Kon pa Protehá Bo Mes Kontra Froude

KISAS bo a yega di tende hende bisa ku ta masha fásil pa nèk un hende onrado. Pero meskos ku hopi dicho, esaki pa un parti ta bèrdat. Tur dia hende onrado ta bira víktima di froude òf estafa; ser onrado so no ta protehá nan. Ta algun di e mentenan di mas sabí na mundu ta sinta inventá i efektuá plannan mañoso pa kita plaka for di hende. Mas ku shen aña pasá un eskritor a remarká: “Tin algun froude ta asina bon hinká den otro, ku bo mester ta bobo pa nan nò gaña bo.”

Engaño ta eksistí for di hopi tempu, i ta data for di den hòfi di Edén. (Génesis 3:1-5) Tin hopi variashon di plannan mañoso bieu, i tur ora hende ta trama plannan nobo. Pues, kon bo por defendé bo mes? Bo no tin nodi bai siña tur e maneranan ku kriminalnan ta usa pa estafá hende. Un par di prekoushon básiko mes lo ta masha útil pa protehá bo di bira víktima.

Protehá Informashon Personal

Si un persona hòrta bo chèkbuk òf tarheta di krédito, e por kumpra kos ku nan. Si e hòrta informashon tokante bo kuenta bankario i e tin sufisiente informashon personal di bo, e por asumí bo identidat i pretendé di ta abo. Unabes un kriminal hasi esaki, e por lanta plaka for di bo kuenta bankario, paga kos dor di karga bo kuenta di tarheta di krédito, i haña fiansa riba  bo nòmber. * Polis por asta arestá bo pa krímennan ku bo no a kometé!

Pa protehá bo mes kontra e tipo di froude aki, bo mester ta kuidadoso ku tur dokumento personal, entre otro, bo statementnan di banko i chèkbuk, reibeweis i sédula. No duna informashon personal òf finansiero na otro hende, a ménos ku tin un motibu legítimo pakiko nan mester tin e informashon ei. Esaki ta konta spesialmente pa number di tarheta di krédito i informashon di kuenta bankario. E úniko biaha ku bo mester duna un hende bo number di tarheta di krédito ta ora bo ke kumpra algu kuné.

Tin estafadó ku ta koba den ko’i sushi en buska di tal informashon. En bes di djis benta papelnan ku ta kontené datonan personal afó, ta sabí pa kima nan òf sker nan na pida-pida. Esaki ta konta tambe pa chèk usá, statementnan di banko i di bolsa di balor, i tambe tarhetanan di krédito bieu, reibeweis bieu i pasport bieu. Ta sabí tambe pa destruí solisitutnan pa tarheta di krédito ku bo no a pidi pero ku ta bin via pòst, ya ku esakinan ta kontené informashon personal di bo ku un otro hende lo por hasi mal uso di dje.

Usa Sano Huisio

E base di hopi froude ta e promesa di haña ganashinan irealístikamente haltu for di un invershon. Un trampa komun estilo di bira-riku-lihé ta e sistema di piramit. Ounke tin hopi vershon di e trampa aki, e strategia normal ta ku hende ku ta invertí den dje mester buska otro invershonista, i nan ta risibí un komishon pa esei. * Kettingbrief òf kadena di karta tambe ta funshoná den e mesun manera dor ku e karta ta pidi bo pa manda plaka pa hende na kabes di un lista. Nan ta primintí bo ku ora bo nòmber yega na kabes di e lista, abo lo risibí míles di florin.

Sistemanan di piramit semper ta kai den otro pasobra ta imposibel pa sigui haña miembro nobo. Konsiderá e siguiente kalkulashon. Si sinku hende kuminsá ku un piramit i kada un buska sinku hende mas, e kantidat di hende nobo ta bira 25. Si nan, na nan turno, buska 5 hende, esei lo ta 125 miembro mas. Ora e buskamentu di miembro nobo yega na e di nuebe nivel, lo tin kasi dos mion hende ku lo tin ku buska mas ku nuebe mion miembro nobo! Promotornan di piramit sa masha bon ku na dado momentu no por bin mas hende nobo aserka. Ora ku nan ta sospechá ku e punto ei ta  serka di yega, nan ta kue tur e plaka i baha na awa. Abo probablemente lo pèrdè bo plaka, i e hendenan ku bo a buska lo purba awor pa rekuperá nan plaka for di abo. Kòrda, pa abo gana plaka den e sistema di piramit, un otro hende tin ku pèrdè plaka.

