Kon pa Trata i Superá Soledat

NO TA fásil pa trata i superá soledat. Tin emoshonnan fuerte enbolbí. Kon un persona por trata ku soledat? Kiko algun hende a hasi pa superá e sintimentu fuerte aki?

Kon pa Enfrentá Soledat

Helen * ta gusta pa e ta so ora di tuma sierto desishonnan, pero e ta sinti ku soledat por ta peligroso. Tempu ku e tabata mucha, e no tabatin bon komunikashon ku su mayornan. Komo ku e no tabata sa kon pa haña nan atenshon, e tabata sera su mes den su kamber. E ta konta: “Mi a kuminsá haña problema ku komementu. Depreshon tabata aplastá mi. Mi tabata bisa mi mes: ‘Pakiko mi tin ku wòri ku e problemanan di mi mayornan ora ku nan sí no ta wòri ku di mi?’ Anto mi a kuminsá pensa ku matrimonio lo por a yena e bashí di mi soledat. Mi a buska matrimonio komo un eskape. Pero poko despues mi a kuminsá rasoná: ‘Pakiko mi tin ku daña bida di un otro persona? Promé, mi tin ku drecha mi propio manera di pensa!’ Mi a buska e yudansa di Yehova den orashon, i a deshogá tur mi angustia.

 Den Beibel mi a haña palabranan di gran konsuelo, manera esnan di Isaias 41:10: ‘No tene miedu, pasobra mi ta ku bo; no desmayá, pasobra mi ta bo Dios. Lo mi fortalesé bo, sí, lo mi yuda bo, sí, lo mi sostené bo ku mi man drechi di hustisia.’ E palabranan aki a yuda mi hopi pasobra mi tabata sinti komo si fuera mi no tabatin tata. Awor mi ta lesa Beibel regularmente i ta hasi orashon na mi Tata selestial. Mi a siña superá mi soledat.”

Morto di un ser kerí ta kousa tristesa, i esei por hiba na soledat. Luisa, ku tin 16 aña, a ekspresá su angustia: “Mi tata a muri tempu ku mi tabatin sinku aña. Mi a buska konsuelo serka mi wela, pero nunka mi a sinti ku e stima mi. Mi no a haña hopi kariño durante mi infansia, tempu ku mi tabatin mas mester di dje. Entre ocho pa nuebe aña di edat, mi a purba mata mi kurpa tres biaha. Mi a pensa ku esei lo tabata e mihó kos pa mi famia pasobra mi mama tabata lucha pa perkurá kuminda pa mi ku mi tres ruman muhénan. Despues nos a kuminsá asosiá ku Testigunan di Yehova. Un pareha kasá a mustra berdadero interes den mi. Nan tabata bisa mi: ‘Nos ta apresiá bo i nos tin mester di bo.’ E palabranan ‘nos tin mester di bo’ a duna mi hopi fortalesa. Tin biaha mi no por ekspresá mi sintimentunan na otro hende, pero ora mi lesa artíkulonan ku ta sali den E Toren di Vigilansia òf Spièrta! mi ta gradisí Yehova, pasobra mediante e publikashonnan aki mi a sinti su amor. Mi a hasi hopi kambio. Awor mi por smail, i mi por ekspresá mi tristesa òf alegria na mi mama. Tin biaha e rekuerdonan di pasado ta lanta kabes, pero no manera ántes tempu ku mi a purba mata mi kurpa òf tempu ku mi tabata stòp di papia ku mi sernan kerí. Semper mi ta kòrda loke e salmista David a bisa: ‘Pa motibu di mi rumannan i mi amigunan lo mi bisa awor: “Ku pas lo reina den bo.”’”—Salmo 122:8.

Martha tin 22 aña divorsiá, i durante e tempu ei el a kria un yu. E ta bisa: “Sintimentu di soledat i di no ta bal nada, sa lanta kabes ora ku mi pensa ku mi a faya den algu.” Kon e ta trata ku e sintimentunan aki? El a splika: “Mi a ripará ku e mihó manera pa trata ku nan ta dor di papia mesora ku Yehova Dios tokante nan. Ora mi hasi orashon, mi sa ku  mi no ta so. Yehova ta komprondé mi mihó ku ami ta komprondé mi mes. Tambe mi ta purba haña maneranan pa mustra interes personal den otro hende. Spesialmente mi sirbishi di prediká tempu kompletu ta un arma hopi potente kontra sintimentunan negativo. Ora bo ta papia ku otro hende tokante e bendishonnan di e Reino di Dios i bo ta realisá ku bo oyentenan no tin ningun klase di speransa i ta mira nan problemanan komo permanente, bo ta ripará ku bo tin motibunan fuerte pa kier keda na bida i sigui lucha.”

