E Punto di Bista Bíbliko

Divorsio Ta e Solushon?

NA Gran Bretaña, un pastor ta yama e presentenan bonbiní na un seremonia. Dilanti di e pastor tin un pareha pará huntu ku un grupo íntimo di amigu i yunan. Ta un otro kasamentu felis? Niun ora so! E seremonia aki ta pa rekonosé e fin di nan matrimonio. Sí, divorsio a bira asina komun ku awor algun iglesia ta tene seremonianan di divorsio!

Abo tin pensá di divorsiá? Den tal kaso, poniendo un fin na bo matrimonio realmente lo hiba na un bida mas felis? Tin pasonan práktiko ku bo por dal pa logra felisidat ku bo kasá?

“Nan Lo Bira Ún Karni”

Ora ku Dios a kasa e promé pareha, el a deklará ku un hòmber “lo uni ku su esposa. I nan lo bira ún karni.” (Génesis 2:24) Pues, matrimonio lo mester tabata un union permanente. Ta p’esei despues, Hesus a bisa ku e úniko base pa divorsio bíbliko ku e posibilidat di kasa di nobo ta “pa motibu di inmoralidat seksual.”—Mateo 19:3-9. *

Esaki ta enfatisá kon nesesario ta pa parehanan tin un kompromiso pa ku nan matrimonio. Pero kiko si e problemanan den bo matrimonio ta hopi serio?

Divorsio Ta e Proseder Sabí?

Hesus a duna un prinsipio mediante kua nos por evaluá nos akshonnan ora el a bisa: “Sabiduria  ta wòrdu hustifiká pa medio di su obranan.” (Mateo 11:19) Kiko e resultadonan di e gran kantidat di divorsio sin un base sólido ta indiká?

“Hende a eksagerá e benefisionan,” segun Profèser Linda Waite, sosiólogo di Universidat di Chicago, kende a enkabesá un tim di eksperto ku a analisá matrimonionan infelis. Profèser Michael Argyle di Universidat di Oxford, despues di a pasa 11 aña analisando e kontestanan di míles di persona, tambe a deskubrí ku “e hendenan ménos felis den sosiedat tabata esnan ku a divorsiá òf separá.” Kiko lo por ta e motibu?

Wèl, ounke divorsio kisas ta eliminá algun problema, e por habri kaminda tambe pa un seri di suseso troumátiko riba kua lo bo tin masha tiki kontròl. De echo, investigashon ta mustra ku divorsio por lo general no ta redusí e síntomanan di depreshon ni ta laga hende haña mas balor propio.

Asta si bo no tin e “matrimonio perfekto,” bo por saka benefisio dor di keda ku bo kasá. Hopi hende ku ta desididu pa hasi esei ta haña felisidat. Profèser Waite a deklará: “Tin hopi problema ku ta ser resolvé ku transkurso di tempu, i hende kasá tin e tendensia di bira mas felis.” De echo, un estudio a demostrá ku kasi 8 di kada 10 hende ku tabata “hopi infelis” ku nan matrimonio pero ku a evitá di divorsiá, despues di sinku aña a haña ku nan tabata “felismente kasá.” Pues anto, asta ora tin problemanan grave, ta bon pa parehanan no kore divorsiá.

Pasonan Práktiko

Personanan ku tin pensá di divorsiá mester puntra nan mes si nan ekspektativanan pa ku matrimonio ta realístiko. Medionan di komunikashon a promové e imágen di un relashon romántiko ku ta kulminá den un kasamentu ekstrabagante ku un final manera den sprookje. Despues di kasamentu, ora ku ekspektativanan haltu keda sin kristalisá, e desepshon ku esei ta trese kuné por stimulá konflikto. Segun ku tenshon ta krese, ta desaroyá un situashon den kua sintimentunan ofendí ta dominá emoshon. E amor ta marchitá i, ku tempu, ta ser remplasá pa rabia i odio. Den tal sirkunstansia, hopi hende por sinti ku e úniko opshon ta divorsio.—Proverbionan 13:12.

Pero en bes di permití sintimentunan negativo afektá bo punto di bista, asosiá ku personanan ku tin un kompromiso fuerte pa ku nan matrimonio. Beibel ta urgi kristiannan pa sigui “enkurashá otro i edifiká otro.” (1 Tesalonisensenan 5:11) P’esei, esnan ku tin problema den matrimonio definitivamente tin mester di enkurashamentu di nan rumannan den fe.

E Importansia di Kualidatnan Ku Ta Agradá Dios

Apòstel Pablo a konsehá: “Bisti un kurason di kompashon, kariño, humildat, mansedumbre i pasenshi.” (Kolosensenan 3:12) Kualidatnan ku ta agradá Dios por protehá e union matrimonial durante periodonan turbulento.

Por ehèmpel, Pablo a skirbi: “Boso soportá otro i pordoná otro, si un di boso tin un keho kontra un otro.” (Kolosensenan 3:13) Christopher Peterson, sikólogo di Universidat di Michigan, a bisa: “Pordon ta e karakterístika mas fuertemente ligá na felisidat.”

Kariño, ternura i pordon ta hiba na amor, “e laso perfekto di unidat.” (Kolosensenan 3:14) Muy probablemente, un tempu boso tabata felismente enamorá di otro. Ta posibel pa boso rekuperá e amor ku un tempu boso tabata sinti? Sin importá kon difísil bo sirkunstansia por ta, kobra ánimo. Tin speransa. De echo, keda huntu i apliká prinsipionan bíbliko por resultá den un grado di felisidat ku kisas ta mas di loke bo a imaginá. Bo esfuersonan relashoná ku esaki, definitivamente lo hasi Yehova Dios, e Kreadó di matrimonio, kontentu.—Proverbionan 15:20.

[Nota]