Tin un persona ta ofresé bo pa gana plaka fásil òf pa haña ganashi inmenso a kambio di un invershon? Ata un palabra di koutela: Si un oferta ta parse muchu bon pa ta bèrdat, por lo general ta asina mes. No sea muchu lihé pa kere loke propaganda ta bisa ni e “testimonionan” di klientenan satisfecho, pensando ku “e kaso aki sí ta diferente.” Kòrda ku hende no ta den negoshi pa parti plaka pòrnada òf pa kompartí sekreto pa hasi abo riku. Si un hende ta pretendé ku e sa sierto kosnan ku lo yuda bo gana un fortuna, puntra bo mes: ‘Dikon e no ta usa e informashon ei pa enrikesé su mes? Dikon e ta pèrdè su tempu pa purba bend’é ku ami?’

Kiko si nan bisa bo ku bo a gana un rifa òf un premio? No bira muchu entusiasmá, e por ta un trampa, unu ku a perhudiká hopi hende kaba. Por ehèmpel, un señora na Inglatera a risibí un karta for di Canada ku a bis’é ku el a gana un premio pero ku e mester manda un suma di 45 florin pa prosesá e premio. Despues ku el a manda e plaka, el a haña un yamada telefóniko for di Canada ku a bis’é ku el a gana e di tres premio den un rifa na balor di 441.000 florin, pero ku e mester paga un porsentahe di e suma ei pa sigui prosesá e premio. E señora a manda 4.410 florin i no a haña nada a kambio. Si bo tin ku paga pa un “regalo grátis” òf pa un premio, esei ta un trampa. Puntra bo mes: ‘Kuantu chèns tin ku lo mi a gana un premio den un rifa den kua mi no a inskribí?’

Hasi Negoshi Solamente ku Hende di Bon Reputashon

Bo ta kere ku bo por ripará ku hende ta desonesto? Tene kuidou! Estafadónan sa kon pa gana hende su konfiansa. Nan ta masha bon den pone nan víktimanan konfia nan. Un bendedó, sea e ta onesto òf desonesto, sa ku promé ku e por bende bo un produkto, e tin ku bende su mes, es desir, e tin ku konvensé bo pa konfi’é. Klaru ku esaki no ke men ku bo mester deskonfiá tur hende, pero un midí saludabel di deskonfiansa ta importante pa bo por defendé bo mes kontra froude. En bes di purba saka afó si un hende ta konfiabel a base di loke bo instinto ta bisa bo, sea alerta pa dos indikashon  bon kla ku ta karakterisá hopi proyekto froudulento: Na promé lugá, e oferta ta parse muchu bon pa ta bèrdat? I na di dos lugá, e bendedó ta purba preshoná bo pa tuma un desishon purá?

Riba Internet bo ta haña kantidat di oferta ku ta muchu bon pa ta bèrdat. Ounke Internet ta ofresé hopi produkto i servisio balioso, e ta hasi posibel tambe ku kriminalnan por estafá nan víktimanan den un forma rápido i anónimo. Bo tin E-mail? Wèl si ta asina, kisas bo ta hañando spam, es desir, E-mail di propaganda ku bo no a pidi p’e. Ounke spam ta ofresé un variedat sinfin di produkto i servisio, hopi di esakinan ta froudulento. Si bo reakshoná riba un di e E-mailnan ei ku nan a manda pa bo sin ku bo a pidi p’e, dor di manda plaka pa risibí un produkto òf servisio, probablemente lo bo no haña nada bèk. Den kaso ku bo haña algu mes, kasi sigur lo e no ta bal e plaka ku bo a paga p’e. E mihó konseho ta: Nunka kumpra algu for di un persona ku ta manda E-mail di propaganda ku bo no a pidi p’e.

