Ora Preokupashon ku Aparensia Bira un Opseshon

ORA mayoria di nos wak nos mes den spil, nos ta mira algun kos na nos kurpa ku nos ta haña ku lo por ta mihó. Pues, nos ta drecha nos paña òf nos kabei òf nos ta usa un poko make-up i despues ta sigui ku nos rutina di dia. E preokupashon ei ku nos aparensia ta normal i na su lugá. Pero pa algun persona, preokupashon ku nan aparensia ta bai den ekstremo, lokual ta kousa un kondishon ku na ingles nan ta yama body dysmorphic disorder, òf BDD.

E buki The Merck Manual of Diagnosis and Therapy (Merck Su Manual di Diagnósis i Terapia) ta definí BDD komo “demasiado preokupashon ku un defekto den aparensia, lokual ta kousa hopi angustia òf ta pone un hende alehá for di aktividatnan sosial, ta interferí ku su empleo òf ku otro áreanan importante di funshonamentu.” * Komo ku hende ku ta sufri di e malesa aki kisas ta imaginá nan mes ku nan tin sierto defekto òf nan ta eksagerá un defekto chikí, nan ta kere ku nan ta masha mahos.

Profèser J. Kevin Thompson di Universidat di South Florida, Merka, a bisa ku BDD ta un malesa poko komun, “ku kisas ta afektá entre 1,0-2,0% di e poblashon general i 10-15% di pashèntnan sikiátriko ku no ta interná den instituto.” Sin embargo, Thompson a agregá: “Algun investigadó ta kere ku e kantidat di kasonan ta oumentando, segun ku métodonan di diagnostiká ta bira mas bon den detektá e problema i segun ku sosiedat ta bira mas i mas opseshoná ku aparensia.” Ounke e kondishon por afektá hende di tur edat, por lo general e ta kuminsá den e periodo di teenager. Pa loke ta trata adultonan, parse ku e malesa ta afektá mes tantu hende hòmber komo hende muhé. Esaki ta un kontraste skèrpi ku trastornonan di kome, ku ta hopi mas komun serka hende muhé.

 E opseshon perhudisial aki ku aparensia, ku ta un síntoma típiko di hende ku BDD, normalmente ta pone ku nan ta kontrolá nan mes ku masha hopi frekuensia den spil, i den algun kaso, ta hiba asta na isolashon sosial. Pió ainda, e “angustia i mal funshonamentu asosiá ku e trastorno por pone ku mester interná e personanan kada bes den hospital i por hiba tambe na komportashon suisida,” segun Merck Manual. No ta un sorpresa ku algun hende ku ta sufri di e opseshon aki ta purba hasi sirugia plástiko. Dr. Katherine Phillips, kende a skirbi un buki tokante BDD, a bisa: “Por lo general mi no ta rekomendá sirugia plástiko. Sirugia ta un kos permanente, i generalmente mayoria hende ku BDD ta haña ku tòg e sirugia no a resultá bon.” *

De bes en kuando, BDD ta manifestá su mes na un edat hopi yòn. E revista George Street Journal * a informá di un mucha hòmber di seis aña “ku tabata kere ku su djentenan ta hel, su stoma ta ‘grandi,’ i ku su kabei no tabata keda bon. Ningun di su ‘defektonan’ tabata bisto pa otro hende. Tur mainta e tabata skeiru su kabei pa kasi ún ora, i si e no por a logra pa su kabei keda ‘bon’ e ta hinka su kabes den awa i bolbe kuminsá skeiru su kabei atrobe, lokual hopi bes tabata pon’é yega skol lat.” Un dia, ora ku el a yega na un ofisina di dòkter, el a asta sak abou pa wak su mes den e metal di e frame di stul.

No Laga Mundu Dominá Bo Aktitut

Revistanan yamativo, korantnan i propaganda na televishon ta bombardiá hende ku imágennan di e figura ideal. E rasonamentu di e hasidónan di propaganda ta fásil: Presentá un sierto imágen komo e norma, i hende lo gasta nan plaka ku nan a traha duru p’e pa nan por logra e mesun aparensia ei. Si agregá na esei un poko preshon di pareunan huntu ku podisé un par di komentario ku ta reflehá falta di konsiderashon di famia òf amigu, anto no ta un sorpresa ku algun hende ta bira desbalansá pa ku nan aparensia. * Klaru ku un aktitut desbalansá no ta meskos ku un trastorno sikiátriko opsesivo.

Ta apnormal pa pensa ku si bo no ta bunita òf no tin bon tipo, otro hende lo no ta interesá den bo. I esei no ta bèrdat tampoko. Por lo general hende no ta skohe amigu òf amiga a base di nan aparensia físiko. Ta bèrdat ku na promé instante e aparensia por ta un faktor, pero e berdadero banchi ku ta mantené un amistat ta personalidat, i norma- i balornan moral. Den algun aspekto kada un di nos ta manera un buki; kisas e buki tin un bunita kaft, pero si su kontenido ta laf, tòg e lesadónan lo pon’é abou umbes. Sin embargo, kon ku e kaft ta, si e buki ta interesante, hende lo keda kuné i les’é. Pues pakiko bo no ta konsentrá riba bo kualidatnan komo persona? Esei ta loke Beibel, e Palabra di Dios, ta animá bo pa hasi.—Proverbionan 11:22; Kolosensenan 3:8; 1 Pedro 3:3, 4.

I laga nos ta franko, nos aparensia ta kambia segun ku nos edat ta subi. Si bida, amistat i felisidat a dependé di un aparensia bunita i hóben, ki un futuro tristu lo a spera nos tur! Sin embargo, nos situashon por ta hopi distinto. Kon esei ta posibel?

Beyesa Ku Lo Dura

Proverbionan 16:31 ta bisa: “Kabei blanku ta un korona di gloria; den e kaminda di hustisia e ta wòrdu hañá.” Den bista di Yehova Dios—i den bista di tur persona ku ta kompartí su punto di bista—hende ku keda sirbi Dios te ora nan bira bieu no ta bira ménos atraktivo. De echo, debí na nan registro di selo i deboshon na Dios, nan kabei blanku ta ser kompará ku un korona di beyesa. Tal personanan presioso meresé nos amor i rèspèt profundo.—Levítiko 19:32.

Es mas, den e binidero mundu nobo ku Yehova a primintí, lo e deshasí di e efektonan ku piká heredá tabatin riba tur su sirbidónan fiel, hóben i bieu. Kada dia ku pasa, nan lo mira i sinti kon nan kurpa ta drecha, te ora ku finalmente nan ta bira kompletamente perfekto. (Jòb 33:25; Revelashon 21:3, 4) Esaki ta un prospekto masha emoshonante! Abo lo tin gana di ta entre nan? Si ta asina, no laga mundu su manera di pensa superfisial—i hopi bes kruel—dominá bo aktitut, ma hasi esfuerso pa konsentrá riba e beyesa ku realmente ta konta. Esei lo hasi bo un persona hopi mas felis i atraktivo.—Proverbionan 31:30.

[Nota]