For di Nos Lektornan

Komunikashon Mi tin ku skirbi boso tokante e seri di artíkulo “Komunikashon Ta Vital pa Bida.” (8 di òktober 2003) Nan a deskribí e patronchi ku bo por mira den henter kreashon: kriaturanan ta yuda otro. Asta mata ta manda señal pa spièrta otro pa bestia ku ta kome nan! Lo ta maravioso ora ku hende tambe siña yuda otro.

C. C., Merka

Mi a gusta masha hopi e deskripshon ku boso a duna di e manera ku bestia ta komuniká ku otro. Nos no por yega na ningun otro konklushon ku no ta esaki: tin un Dios ku ta e fuente di tur e kosnan maravioso aki.

R. Z., Alemania

Mi no tin palabra pa ekspresá e goso ku mi a sinti segun ku mi a lesa e artíkulonan ei. Ki un privilegio inkreibel nos tin di por komuniká ku Dios!

A. W., Suráfrika

Awe mainta ora ku mi a kuminsá lesa e artíkulo mi tabata hopi down. Pero mi mester a hari ora mi a lesa e informashon tokante e manera ku insektonan ta komuniká ku otro! Mi a sali bai trabou ku un sonrisa riba mi kara.

L. L., Fransia

Tatú Masha danki pa e artíkulo “Hóbennan Sa Puntra . . . Mi Mester Pone Tatú?” (8 di òktober 2003) Ami tabata ègt pensa ku tatú ta great i mi kier a plak un tatú temporal. Sin embargo, e deklarashon ku nos lo no kier marka nos kurpa “ni sikiera temporalmente” ku kosnan ku ta desonrá Dios, a dal mi duru. Ora mi a pensa kon un tatú lo por pone otro hende trompeká i por laga nan mira mi komo rebelde, mi a disidí pa no hasié.

A. K., Hapon

Mi tabatin hopi gana di pone un tatú. Pero e artíkulo aki a yuda mi realisá ku podisé lo mi bai lamentá esei despues. Tambe boso a menshoná e peligernan pa salú, lokual ta algu ku mi no a pensa ariba. Masha danki pa un artíkulo asina konvinsente.

D. T., Fransia

Piñata Mi a lesa ku interes e artíkulo “Piñata—Un Tradishon Bieu.” (8 di òktober 2003) Despues di a les’é, mi a keda ku algun pregunta. Piñata su konekshon ku religion falsu ta bon dokumentá. Pero e artíkulo ta manera indiká ku tanten ku uso di piñata no ta molestiá un hende su konsenshi, e por dal bai kuné numa. Ta meskos ta konta pa kumpleaño i dianan di fiesta manera Pasku?

S. W., Merka

“Spièrta!” ta kontestá: Kristiannan ta rechasá kualke selebrashon òf kustumber ku aktualmente ta konektá ku kreensianan religioso falsu òf ku aktividatnan ku ta violá prinsipionan bíbliko. Por ehèmpel, Beibel definitivamente ta konsiderá selebrashon di kumpleaño komo inaseptabel. (Génesis 40:20; Mateo 14:6-10) Sin embargo, si ta masha kla ku un kustumber aktualmente no tin ningun nifikashon religioso falsu konektá kuné i no ta violá prinsipionan bíbliko, ta keda na kada kristian pa disidí personalmente si lo e sigui tal kustumber.

Moda Mi ke ekspresá mi apresio pa e seri di artíkulo “Bo Ta Katibu di Moda?” (8 di sèptèmber 2003) Komo tiner, mi ta sinti e preshon di mundu pa kumpra loke ta e último gritu di moda i pa mantené e figura “perfekto.” Pero e artíkulonan aki a yuda mi kambia mi manera di kumpra kos i pa bisti mas moderá.

M. B., Merka

Mi tin dies aña, i mi yùfrou di skol a pidi nos trese informashon tokante moda. Mi a bai ku un kopia di e artíkulo “E Banda Skur di Enkanto Físiko.” Yùfrou a saka kopia di e artíkulo pa henter klas!

G., Bèlgika