For di Nos Lektornan

Perfekshonismo Mi ke yama boso danki pa e artíkulonan “Hóbennan Sa Puntra . . . Dikon Mi Ta Sinti Ku Mi Mester Ta Perfekto?” i “Kon Mi Por Stòp di Purba di Ta Perfekto?” (8 di ougùstùs 2003 i 8 di sèptèmber 2003) Mi opseshon pa hasi tur kos perfekto, a bira un peso ku mi no por a karga mas; e tabata kita tur mi goso. Dor ku mi tabatin miedu di hasi fout, mi tabata asta evitá di duna komentario na reunionnan kristian. Mi ta masha gradisidu na Yehova pa e artíkulonan aki. Nan ta yudando mi pa tene mi pensamentunan negativo bou di kontròl.

S. M., Italia

E artíkulonan ta nèt loke mi tabatin mester pa yuda mi trata ku un problema ku mi tabatin pa 50 aña largu. Mi a pensa ku no tin nada malu den purba di ta perfekto, mi úniko intenshon tabata pa duna Yehova lo mihó. P’esei, mi tabata puntra mi mes kon bin mi tabata haña asina tantu problema ku mi yunan, koleganan di trabou i rumannan kristian. Awor mi ta realisá ku tin bes mi manera di mira kosnan tabata desbalansá i no tabata kuadra ku Yehova su manera di pensa. Dor di ta “demasiado hustu,” mi a kousa problema pa mi mes i pa otronan. (Eklesiastés 7:16) Ounke lo no ta fásil pa mi vense e problema aki, ku yudansa di Yehova mi ta dispuesto pa purba.

C. H., Merka

Loke e artíkulo a bisa, esta, ku perfekshonismo por stroba un persona di logra sierto kosnan, ta bèrdat! Segun añanan tabata pasa mi tabata sinti mi frustrá pasobra mi no por a logra kosnan ku mi tabatin asina tantu gana di logra. I mi tabata puntra mi mes ta dikon. Relashoná ku e puntonan tokante amigu, mi por bisa ku den mi kaso hopi bes tabata parse ku ningun hende no tabata ke ta den mi kompania, pero mi no por a komprondé ta dikon. Awor mi sa ku mi tin un lucha largu i duru mi dilanti i ku Yehova lo yuda mi.

L. R., Merka

Mi tin hopi aña ta lucha ku e problema aki. Nunka mi no ta satisfecho ku loke mi ta hasi. Ta un gran alivio pa sa ku mi no ta e úniko persona ku ta lucha ku perfekshonismo.

A. B., Canada

Mi mente ta bisa mi ku ningun hende no ta perfekto, pero mi sintimentunan ta pusha mi pa buska perfekshon. Mi a sinti mi hopi animá ora mi a lesa ku Yehova no ta ferwagt perfekshon for di nos i ku loke ta di balor p’e ta loke tin den nos kurason. Mi ta masha gradisidu pa e artíkulonan aki.

S. K., Alemania

Miedu di faya hopi bes a stroba mi di tuma akshon. Mi a siña ku perfekshonismo ta kousa rabia króniko, pesimismo, depreshon i un falta di balor propio. Ainda mi no a resolvé mi problema kompletamente, pero awor mi sa ku mi ke desaroyá e abilidat di no tuma mi fayonan muchu na serio.

A. I., Hapon

Mi a sufri masha hopi mes di strès i ansiedat. Mi tabata rabia ku mi mes i bisa: “Mi no ta bal nada.” Boso artíkulonan a presentá un punto di bista práktiko i a duna mi un animashon kaluroso. E karga pisá ku mi tabatin na mi kurason, esta, e sintimentu ku mi mester ta perfekto, a bira mas leve. E tekstonan a yuda mi kambia mi aktitut i kultivá un punto di bista mas positivo.

M. N., Hapon