Dikon Tin Asina Tantu Hende Solitario?

HOPI hende den nos sosiedat djawe ta eksperensiá soledat. E ta afektá hende di tur edat i di tur rasa, nivel sosial i religion. Abo a yega di sinti bo solitario? Bo ta sinti bo solitario na e momentu aki? Bon mirá, nos tur na un tempu òf otro a sinti e nesesidat di kompaño; e nesesidat di un hende pa skucha nos, pa trankilisá nos òf tal bes pa bai di akuerdo ku nos sintimentunan profundo òf ku loke nos ta pensa, i pa komprondé nos komo persona. Nos tin mester di un persona ku ta tene konsiderashon ku nos emoshonnan.

Pero e echo ku nos ta sin kompaño, no ta nifiká nesesariamente ku nos ta solitario. Un persona por ta su so pa un tempu largu, disfrutando di loke e ta hasi, sin sinti niun tiki soledat. Na kontraste, tin hende ku no por wanta pa ta nan so.

Soledat ta un emoshon fuerte, i e por ta masha doloroso. Bo ta sinti un bashí. Bo tin e sensashon di ta aislá, separá for di otro hende. Nos por bira emoshonalmente suak i haña miedu. Eskritora Judith Viorst aptamente a deskribié asin’aki: “Soledat ta pisa manera un piedra riba e kurason. . . . Soledat ta laga nos bashí i desesperá. Soledat ta laga nos sinti nos mes manera un yu sin mama, manera un lamchi ku a dual, asina chikitu i pèrdí den un mundu asina inmenso i desinteresá.” Abo a yega di sinti asina? Kiko ta kousa soledat?

 Problema-, situashon- i kondishonnan por afektá hende na diferente manera. Podisé bo ta sinti ku bo pareunan ta rechasá bo debí na bo aparensia, bo rasa òf religion. Kambio di ambiente—manera kuminsá na un skol òf trabou nobo, òf muda pa un bario, stat òf pais nobo—por pone bo sinti solitario pasobra bo tin ku bai laga amigunan bieu atras. Morto di un mayor òf di bo kasá por resultá den soledat, i kisas pa hopi aña. Tambe, segun ku nos ta bira bieu, nos sírkulo di amigu i konosí ta kambia, ta bira mas chikí òf ta disparsé.

Matrimonio no ta semper un garantia ku un hende lo no sinti soledat. Mal komprondementu entre e pareha òf falta di kompatibilidat kisas ta kousa tenshon ku por produsí insiguridat i por asta resultá ku e pareha i yunan ta isolá nan mes. Pero fuera di soledat kousá dor di morto di un ser kerí, divorsio òf isolashon físiko òf emoshonal, tin un otro tipo di soledat ku por afektá nos profundamente. Esaki ta surgi ora ku nos relashon ku Dios ta bai atras i nos ta sinti nos separá for di dje.

Abo a yega di eksperensiá kualke un di e situashonnan menshoná ariba? Ta posibel pa trata i superá soledat?

[Plachinan na página 4]

Kambionan den bida por kousa soledat, por ehèmpel, kuminsá na un skol nobo òf pèrdè bo kasá