“Tene Kuenta ku e Dios Ku A Krea Bo”

“Tene kuenta ku e Dios ku a krea bo, awor ku bo ta yòn. Un dia dianan i añanan malu ta bini ku lo bo bisa: ‘Mi no por gosa mas di bida.’”—Predikador [Eklesiastés] 12:1, “BPK.”

E PASASHI di Beibel sitá ariba ta pone un hende para pensa un ratu. Ta un biaha so bo ta yòn. Mas despues, lo bo reflekshoná riba bo añanan di adolesensia, sea kontentu i satisfecho òf ku hopi duele i doló. Kua di nan dos lo ta abo su situashon? Kon bo por guia e resultado?

Manera ta sitá ariba, Beibel ta urgi bo pa “tene kuenta ku e Dios ku a krea bo.” Kon bo por hasi esei? Dor di pega na Dios su lei- i prinsipionan, ku ta pará skirbí den su Palabra, Beibel. Nò, esaki no ke men ku bo tin ku hiba un bida severo di fanatismo religioso, nengando bo mes tur plaser. Al kontrario, teniendo kuenta ku bo Kreadó lo duna bo e mayor felisidat posibel. Kon por ta?

Un ehèmpel. Imaginá ku un hende a duna bo un outo i un reibeweis. Bo tin bo dilanti un libertat nobo i emoshonante, un libertat ku por duna bo hopi plaser. Djis pensa riba tur e lugánan ku bo por bai! Sin embargo, e libertat nobo ku bo a haña ta kompañá pa un responsabilidat serio. Segun ku bo ta kore outo, bo tin ku obedesé e reglanan di tráfiko i paga tinu na lus di tráfiko, na límite di velosidat i na bòrchi di spièrtamentu. Akaso e responsabilidat aki ta stroba bo di gosa di kore outo? Nò! De echo, e ta sirbi komo un protekshon. Un aksidente no ta nada dushi, tòg?

Ta meskos ta konta ku e libertat ku bo Kreadó, Yehova Dios, a duna bo. Segun ku bo ta krese bira adulto, e ta laga bo skohe kon lo bo usa bo bida. (Deuteronomio 30:19; Proverbionan 27:11) Esei ta un privilegio ekstraordinario! Pero e libertat ei ta kompañá pa responsabilidat serio. Den su Palabra, Yehova a deskribí ‘reglanan di tráfiko,’ es desir, normanan ku e ke pa bo kumpli kuné. E normanan aki ta stroba bo felisidat? Definitivamente ku nò! Mas bien, nan ta protehá bo di e tristesa i doló ku asina tantu hóben ta haña nan kuné awe.

 Federico, ku awor tin 30’i piku aña, sa ku esaki ta bèrdat. Komo hóben, el a mira su kompañeronan di skol partisipá den tur tipo di aktividat ku e tabata sa ku e mester evitá. El a bisa: “Tabata parse manera ku nan tabata pasa hopi bon, pero nunka mi a pensa ku nan tabata ègt felis.” Mirando bèk riba su hubentut, Federico ta kontentu ku e tabatin e normanan di Beibel pa gui’é atraves di adolesensia. El a bisa: “Klaru ku meskos ku kualke hóben, mi tambe tabatin problemanan pa lucha kuné. Pero Beibel di bèrdat a protehá mi. I semper tabatin un òf otro ruman kristian na man pa yuda mi. Dor di a sigui prinsipionan bíbliko mi a haña mas felisidat di loke hamas mi a imaginá!”

Yehova Dios ke pa bo ta felis, realmente felis. Esaki ta enserá mas ku djis un aparensia superfisial di ta kontentu, pero ku en realidat ta skonde e echo ku bo ta sinti bo malu di paden. Beibel ta deklará: “Gosa di bo hubentut, gosa tanten bo ta hóben ainda.” Pero e mesun versíkulo ei di Beibel ta agregá un spièrtamentu. E ta bisa: “Pero kòrda sí ku bo mester duna kuenta na Dios.”—Predikador 11:9, BPK.

Kòrda riba bo Kreadó i tene kuenta kuné dor di hasi uso sabí di e libertat ku el a duna bo. Si bo hasi esei, bo por tin sigur ku bo Kreadó lo tene kuenta ku abo i lo duna bo e mayor felisidat posibel. Beibel ta deklará: “Ta e bendishon di SEÑOR ta hasi riku, i e no ta agregá tristesa na dje.”—Proverbionan 10:22.

Pa yuda hóbennan enfrentá e difikultatnan di adolesensia, Testigunan di Yehova a publiká un buki di 320 página titulá Loke hovenan sa puntra—Contesta práctica. Te ku awor nan a imprimí kasi 34 mion ehemplar di e buki aki na 77 idioma. Bo por haña unu dor di tuma kontakto ku Testigunan di Yehova den bo bisindario.

[Plachinan na página 8, 9]

Pa Yuda Bo pa Bo Por Tin Éksito Komo Adolesente

Tuma tempu pa lesa e Palabra di Dios

Traha duru den sirbishi di vèlt

Evitá mal kompania

Mantené bon komunikashon ku bo mayornan

[Rekonosementu]

Kaft di e foyeto: Pictorial Archive (Near Eastern History) Est.