E Dia Ku Ningun Hende Nunka Mas Lo Sinti Nan Solitario

E REGISTRO na Génesis 2:18 ta deklará ku despues di a krea e promé ser humano, Yehova Dios a bisa: “No ta bon pa e hòmber ta so; lo mi traha un yudadó p’e ku ta pas kuné.” Hende a ser kreá pa ta ku otro hende i pa dependé di nan.

E mihó Amigu ku nos por tin ta Yehova Dios. Apòstel Pablo a rekonosé Yehova komo “e Tata di miserikòrdianan i Dios di tur konsuelo, kende ta konsolá nos den tur nos aflikshon.” (2 Korintionan 1:3, 4) Yehova mes ta ekspresá tristesa pa e sufrimentu di su sirbidónan. E ta un Dios di kompashon. “E sa di kiko nos ta trahá; e ta kòrda ku ta stòf nos ta.” (Salmo 103:14) Bo no ta sinti bo atraé na Yehova Dios i bo no ta gradisidu pa su atenshon amoroso, bondadoso i komprensivo?

Yehova Ta Sostené Esnan Solitario

Den pasado hopi sirbidó di Dios a pasa den sirkunstansianan den kua nan a sinti nan solitario. Pa nan, Yehova tabata un fuente di sosten i konsuelo. Tuma por ehèmpel Jeremias, kende Dios a yama pa ta profeta tempu ku e tabata yòn. Entre e 40 eskritornan di e Skritura, Jeremias kisas ta esun ku mas a ekspresá su sintimentunan personal. El a sintié tímido i inadekuá ora ku el a haña su promé asignashon serka Dios. (Jeremias 1:6) Pa por a kumpli kuné, e mester a dependé plenamente riba Yehova. Di bèrdat Yehova tabata kuné “manera un guerero poderoso.”—Jeremias 1:18, 19; 20:11.

 Un 300 aña promé ku Jeremias, ora ku Reina Jezabel a tende ku a mata su profetanan di Baal, el a hura ku lo e laga mata Elias. Elias a hui 450 kilometer bai te na Horèb den e Península di Sinaí. Einan el a drenta den un kueba pa pasa anochi i Yehova Dios a puntr’é: “Kiko bo ta hasi akinan, Elias?” Elias a splika ku el a sinti ku e tabata e úniko adoradó di Yehova den henter Israel, e úniko profeta ku a keda ku tabata seloso pa e sirbishi di Dios. Yehova a garantis’é ku e no tabata su so. Yehova tabata kuné, i tabatin 7.000 israelita ku tambe tabata kuné, maske e no a konosé nan. Yehova a konsolá Elias i a edifiká su fe. El a touch Elias su kurason, i a enkurashá e profeta pa no bandoná su asignashon. (1 Reinan 19:4, 9-12, 15-18) Si un dia nos, meskos ku Elias, mester sinti nos solitario òf ku nos no ta bal nada, nos tambe por pidi Yehova pa fortalesa. Ademas, dor di usa disernimentu, ansianonan kristian por konsolá òf enkurashá rumannan fiel, i yuda nan mira nan papel den e realisashon di Dios su propósito.—1 Tesalonisensenan 5:14.

For di e ehèmpelnan aki i otronan mas, nos por komprondé ku Yehova ta dispuesto pa duna sosten i konsuelo amoroso na personanan ku ta sinti nan solitario. Sí, Yehova “lo ta un refugio pa e oprimínan, un refugio den tempunan di angustia.”—Salmo 9:9; 46:1; Nahum 1:7.

Un Hòmber ku Sintimentunan Profundo i Simpatia

Hesukristu meresé nos atmirashon pa su emoshonnan perfektamente balansá den imitashon di Yehova. Lukas ta deskribí Hesus su reakshon ora ku el a topa un proseshon di entiero den e stat di Nain: “Un morto tabata wòrdu hibá pa dera, e úniko yu hòmber di su mama . . . I ora Señor a mir’é, el a sinti kompashon p’e, i a bis’é: ‘No yora.’ I el a yega serka i a mishi ku e kaha di morto; i e kargadónan di morto a keda para. I el a bisa: ‘Hóben, mi ta bisa bo: Lanta!’ I e morto  a lanta sinta i a kuminsá papia. I Hesus a entreg’é bèk na su mama.” (Lukas 7:12-15) Hesus su emoshonnan tabata profundamente konmoví. E tabata un hòmber kompasivo. Imaginá bo kon felis Hesus a hasi e biuda solitario ora ku el a dun’é su yu bèk! Awor e biuda no tabata solitario mas.

