Un Kara Nobo pa Mailyn

SEGUN E RELATO DI MAILYN SU MAMA

Dikon Mailyn, mi dushi yu muhé di 11 aña tabatin mester di un kara nobo? Laga mi splika bo.

Mailyn ta esun mas chikí di mi dos yu muhénan. El a nase na Holguín, Cuba, dia 5 di ougùstùs 1992. Ami ku su tata i su ruman muhé tabata masha kontentu ku su nasementu. Pero nos felisidat lo no a dura largu. Un par di dia despues ku el a nase, mi a haña sende-paga, i un luna despues, Mailyn a hañ’é.

Na prinsipio, su kondishon no a parse di ta dje serio ei; pero el a bira pió i mester a intern’é den hospital. Mailyn a haña bon atenshon médiko, pero su resistensia a bira asina suak ku el a haña un infekshon. Mi a ripará ku un banda di su nanishi chikí a bira un kòrá straño. E dòkternan a identifiká e kousa komo un tipo di bakteria ku rara bes bo sa mira pero masha agresivo.

Nan a dun’é antibiótika mesora, pero apesar di esei e bakteria den un par di dia a kuminsá destruí su kara. Pa ora ku e dòkternan a logra para e infekshon, Mailyn a pèrdè su nanishi i lepnan kasi kompletamente i parti di su ensia i kachete. Tambe e tabatin buraku banda di un di su wowonan.

Ora ami ku mi kasá a wak e, nos a grita yora. Kon un kos asina por a pasa ku nos yuchi? Mailyn a keda den kuido intensivo pa vários dia, i dòkternan a pensa ku lo e no a sobrebibí. Mi kasá tabata blo bisa mi: “Prepará bo pa lo pió.” Sin embargo, ora mi tabata hinka mi man den e couveuse pa tene Mailyn su man chikí, e tabata tene mi man asina duru ku mi tabata sa ku lo e sobrebibí. Mi tabata bisa mi kasá: “Nos yu no ta bai muri. Pero den su kondishon, ta ki sorto di bida Mailyn lo tin?” Tur mainta ora nos lanta, nos a pensa ku kisas tur esaki tabata simplemente un mal soño.

Miéntras ku nos tabata na hospital, nos yu muhé Maydelis, ku tabatin seis aña e tempu ei, a keda serka mi mayornan. E tabata spera ansiosamente pa su ruman chikí bin kas bèk. El a mira Mailyn sali kas manera un “pòpchi” bunita ku wowo blou grandi. Pero ora Maydelis a bolbe mira su ruman chikí, Mailyn su kara tabata monstruoso.

‘Dikon Mi Beibi Tin Ku Sufri Asina Tantu?’

Despues di un luna i mei den hospital, Mailyn por a bai kas. Nos no a bai bèk na nos kas den stat pasobra nos no tabata ke pa ningun hende mir’é. Nos a aislá nos mes den un kas chikí den kunuku, pegá ku e hasienda di mi mayornan.

Na prinsipio mi por a duna Mailyn lechi di pechu na kantidat chikí via e buraku den su kara kaminda ántes tabata su boka. E no por a chupa. Sin embargo, ora ku e heridanan a kuminsá kura, e buraku ei a sera kasi kompletamente. Mi por a dun’é solamente kuminda líkido na bòter. Ora e tabatin un aña, nos a bai bèk Holguín, kaminda dòkternan a hasi kuater operashon pa hancha e buraku.

Mi tabata puntra mi mes: ‘Dikon mi beibi tin ku sufri asina tantu?’ Mi a buska e kontesta den sentronan spiritista i a resa na mi imágennan religioso. Pero nada no a duna mi konsuelo. E komentarionan doloroso di algun famia i amigu a konfundí mi asta mas. Algun a bisa: “Dios sa pakiko e ta permití e kosnan aki.”  Otronan a bisa mi: “Sigur esaki ta un kastigu di Dios.” Tambe mi tabata preokupá hopi ta kiko lo mi bisa Mailyn ora ku e bira mas grandi. Un biaha, tempu ku Mailyn tabata hopi chikí ainda, el a puntra su tata: “Dikon ami no tin nanishi meskos ku tur hende?” Su tata no por a kontestá i a sali pafó bai yora. Ami a purba splik’é kiko a pasa. Te ainda e ta kòrda ku mi tabata bis’é ku ta un bestia chikititu a kome su nanishi ku su boka.

Un Base pa Speransa

Nèt ora ku mi tabata sinti mi totalmente frustrá, mi a kòrda ku mi bisiña tabata un Testigu di Yehova. Mi a puntr’é pa mustra mi den Beibel dikon Dios a permití mi yuchi sufri asina tantu. Tambe mi a puntr’é: “Si e malesa aki realmente ta un kastigu di Dios pa algu ku mi a hasi, dikon ta Mailyn tin ku paga e kastigu?”

Mi bisiña a kuminsá studia Beibel ku mi, usando e buki Bo por biba pa semper den Paradijs riba tera. * Pokopoko, mi a kuminsá komprondé ku nos no tin ku kulpa Dios pa loke a sosodé ku Mailyn i ku Dios realmente ta interesá den nos. (Santiago 1:13; 1 Pedro 5:7) Mi a kuminsá apresiá e speransa maravioso ku bou di e gobernashon di Dios su Reino selestial den man di Hesukristu, sufrimentu lo ser eliminá. (Mateo 6:9, 10; Revelashon 21:3, 4) E konosementu aki a fortalesé mi i a motivá mi pa asistí na e reunionnan kristian di Testigunan di Yehova. Na promé instante, mi kasá no a gusta mi interes spiritual nobo. Sin embargo, e no a stòp mi di studia Beibel, tanten ku esei a yuda mi soportá nos tragedia.

