistanan animador den e siguiente diskursonan: “Yehova Ta Nos Wardadó,” “Kumprando e Tempu Oportuno,” i “Kana den e Berea di Lus Ku Ta Bria Mas i Mas Kla.” E seshon aki lo konkluí ku e diskurso ku ta pone bo pensa: “‘Keda Vigilá’—E Ora di Huisio A Yega.”

Tema dje programa pa djadumingu ‘Sigui Kana den e Bèrdat,’ ta ser enfatisá den e diskurso “Hóbennan—Kana den e Kaminda di Hustisia.” Despues lo sigui e drama den pleno trahe i esenario antiguo ku ta trata e ministerio di apòstel Pablo. Despues di e drama lo tin un diskurso ku ta enfatisá e lèsnan ku nos por saka for di e drama. Parti atardi lo tin e diskurso públiko, “Kana ku Dios Ta Trese Bendishon Awor i pa Semper.”

Si bo ke sa kua ta e kongreso mas serka di bo, tuma kontakto ku e Salòn di Reino lokal di Testigunan di Yehova òf skirbi e publikadónan di e revista aki. Den e edishon di 1 di mart di nos revista kompañero, E Toren di Vigilansia, tin lista di tur e kongresonan ku lo tuma lugá na Antianan Hulandes i Aruba, i tambe algun di Hulanda.