Nos por tin sigur ku Hesus “por kompadesé di nos debilidatnan.” Definitivamente e ta sinti simpatia pa esnan rekto ku ta solitario i ta kompadesé di nan. De echo, mediante Hesus “nos [por] risibí miserikòrdia i haña grasia pa yuda den tempu di nesesidat.” (Hebreonan 4:15, 16) Dor di imitá Hesus nos por kultivá kompashon i simpatia pa hende ku ta den tristesa i ta sufri di aflikshon i soledat. Nos lo tin ménos chèns di ta solitario ora nos ta yuda otro hende. Pero tin un manera mas ku nos por haña yudansa pa superá e sintimentunan negativo di soledat.

E Palabra di Yehova Por Yuda Nos Superá Soledat

Hopi hende a ripará ku pa medio di e “enkurashamentu di Skrituranan nos por tin speransa.” E Palabra di Dios ta yen di konseho práktiko ku por yuda nos superá soledat. (Romanonan 15:4; Salmo 32:8) Por ehèmpel, e Palabra di Dios ta animá nos ‘pa no pensa mas haltu di nos mes ku nos mester pensa.’ (Romanonan 12:3) Pa apliká e konseho aki, kisas nos tin ku hasi ahuste den nos manera di pensa. Teniendo un punto di bista realístiko di nos limitashonnan, sigur lo yuda nos kultivá ekspektativanan balansá i rasonabel. Tambe e Palabra di Dios ta konsehá nos pa kultivá un interes personal sinsero den otro hende. (Filipensenan 2:4) Esaki ta un kaya di dos direkshon. Pasobra segun ku bo ta hasi esfuerso pa mustra interes den otro hende, abo lo risibí for di otro hende. E bon interkambio aki ku otro hende ta yuda aliviá e bashí ku nos ta sinti i ta duna nos bida propósito.

Beibel ta animá nos komo kristian pa ‘no laga di asistí na nos reunionnan.’ (Hebreonan 10:24, 25) P’esei partisipá den aktividatnan konstruktivo, por ehèmpel, asistí na e reunionnan di Testigunan di Yehova ku regularidat. Sin duda, reunionnan kristian por kontribuí na nos bienestar spiritual, emoshonal i físiko. Un dushi manera pa yena nos bida ku aktividat sano ta dor di papia ku otro hende tokante e bon notisia di e Reino di Dios. Esei ta yuda nos mente keda enfoká den e direkshon korekto, ta fortifiká nos fe i ta protehá nos speransa.—Efesionan 6:14-17.

Hala serka Yehova den orashon. David a animá nos: “Tira bo karga riba SEÑOR, i e lo sostené bo; nunka e lo no permití pa e hustu wòrdu moví.” (Salmo 55:22) Dor di studia e Palabra di Dios, lo bo sinti bo felis. (Salmo 1:1-3) Si sintimentunan di soledat gara bo, meditá riba Yehova su kuido amoroso ku ta ser revelá mediante su Palabra. E salmista a skirbi: “Mi alma ta pega duru na stòf; rebibá mi segun bo palabra.”—Salmo 119:25.

Tempu Ku Ningun Hende Lo Bisa: “Mi Ta Solitario”

Yehova Dios a primintí nos un mundu nobo kaminda lo no tin ansiedat, frustrashon ni sintimentunan negativo. Beibel ta deklará: “E lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.” (Revelashon 21:4) Sí, entre e kosnan ku lo a pasa ta e dolónan físiko, mental i emoshonal ku nos ta sinti awe.

Mundu lo ta yen di hende amigabel, ku lo enrikesé nos bida. Yehova mediante su Reino selestial den man di Hesukristu lo kura nos pa semper di nos soledat. Lo e duna nos kosnan nobo i maravioso pa hasi riba un tera kombertí den Paradeis. Pronto e dia lo yega ora ku nunka mas nos lo bisa: “Mi ta solitario.”

 [Plachi na página 8, 9]

Ku e sosten di Yehova, nos lo no sinti nos solitario, ni ora nos ta so

[Plachinan na página 10]

Kiko e relato bíbliko di Jeremias i Elias ta siña nos?