Yudansa for di Eksterior

Ora ku Mailyn tabatin dos aña, un siruhano plástiko prominente di Mexico a tende di su kaso i a ofresé pa trat’é grátis. Na 1994, el a hasi e promé operashonnan. Ami ku Mailyn a keda Mexico kasi un aña. Na prinsipio nos no por a drenta den kontakto ku Testigunan di Yehova, i p’esei nos no por a asistí na reunionnan kristian. Esaki a debilitá mi spiritualmente. Despues, un Testigu lokal a tuma kontakto ku nos, i nos a kuminsá asosiá atrobe mas tantu posibel ku e rumannan den fe. Ora mi a regresá Cuba, mi a reanudá mi studio di Beibel i a rekuperá spiritualmente.

Mi kasá na e tempu ei ainda no tabata interesá den Beibel. Den un intento pa lanta su interes, mi a kuminsá pidié lesa sierto partinan pa mi for di publikashonnan basá riba Beibel ya asina mi por a komprondé nan mihó. Ku tempu el a ser motivá pa aseptá un studio di Beibel, pasobra e tabata preokupá ku e biahenan  largu i frekuente pa Mexico, lo por a daña nos relashon familiar. El a pensa ku si nos ta kompartí e mesun interesnan spiritual, esei lo a yuda nos soportá e periodonan di separashon mas mihó. I en bèrdat esei a yuda nos. Ami ku mi kasá i mi yu muhé mayó a batisá komo Testigu di Yehova na 1997.

Durante nos promé estadianan na Mexico, Mailyn tabata bisa ku si e bestia chikititu no a kome su kara, nos lo no mester a bai laga su tata ku su ruman muhé. Tabata masha doloroso ku e famia mester a biba leu for di otro pa periodonan largu asina. Sin embargo, mi ta kòrda foral un bishita ku nos a hasi na e sukursal di Testigunan di Yehova na Mexico, yamá Bètel, i ku a animá nos masha hopi. Mailyn tabata blo bisa ku e no ke pa nan bolbe oper’é—pa di sinku biaha durante e estadia ei—pasobra e periodo di rekuperashon tabata hopi doloroso. Pero algun Testigu ku tabata sirbi na e sukursal a bis’é ku si e mustra kurashi i laga e dòkternan oper’é, nan lo tene un fiesta p’e ora e sali for di hospital. Asina el a bai di akuerdo ku e operashon.

Laga Mailyn deskribí kon el a sinti: “Mi tabata masha emoshoná ku e idea di un fiesta na Bètel. P’esei mi a mustra hopi kurashi durante operashon. E fiesta tabata emoshonante, ku masha hopi ruman hòmber i ruman muhé. Nan a duna mi hopi karchi, i te ainda mi tin nan. E animashon ku mi a haña a duna mi e forsa pa wanta e siguiente operashonnan.”

Progreso i Yudansa pa Perseverá

Mailyn, ku awor tin 11 aña, a hasi 20 operashon pa rekonstruí su kara. Ounke nan a yud’é hopi, ainda e no por habri su boka kompletamente. Sin embargo, semper e tabatin un aktitut optimista i di kurashi. Tambe el a demostrá hopi apresio pa kosnan spiritual. For di ora ku e tabatin seis aña, el a inskribí den e Skol di Ministerio Teokrátiko na nos kongregashon lokal, i el a batisá dia 27 di aprel 2003. Un tempu e tabata kondusí asta tres studio. Un biaha, tempu ku nos tabata na Mexico, el a papia ku un kabayero ku a bai di akuerdo pa Mailyn studia kuné. Mailyn a invit’é na Konmemorashon di e morto di Kristu i na otro reunionnan di kongregashon, i el a asistí na nan ku hopi interes.

Ora ku Mailyn ta prediká di kas pa kas, tin hende sa wak su kara i puntr’é si ta kima el a kima. Mailyn ta probechá di e oportunidat pa kompartí ku nan su speransa bíbliko ku Yehova lo dun’é un kara nobo den e Paradeis binidero.—Lukas 23:43.

Mi no tin palabra pa deskribí e doló ku Mailyn a sufri dor di e operashonnan i dor ku muchanan ta tent’é. Kiko a yud’é perseverá? Mailyn ta kontestá ku un siguransa: “Yehova ta masha real pa mi. E ta duna mi e forsa i kurashi pa perseverá. Mi no ke hasi mas operashon pasobra dòkternan no por hasi hopi pa mi aworakí. Nunka nan lo no por hasi mi kara manera e tabata ora ku mi a nase. Pero mi sa ku Yehova ta bai duna mi un kara nobo den e mundu nobo i lo mi ta bunita atrobe.”

[Nota]

[Komentario na página 26]

“Yehova ta bai duna mi un kara nobo den e mundu nobo”

[Komentario na página 27]

Pokopoko, mi a kuminsá komprondé ku nos no tin ku kulpa Dios