Bo A Yega di Mira un Palma di Stet?

DI UN ESKRITOR DI SPIÈRTA! NA PERÚ

PALMA DI STET ta un tipo di palma ku ta krese na algun parti di mundu. E tin un aparensia masha pekuliar. E promé rais di e palma ta stòp di krese despues ku e alkansá sierto tamaño, miéntras ku e restu di e palu mes ta sigui krese. P’esei, e tronkon ta saka mas rais, ku ta baha bai na tera i ta duna e impreshon ku nan ta sirbi komo stet pa e palu.

Palma di stet no ta djis un palu interesante. E ta duna refugio na bestia chikitu ku ta skonde entre su raisnan. Hende tambe ta benefisiá di dje. Den algun pais e habitantenan ta usa e palu pa traha kas, inkluso e flur, i nan ta usa e blachinan pa traha dak di kabaña, basora i makutu. Kisas algun hende ku ta biba leu for di selvanan di yobida tropikal a yega di usa un garoti elegante òf a yega di kana riba un flur duradero trahá di e palu di palma di stet, ku bunita patronchinan di koló skur.

Meskos ku hopi palma, palma di stet tambe ta un fuente di alimento. Mayoria tin un ‘kurason’ komibel i ku ta smak bon. Lamentablemente, segun ku e demanda pa e spesialidat eksótiko aki ta krese, hende ta kap algun tipo di palma djis pa haña e kurason, esta, e parti paden suave i delisioso, lagando e restu di e palu plamá riba suela.

[Plachinan na página 31]

Palma di stet ta fuente di hopi produkto útil