E Toren di Lònden—Monumento Históriko di un Pasado Turbulento

TOKA NA

E Toren di Lònden—Monumento Históriko di un Pasado Turbulento

DI UN ESKRITOR DI SPIÈRTA! NA GRAN BRETAÑA

SITUÁ prominentemente riba un seritu na oriya di Riu Thames na Ost Lònden tin un di e monumentonan mas famoso na mundu: e Toren di Lònden. Pa kasi mil aña, e gran fòrti, palasio i prizon aki a hunga un papel importante den e historia turbulento di Inglatera. Tabatin rei, reina, kortesano, klero, polítiko i hues ku a pasa dor di su portanan; algun a sali bèk den triunfo, otronan nunka mas hende a mira nan na bida. Dikon nan a traha e Toren, i ki susesonan dramátiko i emoshonante ku a tuma lugá paden di su murayanan a influensiá e rumbo di historia di Inglatera?

Fòrti di Kas Real

Despues ku Duke Willem di Normandia a invadí Inglatera na aña 1066, el a konstruí un seri di kastel pa intimidá e pueblo anglosahon hostil. E edifisio mas formidabel ku el a lanta tabata den stat di Lònden. Inisialmente el a traha e fòrti di palu, den e skina zùitost di e murayanan bieu di stat ku e romanonan a konstruí. Despues di poko tempu nan a remplasá e fòrti di palu pa un edifisio enorme di piedra, e Gran Toren. E edifisio tabata kasi firkant, i a midi 32 pa 36 meter. E tabatin un aparensia impreshonante, ya ku e tabata 27 meter haltu, i a hinka miedu den e habitantenan lokal. Un rei ku a bin mas despues a laga blanch’é, i el a bira konosí komo e Toren Blanku.

Otro reinan ku a bin despues a agregá torennan di vários tamaño, dos muraya masivo tur rònt i un kanal hundu di awa, i asina a hasié un di e fòrtinan mas impenetrabel di Europa. De echo, algun biaha monarkanan tabatin ku buska refugio tras di su murayanan pa skapa di nan súpditonan rebelde. Den tempu di guera sivil, e banda viktorioso tabata esun ku a gana kontròl di e Toren, ya ku nan a mir’é komo un símbolo di poder i outoridat. Den tempunan mas pasífiko, e Toren tabata e punto di salida di proseshonnan impreshonante riba dia di koronashon. Ora ku e rei tabata keda einan, e ku esnan ku a kompañ’é a biba den apartamentonan di palasio masha bunita dekorá, kaminda nan a entretené nan amigunan ku banketenan masha grandi. Sin embargo, enemigunan di rei a haña kompletamente un otro resepshon.

Prizon Estatal

E Toren tabata un prizon diferente, i ta konosí ku e promé prezu a biba den dje na aña 1100. E tabata reservá komo un prizon pa hende importante i di rango. Entre su detenidonan prominente tabatin reinan derotá di Eskosia i di Fransia i tambe miembronan di aristokrasia i di klero ku a bira impopular òf traidó. De bes en kuando tabatin ehekushon i asta asesinato. Nan a mata Henry VI den e Toren, i tambe Edward V di 12 aña i su ruman hòmber mas yòn.

Nan tabata akomodá prezunan na unda ku tabatin lugá i tabata sea restringí nan na sierto kuartonan i vigilá nan estriktamente òf tabata permití nan kana rònt den kurá di e kastel. Algun sentensia di prizon tabata kòrtiku, otronan largu. William Penn, kende despues a bira fundadó di e kolonia merikano Pennsylvania, tabata enkarselá pa ocho luna pa motibu di su kreensianan religioso. Despues di un derota den bataya, Charles, subrino di rei di Fransia i Duke di Orléans, a keda 25 aña detené—ku algun interupshon—te ora ku nan a paga un reskate masha grandi p’e. E kortesano, eksploradó i eskritor Sir Walter Raleigh a pasa 13 aña tristu skirbiendo su History of the World (Historia di Mundu) promé ku nan a libr’é temporalmente i despues a ehekut’é.

