Unda Bo Por Haña Norma i Balor Moral?

NOS ta biba den un mundu kaminda étika òf balornan moral ta kambiando. Práktikanan desonesto ku ántes hende tabata kondená, awor ta sera wowo pa nan. Medionan di komunikashon ku frekuensia ta laga ladronnan i estafadónan parse personanan agradabel, importante, deseabel òf asta ta pinta nan komo héroe. Komo resultado, e deskripshon aki ku nos ta haña den Beibel ta pas pa hopi hende: “Ora bo mira un ladron, bo ta konsentí kuné.”—Salmo 50:18.

Sin embargo, no tin nada di atmirá  na estafadónan. Un eskritor a deklará: “Un karakterístika úniko di estafadónan ta e abilidat natural ku nan tin—ku hopi bes nan a deskubrí for di chikí—pa manipulá hende rònt di nan. Es mas, nan manipulashon di hende no ta molestiá nan konsenshi niun tiki. Al kontrario, e ta duna nan un sintimentu intenso di satisfakshon, un sierto bienestar ku ta stimulá nan pa sigui manipulá hende pa haña kiko ku nan ke, sin importá e kosto pa e dunadó.”

Naturalmente, hende en general ta sinti simpatia pa e biuda ku ser estafá di tur su plaka, pero masha tiki hende ta sinti duele ora ku un persona malversá plaka di un kompania grandi òf di un kompania di seguro. Hopi hende ta rasoná ku kon ku bai bin, negoshinan tin hopi plaka tòg. Pero e froudenan ei no ta problema di e negoshinan so; nan ta saka nan pèrdida for di e konsumidó. Por ehèmpel, na Merka, un famia komun i koriente ta paga mas ku 1.800 florin pa aña na èkstra prima di seguro pa kubri e kosto di froude.

Un otro kos ta ku hopi hende ta probechá di oportunidatnan pa kumpra produktonan barata ku ta imitá esnan di marka, manera paña, oloshi, perfume, kosmétika i tas. E hendenan kisas sa ku e produktonan di imitashon ta kosta kompanianan míles di miónes di florin pa aña, pero nan ta pensa ku esei no ta afektá nan. Sin embargo, na final di kuenta ta e konsumidó tin ku paga pa produkto- i servisionan legítimo. Ademas, ora bo kumpra produkto di imitashon bo ta yena saku di kriminalnan.

Un eskritor ku ta den e negoshi di kombatí froude a skirbi: “Mi ta konvensí ku e motibu prinsipal pakiko tin asina tantu froude awe ta pasobra nos ta biba den un mundu sin niun tiki étika. Tin un deterioro grandi di étika ku a inspirá un kultura di froude. . . . Nos ta biba den un sosiedat ku no ta siña étika na kas. Nos ta biba den un sosiedat ku no ta siña étika na skol, pasobra lo akusá maestronan di ta siña e muchanan norma i balor.”

Na kontraste, Testigunan di Yehova sí ta siña hende e normanan moral di e Palabra di Dios i ta hasi esfuerso pa apliká nan den nan bida. Nan ta laga prinsipionan manera lo siguiente guia nan:

● “Stima bo próhimo manera bo mes.”—Mateo 22:39.

● “No kometé froude.”—Marko 10:19.

● “Laga esun ku ta hòrta, no hòrta mas; ma mas bien, lag’é traha, hasiendo ku su mes mannan loke ta bon, pa e por tin algu pa kompartí ku esun ku ta den nesesidat.”—Efesionan 4:28.

● “Ku deseo pa komportá nos mes den tur kos na un manera onorabel.”—Hebreonan 13:18.

Ounke Testigunan di Yehova no tin e aktitut di ta satisfecho ku nan mes ni ta hustu den nan mes bista, nan ta kere ku si tur hende tabata apliká e prinsipionan aki, mundu lo ta un lugá muchu mas mihó pa biba aden. Nan ta kere tambe e promesa di Dios ku un dia mundu lo bira asina.—2 Pedro 3:13.

[Komentario na página 11]

Si tur hende tabata biba segun e normanan moral di e Palabra di Dios, mundu lo ta un lugá muchu mas mihó pa biba aden

[Plachi na página 10]

Kristiannan berdadero ta sigui prinsipionan bíbliko, manera “Stima bo próhimo manera bo mes”