E Punto di Bista Bíbliko

Dios Ta Realmente Interesá den Mucha?

MIÓNES i miónes di mucha ta sufri di abusu, maltrato i atake violento tur aña. Hopi di nan ta traha práktikamente komo katibu den kondishonnan peligroso. Otronan ta ser sekuestrá i fòrsá pa bira sòldá òf prostituta. Insesto i otro aktonan horendo di maltrato di mucha tambe a traishoná e konfiansa di hopi di nan.

Klaru ku e trouma ku muchanan ta pasa aden awe ta molestiá hende sinsero ku sí tin interes di mucha na pechu. Ounke algun ta atmití ku e kousa prinsipal pa e maltrato ei ta golosidat i degenerashon humano, tòg nan ta haña ku ta duru pa aseptá ku un Dios di amor ta permití e inhustisia ei. Nan ta haña ku Dios a bandoná e muchanan aki i ku kisas e no ta realmente interesá den nan. Esei ta e kaso? E echo lamentabel ku otro hende ta abusá di mucha i konstantemente ta maltratá nan ta nifiká ku Dios no ta interesá den nan? Kiko Beibel ta bisa?

Dios Ta Kondená Hende Ku Ta Maltratá Mucha

Nunka tabata e propósito di Yehova Dios pa mucha sufri na man di hende grandi sin eskrúpulo. Maltrato di mucha ta un di e konsekuensianan mas lamentabel di e rebelion di humanidat den e hòfi di Edén. E rechaso ei di e soberania di Dios a habri kaminda pa hende abusá di su próhimo.—Génesis 3:11-13, 16; Eklesiastés 8:9.

 Dios ta odia hende ku ta probechá di esnan débil i indefenso. Hopi nashon di antigwedat ku no tabata sirbi Yehova tabata sakrifiká mucha na dios falsu, pero Yehova a bisa ku esaki no ta ‘loke el a ordená, ni bin den su pensamentu.’ (Jeremias 7:31) Dios a spièrta su pueblo di antigwedat: “Si di un òf otro manera bo afligié [e huérfano], i e sklama na mi, lo mi tende su sklamashon sigur; i mi rabia lo sende.”—Eksodo 22:22-24.

Yehova Stima Mucha

E interes di Dios den mucha ta bisto den e instrukshonnan sabí ku e ta duna mayornan humano. Muchanan ku a ser lantá den un ambiente sano na kas tin mas chèns di bira adultonan maduro, bon desaroyá. P’esei, nos Kreadó a instituí matrimonio, un areglo di bida largu pa kua “un hòmber lo bandoná su tata i su mama i lo uni ku su esposa. I nan lo bira ún karni.” (Génesis 2:24) Segun Beibel, ta pareha kasá so tin mag di tene relashon seksual; e yunan ku nase e ora ei por ser lantá den un ambiente stabil.—Hebreonan 13:4.

Ademas, e Skritura ta enfatisá e importansia pa mayornan eduká nan yunan. Beibel ta bisa: “Yunan ta un herensia di SEÑOR; e fruta di barika ta un rekompensa. Manera flecha den man di un guerero, asina ta e yunan hañá den un hende su hubentut.” (Salmo 127:3, 4) Yunan ta un regalo presioso di Dios, i e ke pa bai bon ku nan. Dios ta hasi un apelashon fuerte na mayornan pa duna nan yunan un bon guia den bida, meskos ku un tiradó di flecha ta mek bon promé ku e tira. E Palabra di Dios ta duna e instrukshon: “Tatanan, no provoká boso yunan na rabia, ma lanta nan den e disiplina i instrukshon di Señor.”—Efesionan 6:4.

Un otro manera den kua Yehova a mustra su amor pa mucha ta dor di siña mayornan pa protehá nan yunan kontra hende sin eskrúpulo. Den Israel di antigwedat, asta “mucha” mester a skucha ora e Lei a ser lesá, pasobra e Lei a inkluí reglanan di kondukta seksual apropiá i loke ta inapropiá. (Deuteronomio 31:12; Levítiko 18:6-24) Dios ke pa mayornan hasi tur loke ta posibel pa protehá nan yunan kontra hende ku lo por abusá di nan òf maltratá nan.

Un Speransa pa Mucha

Hesukristu, kende ta un refleho perfekto di e personalidat di su Tata, a demostrá den un manera maravioso e amor duradero ku Yehova tin pa mucha. (Juan 5:19) Ora su apòstelnan, pensando ku ta yuda nan tabata yuda Hesus, a nenga di laga mayornan trese nan yunan chikitu p’e, Hesus a keda indigná ku nan i a korigí nan. El a bisa nan: “Laga e muchanan bin serka mi.” Anto “el a tuma nan den su brasa i a bendishoná nan.” (Marko 10:13-16) Mucha no ta insignifikante den bista di Yehova Dios ni den bista di su Yu.

De echo, pa medio di su Rei nombrá, Hesukristu, pronto Dios lo intervení pa aliviá muchanan ku ta sufri maltrato. Lo e eliminá hende golos sin eskrúpulo ku ta abusá di mucha i ku ta maltratá nan. (Salmo 37:10, 11) Pa loke ta e humildenan ku ta buska Yehova, Beibel ta bisa: “E lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.”—Revelashon 21:3, 4.

Miéntras tantu, for di aworakí Dios ta mustra su amor dor di ofresé yudansa spiritual i emoshonal na tur persona ku ta sufri di abusu i maltrato. E ta primintí: “Lo mi buska esnan ku ta pèrdí, trese bèk esnan ku tabata dual, pone verbant pa esnan ku ta heridá, i fortifiká esnan ku ta malu.” (Ezekiel 34:16) Pa medio di su Palabra, su spiritu santu i e kongregashon kristian, Yehova ta konsolá muchanan ku ta sufri di opreshon i pobresa. Ta un goso en bèrdat pa sa ku awor, meskos ku den futuro, “e Tata di miserikòrdianan i Dios di tur konsuelo, . . . ta konsolá nos den tur nos aflikshon.”—2 Korintionan 1:3, 4. 

[Rekonosementu pa Potrèt na página 26]

© Potrètnan di Mikkel Ostergaard/Panos