Ehekushonnan Ta Oumentá

E Toren su reputashon komo un lugá ku ta trata prezunan severamente, ta data realmente for di tempu di Reformashon. Henry VIII, desesperá pa haña un heredero hòmber, a kibra ku Iglesia Katóliko Romano i a kuminsá ehekutá hende ku a nenga di rekonosé é komo kabes di Iglesia Anglikano. Henry su di dos kasá, Anne Boleyn, no a logra dun’é un yu hòmber i a ser dekapitá den e Toren pa supuesto traishon i adulterio, huntu ku su ruman hòmber i kuater persona mas. Catherine Howard, Henry su di sinku kasá, tambe a ser dekapitá den e Toren. Ademas, hopi hende di noblesa ku tabatin sanger real, i pues tabata un menasa pa e trono, a ser enkarselá den e Toren i a muri sea dekapitá òf na palu di horka.

Ora ku Henry su yu yòn, e protestant Edward VI a bira rei, el a sigui ku e ehekushonnan kruel. El a muri den ménos ku seis aña i a ser siguí pa Henry su yu muhé, Mary, un katóliko romano seloso. Mary no a pèrdè tempu i a dekapitá Lady Jane Grey di 16 aña ku su kasá hóben, kendenan tabata simplemente marioneta den e lucha pa poder. Awor tabata tempu pa enemigunan protestant muri. Mary su mitar ruman Elizabeth a pasa hopi siman yen di angustia den e Toren promé ku el a ser librá, pero ora e mes a bira reina, el a enkarselá i ehekutá esnan ku a nenga di renunsiá nan fe katóliko òf ku a oponé su gobernashon.

Ounke míles di persona a ser enkarselá den e Toren, ta sinku muhé i dos hòmber so nan a dekapitá paden di su murayanan, pa skapa nan e bèrgwensa di un ehekushon públiko. Tres di e muhénan tabata reina: Anne Boleyn, Catherine Howard i Jane Grey, kende a reina apénas nuebe dia. Mayoria di e otro ehekushonnan—por lo general dekapitashon—a tuma lugá riba e seru djis pegá, Tower Hill, kaminda multitutnan masha grandi i desordená a para wak. E kabes kitá, nan a pone riba un staka na Brùg di Lònden komo un spièrtamentu pa otro hende, i e kurpa sin kabes nan a hiba bèk na e Toren pa der’é bou di e kapia. Ku tempu, mas ku 1.500 kadaver a keda derá einan.

Tabatin biaha ku nan a torturá prezunan pa haña un konfeshon, pero por lo general solamente ku pèrmit ofisial. Na aña 1605, Guy Fawkes, kende a purba bula e rei i Parlamento den e Konspirashon di Pòlbu, a ser torturá riba pijnbank di e Toren pa oblig’é revelá nòmber di su kómplisenan promé ku nan a ehekut’é.

Pa un tempu kòrtiku durante siglo 17, Inglatera i e Toren tabata bou di kontròl di Oliver Cromwell i e Parlamentarionan, pero despues ku nan a restorá Charles II riba trono, nan a manda ménos prezu na e Toren. Na aña 1747 nan a dekapitá e último hende riba Tower Hill, pero e papel di e Toren komo prizon estatal no a terminá. Durante promé guera mundial, nan a enkarselá 11 spion aleman einan i a ehekutá nan pa medio di un peloton di fusilamentu. Durante segundo guera mundial, e Toren pa un periodo kòrtiku tabatin prezunan di guera, entre nan, Rudolf Hess, kende tabata e di tres hòmber despues di Hitler. E último víktima ku a muri paden di su murayanan tabata e spion Joseph Jakobs, ku nan a tira mata na ougùstùs 1941.

Sòldánan di e Guardia Real i e Hoyanan di Kas Real

For di prinsipio di e Toren, tabatin bewaker pa vigilá tantu e prezunan komo e edifisionan. Pero e sòldánan òf bewakernan spesialmente selektá yamá yeoman warder ta data for di aña 1485. Den e tempunan ei prezunan hopi bes tabata yega via riu i a drenta e Toren via e Porta di Traidó. Ora e akusado tabata regresá for di su huisio, espektadornan tabata wak bon pa mira kon e bewaker (yeoman gaoler) ku a kompañ’é a tene su hacha. Si e blat di e hacha tabata den direkshon di e prezu esei a indiká un otro ehekushon.