Esaki ta apliká tambe na hende ku ta bèl bo pa bende bo algu, loke nan ta yama telemarketing. Ounke hopi di e kompanianan ku ta promové benta di nan produkto via di telefon ta legítimo, tur aña telemarketing ta estafá míles di miónes di florin for di hende. Ta imposibel pa sa si e promoshon ta legítimo dor di djis papia ku un hende ku a bèl bo na telefon. Un estafadó por asta pretendé di ta un representante di banko òf di un agensia di protekshon di tarheta di krédito. Bo tin motibu pa ta deskonfiá si un persona ta bèl bo i pretendé di ta di un banko òf un kompania kaminda bo tin un kuenta, i ta pidi bo informashon ku nan lo mester tin kaba den nan fail. Si esei sosodé ku bo, lo bo por pidi e persona su number di telefon, anto bèl e bèk despues ku bo a konfirmá ku e number ei realmente ta di e banko òf agensia.

Un bon kustumber ta pa no duna number di bo tarheta di krédito ni ningun otro informashon personal na un hende deskonosí ku bèl bo. Si un hende bèl bo pa bende bo algu ku bo no ke, bo por bis’é kortesmente: “Despensa, pero mi no ta hasi negoshi na telefon ku hende ku mi no konosé.” Anto sera e telefon. No tin motibu pa bo sigui ku un kòmbersashon indeseá ku un hende deskonosí ku kisas ta purba estafá bo.

Trata solamente ku kompania i hende di bon reputashon. Tin hopi kompania legítimo ku kua bo por hasi negoshi sin problema na telefon òf via Internet. Si ta posibel, buska informashon tokante e bendedó, e kompania i e invershon mediante un agensia òf organisashon independiente. Pidi informashon tokante e invershon, i les’é kuidadosamente pa hasi sigur ku e ta legítimo. No laga hende pura bo òf preshoná bo pa tuma un desishon rápido.

Pon’é Riba Papel

No ta tur estafa ta kuminsá komo estafa. Un negoshi onesto por bai malu. Ora esei sosodé, e hendenan na kabes kisas por drenta den pániko i rekurí na medidanan froudulento pa rekuperá  nan pèrdida. Kasi sigur bo a tende historia di ehekutivonan ku a gaña tokante e entrada i ganashi di nan kompania, i ora ku e kompania a bati bankrut nan a baha na awa ku e plaka ku a resta.

Pa protehá bo mes kontra froude i mal komprondementu, bo mester optené riba papel e detayenan di kualke invershon grandi promé ku bo tuma un desishon. Tur kontrakt ku bo firma mester tin den dje tur e kondishonnan di e invershon i e promesanan hasí. Bo mester ta konsiente tambe di e echo ku sin importá kon konfiabel un invershon por parse, no tin un hende ku por garantisá ku tur kos lo bai manera a plania. (Eklesiastés 9:11) Kon ku bai bin, no ta eksistí invershon ku ta kompletamente sin riesgo. Pues, mester tin un kontrakt por eskrito ku ta spesifiká kiko ta e debernan i responsabilidatnan di kada persona den kaso ku e negoshi bai fayit.

Bo tin ménos chèns di bira víktima di froude si bo ta konsiente di e prinsipionan básiko aki ku nos a konsiderá brevemente i ta apliká nan. Un antiguo proverbio bíbliko ta duna konseho balioso. E ta bisa: “E hende simpel ta kere tur kos, ma e hòmber prudente ta wak bon unda e ta bai.” (Proverbionan 14:15) Un estafadó ta skohe personanan sin eksperensia, hende ku ta inkliná na kere tur loke e bisa. Lamentablemente, tin hopi hende ku no ta tuma prekoushon kontra froude i estafa.

[Nota]

[Komentario na página 7]

Si un oferta ta parse muchu bon pa ta bèrdat, por lo general ta asina mes

[Kuadro/Plachi na página 6]

Konseho pa Víktimanan di Froude

Normalmente víktimanan di froude ta sinti nan mes masha kulpabel, yen di bèrgwensa i rabiá ku nan mes. No kulpa bo mes. Bo ta un víktima; e kulpa ta sinta serka e persona ku a kue bo kabes abou. Si bo a hasi un fout, atmití esei na bo mes, anto sigui ku bo bida. No konkluí ku bo ta bobo. Kòrda ku estafadónan ta logra estafá hende masha inteligente: kabesnan di Estado, managernan di banko, ehekutivonan, managernan finansiero, abogadonan i otro hende.

