Lo Bo Ke Purba Flor di Pampuna?

DI UN ESKRITOR DI SPIÈRTA! NA MEXICO

ORA ku e vários tipo di matanan di pampuna ta floria, nan ta laga un hòfi di bèrdura parse mas un hardin di flor. E bunita flor hel—di un diseño simpel i elegante—no tin fragansia, pero definitivamente e ta pone nos boka kore awa. Akaso nos ke men ku hende ta ègt kome flor? Sí. De echo, segun e revista Cuadernos de Nutrición, nos por bisa ku Mexico ta e pais ku tin e kantidat mas grandi di reseta ku ta usa flor komo ingrediente.

Pa loke ta flor di pampuna, ya pa hopi siglo nan ta kom’é na Mexico. Di e hopi variedatnan di pampuna ku tin, e flor di zucchini (un tipo di pampuna) ta esun mas usá pa kuminda. Pero nos tin ku sòru usa solamente e flornan machu si nos ke haña zucchini mes tambe. Nos ta djis wak e stèngel di e flor. Si nos mira un zucchini chikí na dje esei ta nifiká ku e ta un flor hembra i ta mihó pa nos no kit’é.

E sabor suave di e flor di pampuna ta kombiná bon ku un variedat di plato. Hopi bes, nos ta hasa un poko konofló ku siboyo i kisas tambe poko promèntè. Ora ku tur esaki ta sasoná i e konofló a bira moli, nos ta agregá un poko di e flornan labá i kòrtá chikí-chikí i sin nan stèngel. Kaba nos ta tapa e meskla i lag’é kushiná riba kandela abou pa un par di minüt. Tambe bo por agregá huntu ku e flornan, zucchini kòrtá na blòki, pipita di maishi tierno, un poko manteka i yerbanan aromátiko. Nos ta pone e meskla aki riba un tortiya kurú i dobl’é. Kaba nos ta laga e tortiya kushiná riba kasuela, i asina nos ta haña un sabroso quesadilla di flor di pampuna.

Nos quesadilla no solamente ta smak bon sino tambe ta nutritivo, ya ku flor di pampuna ta kontené kantidatnan chikí di proteina, kalsio, heru, tiamina, niasina, vitamina C i vitamina A.

Tambe nos ta traha un dushi sòpi ku e flor aki. Simplemente nos ta sigui e prosedura menshoná ariba, agregá poko buyon, anto sirbié kayente. Nos por dekor’é ku un tiki keshi i pidanan di tortiya hasá.

Tin hopi plato mas ku bo por prepará ku e flor útil aki. Pues, pakiko bo no ta krea un plato di flor di pampuna? Lo bo gust’é sigur!