E Punto di Bista Bíbliko

Kiko Ke Men Ser e Kabes di Kas?

SEGUN Beibel, “e hòmber ta e kabes di e muhé.” (1 Korintionan 11:3; Efesionan 5:23) Pero hopi hende ku ta bisa ku nan tin rèspèt pa Beibel, ta haña ku e prinsipio aki di hefatura, esta, ku e hòmber ta kabes, no solamente ta ouderwets sino tambe peligroso. Un pareha a komentá: “E doktrina ku hende muhé mester ‘someté nan mes kordialmente’ [na nan esposo], por hiba na abusu físiko i tambe emoshonal si aplik’é na un manera ekstremo.” Lamentablemente, maluso di e prinsipio di hefatura ta tuma lugá tur kaminda. Segun un eskritor: “Den hopi pais hende ta konsiderá batimentu di muhé komo komportashon aseptabel; un derecho maskulino ku ta ser elogiá den kansion, den dicho i den seremonianan di kasamentu.”

Tin hende ta bisa ku ta e prinsipio bíbliko di hefatura ta responsabel pa e trato òf komportashon kruel i violento aki. Pero Beibel su siñansa di hefatura ta degradá hende muhé i enkurashá violensia doméstiko? Kiko realmente ke men ser e kabes di kas? *

Hefatura No Ta Diktadura

E prinsipio bíbliko di hefatura ta un areglo amoroso i di ningun manera ta igual ku diktadura. Al kontrario, ta falta di rèspèt pa outoridat  establesé dor di Dios a resultá den hòmber su dominashon hopi bes violento di hende muhé. (Génesis 3:16) For di despues ku hende a wòrdu saká for di hòfi di Edén, hòmber ku frekuensia a abusá di nan poder i kruelmente a probechá di otro hende, inkluso di hende muhé i mucha.

Sin embargo, esei no tabata nunka parti di Dios su propósito. Yehova ta odia hende ku ta abusá di nan outoridat. El a kondená e hòmbernan israelita ku ‘a trata nan esposanan ku traishon.’ (Malakias 2:13-16) Ademas, Dios ta bisa ku “esun ku ta gusta violensia Su alma ta odia.” (Salmo 11:5) Pues, hòmber ku ta bati muhé i otro abusadónan di ningun manera por usa Beibel pa hustifiká nan aktonan violento.

Kua Ta e Manera Korekto pa Ehersé Hefatura?

E prinsipio di hefatura ta un areglo básiko ku Dios ta usa pa mantené órden den universo. Tur persona—ku eksepshon di Dios—tin ku rindi kuenta na un otro persona. Hòmber ta sometí na Kristu, yu ta sometí na nan mayornan, i tur kristian ta sometí na gobièrnu. Asta Hesus ta sometí na Dios.—Romanonan 13:1; 1 Korintionan 11:3; 15:28; Efesionan 6:1.

Pa por tin un sosiedat ordená i stabil ta nesesario pa hende someté nan mes na liderato. Di igual manera, sumishon na un kabes di kas ta masha importante pa krea un famia sólido, felis i trankil. E echo aki no ta kambia, ni maske no tin un esposo òf tata den e famia. Den famianan asina, e mama ta bira e kabes di kas. Ora ku un famia no tin ni mama ni tata, e yu mayó òf un otro pariente kisas ta tuma e papel di kabes di kas. Den tur kaso, miembronan di famia ta benefisiá ora nan ta demostrá e debido rèspèt na esun outorisá pa hiba delantera.

Pues anto, e faktor importante no ta pa rechasá e prinsipio di hefatura, sino mas bien, pa siña ehersé i komprondé hefatura korektamente. Apòstel Pablo a konsehá esposonan kristian pa nan ta kabes di nan famia “meskos ku Kristu tambe ta kabes di e iglesia.” (Efesionan 5:21-23) Asina Pablo a indiká ku e manera ku Kristu a trata ku e kongregashon ta e norma perfekto pa hefatura. Ki ehèmpel Kristu a pone?

Ounke Hesus, komo Mesias i futuro Rei, tabatin outoridat di Dios i tabata hopi mas inteligente i eksperensiá den bida ku su disipelnan, tòg e tabata amoroso, tierno i kompasivo. Nunka e no tabata brutu, infleksibel òf demasiado eksigente. E no a ehersé su outoridat na un manera dominante ni kòrda tur hende konstantemente ku ta é tabata e Yu di Dios. Hesus tabata humilde di kurason. Komo resultado, ‘su yugo tabata suave i su karga tabata lihé.’ (Mateo 11:28-30) P’esei, Hesus tabata amigabel, fásil pa papia kuné i habrí pa rasoná. De echo, Pablo a bisa ku Hesus a stima e kongregashon asina tantu ku el “a entregá su mes p’e.”—Efesionan 5:25.

Kon un Persona Por Imitá Hesus Su Hefatura?

Kon kabesnan di famia por imitá e kualidatnan di Kristu? Un kabes responsabel ta mustra interes den e bienestar físiko i spiritual di su famia. E ta traha duru pa dediká e debido tempu i atenshon na nan nesesidatnan individual i di henter e famia. E interesnan di su kasá i yunan ta bini promé ku su propio interes. * (1 Korintionan 10:24; Filipensenan 2:4) Dor di apliká prinsipio- i siñansanan bíbliko den su bida diario, e esposo ta gana e rèspèt i sosten di su kasá i yunan. Bou di e esposo su hefatura amoroso, nan esfuersonan uní pa konfrontá kualke problema lo por tin éksito. Dor di ehersé su hefatura den un manera bíbliko, e esposo ta krea un famia felis, unu ku ta funshoná pa e gloria i alabansa di Dios.

Un kabes di kas sabí ta humilde tambe. Ora ta nesesario, e ta pidi despensa libremente, maske kisas ta difísil p’e atmití ku e tabata robes. Beibel ta bisa ku tin viktoria “den un multitut di konseheronan.” (Proverbionan 24:6) Sí, humildat lo motivá un kabes di kas tambe pa skucha i buska di buena gana e opinion di su kasá i yunan ora ku ta apropiá. Dor di imitá Hesus, un kabes kristian lo hasi sigur ku su hefatura no solamente ta trese felisidat i siguridat pa su famia, sino tambe ta onra i glorifiká e Originadó di famia, Yehova Dios.—Efesionan 3:14, 15.

[Nota]

[Plachi na página 26]

Un esposo rasonabel ta tuma opinion di su kasá i yunan na kuenta