Elba, di 93 aña i kende su úniko yu ta sirbi komo misionero den un otro pais, ta konta tokante kon e ta trata ku soledat: “Ora ku mi yu muhé ku su kasá a risibí invitashon pa asistí na e Skol Bíbliko di Galaad di Watchtower, mi a mira nan karanan radiante di alegria, i mi a alegrá huntu ku nan. Despues, ora ku nan a haña asignashon pa sirbi den eksterior, mi a kuminsá sinti un poko egoista. Mi tabata sa ku lo mi no tin nan serka di mi mas, i mi a sinti un poko tristu. E situashon a parse mi meskos ku esun di Jefte ku su úniko yu muhé, deskribí den Huesnan kapítulo 11. Mi tabatin ku hasi orashon na Yehova ku awa na wowo, pidiend’e pordon. Mi yunan ta keda den kontakto ku mi. Mi sa ku nan ta hopi okupá, pero na unda ku nan ta sirbi, nan ta traha tempu pa tene mi na haltura i kompartí e eksperensianan ku nan tabatin den sirbishi di vèlt. Mi ta lesa nan kartanan bes tras bes. Ta komo si fuera nan ta papia ku mi tur siman, i mi ta masha gradisidu pa esei. Ademas, e ansianonan kristian den mi kongregashon ta duna e debido atenshon na nos ku ta di edat òf enfermo, i nan ta hasi sigur ku nos tin transpòrt pa bai e reunionnan di kongregashon i tambe nan ta perkurá pa otro nesesidatnan. Mi ta konsiderá mi rumannan spiritual komo un bendishon for di Yehova.”

Bo Tambe Por Trata i Superá Soledat

Sea ku bo ta hóben òf mas grandi, soltero òf kasá, un mucha ku tin su mayornan òf un huérfano i sea ku bo a pèrdè sernan kerí òf ta sintiendo kualke otro tipo di soledat, tin maneranan pa trata ku bo sintimentunan. Jocabed, un mucha muhé di 18 aña kende su tata a bandoná su kasá i su sinku yunan i bai biba den un otro pais, a bisa: “Papia! Ta importante pa nos ekspresá nos mes. Si nos no hasié, ningun hende lo no komprondé nos.” El a rekomendá: “Stòp di pensa muchu riba bo mes. Buska yudansa serka esnan maduro, no serka hóbennan ku kisas ta mas mal pará ku bo.” Luisa, menshoná anteriormente, a bisa: “Orashon sinsero na Yehova ta duna nos e yudansa ku nos mester pa sali for di loke bo por yama un kaya sin salida.” Jorge, kende su kasá a muri, a komentá riba e manera ku e ta trata ku soledat: “Bo mester persistí. Demostrá interes den otro hende a yuda mi hopi. Mustrando ‘kompashon’ ora nos ta kòmbersá ku otro hende por hasi nos kòmbersashon signifikativo i por yuda nos deskubrí e kualidatnan bunita ku otro hende tin.”—1 Pedro 3:8.

Nos por hasi hopi kos pa kombatí soledat. Pero lo yega un dia ku soledat lo pasa pa historia? Si ta asina, kon esei lo sosodé? E siguiente artíkulo lo kontestá e preguntanan aki.

[Nota]

[Komentario na página 8]

‘Orashon sinsero na Yehova ta duna nos e yudansa ku nos mester pa sali for di un kaya sin salida.’—Luisa

 [Kuadro/Plachinan na página 7]

Loke Bo Por Hasi pa Superá Soledat

▪ Keda kòrda ku bo por kambia bo situashon, ku e no ta permanente pero ku e ta un situashon ku otro hende tambe ta pasa aden.

▪ No eksigí demasiado di bo mes.

▪ Sinti bo en general satisfecho ku bo mes.

▪ Kultivá bon kustumber di kome i di hasi ehersisio, i drumi sufisiente.

▪ Usa e tempu ku bo ta bo so pa hasi kosnan kreativo i pa siña abilidatnan nobo.

▪ Tene kuidou pa no husga hende ku bo topa a base di bo eksperensianan di pasado.

▪ Apresiá bo amigunan i nan kualidatnan úniko. Hasi esfuerso pa forma un bon sírkulo di amigu. Pidi sugerensia serka personanan mas grandi i ku tin eksperensia.

▪ Hasi algu pa otro hende; smail ku nan, ekspresá un palabra bondadoso, kompartí un pensamentu for di Beibel ku nan. Sinti ku bo ta importante pa otro hende ta yuda bo kombatí soledat.

▪ No fantaser ku artistanan di sine òf di televishon òf ku personahenan di Internet òf di buki, i no imaginá ku bo tin un amistat ku nan.

▪ Si bo ta kasá, no ferwagt ku bo kasá lo satisfasé tur bo nesesidatnan emoshonal. Siña duna i tuma, i siña yuda i sostené otro.

▪ Siña papia ku otro hende i ser un bon skuchadó. Konsentrá riba otro hende i loke ta interesá nan. Mustra kompashon.

▪ Rekonosé ku bo ta sinti bo solitario, i papia ku un amigu òf amiga maduro, un persona ku bo ta konfia. No sufri den silensio.

▪ No bebe di mas, òf no bebe mes. Alkohòl no ta eliminá bo problemanan; ku tempu nan ta bolbe lanta kabes.

▪ Evitá orguyo. Pordoná esnan ku ofendé bo, i drecha e relashon. Sea dispuesto pa ta ménos deskonfiá di hende.

[Plachi na página 6]

Kon un persona por trata ku soledat?