Midiendo Tera ku un Pida Palu

BO A yega di tende di Eratóstenes, un matemátiko i astrónomo griego? Su nòmber probablemente ta mas konosí serka astrónomonan. Dikon e ta asina bon mirá serka nan?

Eratóstenes a nase rònt di aña 276 promé ku nos era i a haña parti di su edukashon na Atenas, Gresia. Sin embargo, el a pasa un gran parti di su bida na Alexandria, Egipto, ku e tempu ei tabata bou di mando di Gresia. Rònt di aña 200 promé ku nos era, Eratóstenes a kuminsá averiguá e tamaño di e tera dor di usa un simpel palu. Kisas bo ta bisa: ‘Esei ta imposibel!’ Wèl, kon el a hasié?

Den e stat Sevene (yamá awor Aswan), Eratóstenes a opservá ku 12 or di mèrdia riba e promé dia di zomer, solo tabata stret ariba. E tabata sa esaki pasobra ora rayo di solo yega den fondo di posnan hundu e no tabata tira sombra. Sin embargo, 12 or di mèrdia riba e mesun dia den e stat di Alexandria, ku tabata keda 5.000 stadion * pa nort di Sevene, sí bo por a mira sombra. Esaki a duna Eratóstenes un idea.

Eratóstenes a usa un simpel palu règt ku el a pone para vertikal. Ora ku 12 or di mèrdia solo tabata stret ariba, el a midi e ángulo di e sombra ku e palu a tira na Alexandria. El a determiná ku e ángulo tabata 7,2 grado for di vertikal.

Wèl, Eratóstenes tabata kere ku mundu ta rondó, i e tabata sa ku tin 360 grado den un sírkulo. P’esei el a dividí 360 dor di e ángulo di 7,2 ku el a midi. E resultado? E ángulo tabata un 50 parti (0,02) di un sírkulo kompletu. Anto el a yega na e konklushon ku e distansia for di Sevene pa Alexandria—ku tabata 5.000 stadion—mester ta igual ku un 50 parti di e sirkunferensia òf omtrek di mundu. Dor di multipliká 50 ku 5.000, Eratóstenes a yega na e sifra di 250.000 stadion komo e omtrek di mundu.

Kon serka e sifra ei tabata di kalkulashonnan aktual? E sifra di 250.000 stadion ta igual na entre 40.000 pa 46.000 kilometer segun nos midínan aktual. Astrónomonan, usando navenan espasial, a midi e omtrek di e tera di Polo norte pa Polo sur i a yega na 40.008 kilometer. Pues, mas ku 2.000 aña pasá, Eratóstenes a yega asombrosamente serka di e sifra moderno. Su eksaktitut ta mas remarkabel ainda ora bo pensa ku e hòmber a usa solamente un pida palu i rasonamentu geométriko! Awe astrónomonan ta usa e método geométriko aki komo base pa midi distansianan pafó di nos sistema solar.

Tin hende ta haña ku ta spesialmente remarkabel ku Eratóstenes tabata sa ku mundu ta rondó. Kon ku bai bin, te ku un par di shen aña pasá, asta algun hòmber sabí den siensia tabata kere ku tera ta plat. E griegonan di antigwedat a dedusí ki forma mundu tin a base di nan opservashonnan sientífiko. Sin embargo, rònt di 500 aña promé ku Eratóstenes, un profeta hebreo a skirbi bou di inspirashon: “Ta E [Dios] ta sinta mas ariba di e sírkulo di tera.” (Isaias 40:22) Isaias no tabata un sientífiko. Kon e por a sa ku tera ta rondó? Inspirashon divino a revelá e bèrdat aki na dje.

[Nota]

[Diagram na página 16]

(Pa e teksto den su formato kompleto, wak e publikashon)

Rayo di solo

Sevene

7,2°

Alexandria

7,2°