Estafadónan ta kita no solamente plaka òf poseshon for di víktimanan di froude, sino tambe nan konfiansa i balor propio. Ora un “amigu” estafá bo, esei ta un traishon di bo konfiansa. Ta un kos doloroso ora nan estafá bo. Duna bo mes tempu pa pena. Hopi bes ta bon pa papia tokante e asuntu ku un persona di konfiansa. Orashon tambe por duna hopi konsuelo. (Filipensenan 4:6-8) Pero, rekonosé ku na dado momentu bo tin ku pone e asuntu un banda i sigui padilanti. Pakiko prolongá bo sufrimentu? Pone metanan positivo, i traha pa alkansá nan.

Tene kuidou ku trampanan pa rekuperá e plaka ku bo a pèrdè. Estafadónan sa bèl personanan ku nan a estafá, pa ofresé nan yudansa pa rekuperá nan plaka. Nan meta ta pa bolbe estafá e persona.

[Kuadro/Plachi na página 8, 9]

 Trampa di Spam Seis Trampa Komun Via E-mail

1. Piramit: Hopi bes nan ta presentá komo oportunidatnan pa traha hopi plaka sin ku bo tin ku invertí muchu plaka i trabou. Tin un sistema di piramit ku ta ofresé bo un kòmpiuter òf kualke otro artíkulo elektróniko si bo paga pa djòin un klup i despues buska mas partisipante. Un otro variashon ta e kettingbrief òf kadena di karta. Kadena di karta kasi semper ta ilegal. Mayoria hende ku invertí den nan ta pèrdè nan plaka.

2. Plannan mañoso ku ta duna bo oportunidat pa traha na kas: Tin un forma di e trampa aki ku ta ofresé bo e oportunidat di arma kosnan manera hoya, ko’i hunga òf pakete di obra di man. Bo ta invertí plaka den e material i dediká tempu na arma e produkto, anto na final bo ta tende ku e promotornan no por kumpra bo produkto pasobra e no ta kumpli ku nan norma di kalidat.

3. Trampanan di salú i dieta: Riba Internet bo ta haña kantidat di oferta di kosnan manera píldora ku ta yuda bo pèrdè peso sin ku bo tin ku hasi ehersisio òf tene dieta, kura pa impotensia i kremanan ku ta stòp kabei di kai. E ofertanan aki tin biaha ta ser kompañá pa testimonio di klientenan satisfecho. Frasenan komun ku ta bin dilanti den e propagandanan aki ta entre otro “gran avanse sientífiko,” “kura milagroso,” “fórmula sekreto” i “ingrediente antiguo.” Echo ta ku mayoria di e produktonan aki no ta hasi nada.

4. Oportunidatnan pa invertí sèn: E trampanan aki típikamente ta ofresé porsentahenan haltu di ganashi ku masha tiki òf ningun riesgo. Un vershon komun ta pa invertí den un banko offshore. Nan ta atraé invershonista ku e garantia ku e hendenan ku ta manehá nan plaka tin konekshonnan finansiero ku personanan den puesto haltu i tambe informashon konfidensial.

5. Yudansa pa mehorá e evaluashon di bo krédito: E trampanan aki ta ofresé pa kita informashon negativo for di bo registro di krédito ya asina bo por bin na remarke pa un tarheta di krédito, un fiansa pa outo òf un trabou. Apesar di e garantianan ei, e promotornan no por hasi loke nan ta primintí.

6. Promoshon di premionan di fakansi: Bo ta haña un E-mail ku ta felisitá bo pasobra bo a gana e chèns di gosa di un fakansi na un preis super barata. Tin di e promoshonnan ta bisa ku nan a skohe abo spesialmente. No lubidá ku e mesun anunsio ta bai pa miónes di hende i ku e akomodashon ku bo haña lo ta di kalidat hopi mas inferior di loke nan ta hasi propaganda p’e.

[Rekonosementu]

Fuente: U.S. Federal Trade Commission

[Plachi na página 7]

Sistema di piramit semper ta kai den otro

[Plachi na página 9]

Tur kontrakt ku bo firma mester tin den dje tur e kondishonnan di e invershon i e promesanan hasí