E Punto di Bista Bíbliko

Preokupashon Ta Indiká un Falta di Fe?

“PREOKUPASHON TA PROHIBÍ.” Bou di e tema aki un pastor ku a biba na prinsipio di siglo 20 a skirbi ku preokupashon pa kosnan material no ta solamente malu, sino tambe “un piká grave.” Mas resientemente, un komentarista ku a skirbi tokante e tema di vense preokupashon a deklará: ‘Si nos ta preokupá esei ta nifiká ku nos no tin konfiansa den Dios.’

Den ámbos kaso e eskritornan a basa nan konklushonnan riba e Sermon Riba Seru di Hesus den kua el a bisa: “No preokupá.” (Mateo 6:25) Siendo ku hopi hende ta wòrdu afektá dor di preokupashon awe, nos lo por puntra: Un kristian mester sintié malu pasobra e ta preokupá? Preokupashon ta indiká un falta di fe?

Dios Ta Komprondé Nos Imperfekshonnan

Beibel no ta indiká ku tur preokupashon ta debí na falta di fe. Mirando ku nos ta biba den “tempunan trabahoso,” ta kasi imposibel pa ta kompletamente liber di preokupashon. (2 Timoteo 3:1) Kristiannan fiel ta trata ku preokupashon diario kousá dor di malesa, edat avansá, preshon ekonómiko, frikshon den famia, krímen i otro problemanan. Asta den tempu di antigwedat, e sirbidónan di Dios a sinti miedu i tabatin preokupashon.

Konsiderá e relato bíbliko di Lòt. Dios a dun’é instrukshon pa hui bai den e serunan p’e no wòrdu destruí huntu ku Sodoma i Gomora. Sin embargo, Lòt a kuminsá preokupá. El a bisa: “Ai nò, mi señornan [“Yehova,” NW]!” Yen di duda el a sigui: “Mi no por hui bai na e serunan, pa e kalamidat no alkansá mi i mi muri.” Dikon Lòt tabatin  miedu di bai den e serunan? Beibel no ta bisa. Sea kual sea e motibu, Lòt tabatin hopi miedu. Kon Dios a reakshoná? El a disipliná Lòt pasobra el a mustra falta di fe òf konfiansa den dje? Nò. Al kontrario, Yehova a tene konsiderashon ku Lòt i a permitié hui bai na un stat den serkania.—Génesis 19:18-22.

Tin mas ehèmpelnan bíbliko di adoradónan fiel ku a yega di bira masha preokupá. Ora nan a menasá profeta Elias ku morto, el a haña miedu i a hui. (1 Reinan 19:1-4) Moisés, Ana, David, Habakuk, Pablo i otro hòmber- i muhénan ku fe fuerte tambe a yega di manifestá ansiedat òf preokupashon. (Eksodo 4:10; 1 Samuel 1:6; Salmo 55:5; Habakuk 1:2, 3; 2 Korintionan 11:28) Apesar di esei, Dios a mustra kompashon i a sigui usa nan den su sirbishi, mustrando asina ku e ta komprondé hende imperfekto plenamente.

“Piká Ku Ta Mara Nos Asina Fásil”

Sin embargo, preokupashon kontinuo por debilitá nos fe i pone nos pèrdè nos konfiansa den Dios. Apòstel Pablo a referí na falta di fe komo “e piká ku ta mara nos asina fásil.” (Hebreonan 12:1) Dor di inkluí su mes, probablemente Pablo a atmití ku e mes tambe tin e tendensia di ser ‘mará fásil,’ esta, ku e sa tin momentunan den kua su fe ta débil.

Podisé esaki tabata e kaso ku Zakarias ora e no a kere e angel ku a bis’é ku su esposa lo a sali na estado. Tabatin un okashon ku Hesus su apòstelnan no por a kura un persona debí na nan “inkredulidat” òf poko fe. Tòg e personanan aki a sigui gosa di Dios su aprobashon.—Mateo 17:18-20; Lukas 1:18, 20, 67; Juan 17:26.

Di otro banda, den Beibel tin tambe ehèmpelnan di hendenan ku a pèrdè konfiansa den Dios i ku a sufri konsekuensianan serio. Por ehèmpel, hopi israelita ku a bandoná Egipto no a wòrdu permití pa drenta e Tera Primintí pa motibu di nan falta di fe. Na un okashon nan a papia asta direktamente kontra Dios. Nan a bisa: “Pakiko bo a saka nos for di Egipto pa muri den desierto? Pasobra no tin kuminda ni awa.” Dios a manda kolebra venenoso pa kastigá nan, mustrando asina ku e no tabata kontentu ku nan.—Numbernan 21:5, 6.

Dor ku e habitantenan di Hesus su stat natal, Názarèt, tabata falta fe, nan no tabatin e privilegio di mira Hesus efektuá mas milager den nan teritorio. Ademas, Hesus a kondená e generashon malbado dje tempu ei severamente pa motibu di nan falta di fe. (Mateo 13:58; 17:17; Hebreonan 3:19) P’esei ta na su lugá ku apòstel Pablo a duna e spièrtamentu ku ta bisa: “Tene kuidou, rumannan, pa no tin den ningun di boso un kurason malbado i inkrédulo [“ku ta falta fe,” NW], dor di alehá for di e Dios bibu.”—Hebreonan 3:12.

Sí, den kasonan ekstremo falta di fe por resultá den un kurason malbado. Pero esei no tabata e kaso ku Zakarias ni e apòstelnan di Hesus menshoná den e ehèmpelnan anterior. Nan falta di fe tabata pa motibu di un debilidat temporal. Por lo general nan estilo di bida a mustra ku nan tabata “di kurason puru.”—Mateo 5:8.

Dios Sa Kiko Nos Tin Mester

E Skritura ta yuda nos hasi distinshon entre preokupashon ku ta komun i e piká di falta di fe. Nos no mester konfundí e preokupashonnan diario òf asta un falta di fe temporal debí na debilidat humano ku un falta di fe kompletu den Dios ku ta ser kousá dor di un kurason malbado i indiferente. P’esei kristiannan no tin nodi sinti nan kontinuamente kulpabel djis pasobra de bes en kuando nan ta preokupá.

Sin embargo, nos mester tene kuidou sí pa nos no bai preokupá asina tantu te ku e sintimentu aki ta kuminsá dominá nos bida. P’esei e konseho di Hesus a reflehá sabiduria ora el a bisa: “No preokupá boso mes anto, bisando: ‘Kiko nos lo kome?’ òf ‘Kiko nos lo bebe?’ òf ‘Kiko nos lo bisti?’” I el a kontinuá ku e siguiente palabranan di konsuelo: “Boso Tata selestial sa ku boso tin mester di tur e kosnan aki. Ma buska promé e reino di Dios i Su hustisia, i tur e kosnan aki lo wòrdu añadí na boso.”—Mateo 6:25-33.

[Plachi na página 22]

Apòstel Pablo a eksperensiá ansiedat