Awendia e bewakernan ei ainda ta vigilá e Toren pero nan ta fungi komo guia bon-informá pa bishitante. Na okashonnan seremonial nan ta bisti nan unifòrm magnífiko estilo tudor, ku ta konsistí di un kamisa koló kòrá ku oro i un krag blanku steif forma di wil. Pero pa kumpli ku nan debernan normal nan ta bisti nan unifòrm blou ku kòrá estilo viktoriano. E bewakernan a bira popularmente konosí komo beefeaters (komedó di karni di baka), un beinam ku probablemente a kuminsá komo un palabra di menospresio durante tempu di hamber. Miéntras ku habitantenan di Lònden tabatin skarsedat di kuminda, e bewakernan di kas real semper tabata risibí un rashon di karni di baka pa hasi sigur ku nan ta keda fiel na e monarkia.

E bewaker di raf ta responsabel pa e rafnan grandi ku tin den e Toren. Segun superstishon, desaster lo bin riba Inglatera si un dia e paranan bandoná e Toren, p’esei nan ta kòrta ala di e rafnan.

Bewakernan di e Kas di Hoya ta protehá e famoso hoyanan di e kas real britániko, ku for di siglo 17 ta ser ekshibí na públiko. E djamanta kòrtá di alta kalidat i mas grandi na mundu, e djamanta Cullinan I, ta un di e piedranan presiosísimo den e koronanan, bolanan real i sèpternan ku ainda e famia real ta usa.

Parke di Bestia, Fábrika di Moneda i Arsenal

Na prinsipio di siglo 13, Rei John tabata kria leon den e Toren, pero e parke di bestia salbahe di kas real a kuminsá mes-mes ora ku su susesor, Henry III, a haña tres leopardo, un oso polar i un olefante serka soberanonan europeo. Ounke e bestianan tabata pa entretené e rei i su korte, henter Lònden por a disfrutá di e espektákulo ora ku e oso tabata bai landa den Riu Thames pa kohe piská, pero mará na un kabuya. Atraves di añanan a bini mas bestia eksótiko, i e parke di bestia salbahe tabata habrí pa públiko for di tempu di Reina Elizabeth den siglo 16. Nan a ser’é den dékada di 1830 ora ku a trasladá e bestianan pa e parke nobo di bestia ku nan a kaba di habri den Lònden na Regent’s Park.

Pa mas ku 500 aña, un sukursal grandi di e Kas Real di Moneda a operá paden di e kurá di e Toren. Un di su tempunan mas drùk tabata durante e reinado di Henry VIII, ora ku nan tabata traha moneda di e plata konfiská for di monasterionan ku nan a kaba di sera. Tambe e Toren tabata protehá registronan legal i estatal importante i a fabriká i warda ekipo militar pa rei i su ehérsito.

Un Rekuerdo di Pasado

Awe e Toren di Lònden ta un di e atrakshonnan turístiko di mas grandi di Gran Bretaña. Su aparensia a keda kasi meskos ku ántes, p’esei ora bo ta kana rònt di su torennan sombrio i shinishi i den su kayanan di piedra, bo no por keda sin kòrda riba e violensia, sufrimentu i tragedia humano ku a tuma lugá paden di e murayanan di e Toren atraves di siglonan. Tin un bon resúmen di su pasado turbulento na e sitio kaminda nan tabata dekapitá òf horka hende riba Tower Hill. Einan tin un plakat chikí ku ta konmemorá ‘e historia trágiko, i den hopi kaso e morto di martirio, di esnan ku pa motibu di nan fe, pais òf idealnan a riska nan bida i a pèrd’é.’

[Plachinan na página 13]

Anne Boleyn

Catherine Howard

Jane Grey

William Penn

[Rekonosementu]

Boleyn i Howard: For di e buki Heroes of the Reformation, 1904; Grey: For di e buki The World’s Famous Events; Penn: For di e buki The Library of Historic Characters and Famous Events, Vol. V, 1895

[Plachi na página 13]

Un apartamento di e toren ku despues nan a usa pa sera prezu

[Rekonosementu]

[Plachi na página 14]

E wardadó di prezu “yeoman gaoler”

[Rekonosementu]

[Plachi na página 15]

Algun di e hoyanan di kas real

[Rekonosementu]

[Plachi na página 15]

Un moneda di siglo 16 ku kara di Henry VIII

[Rekonosementu pa Potrèt na página 12]

SPIÈRTA!