For di Nos Lektornan

Petroli Mi kier a djis ekspresá mi gratitut pa e seri di artíkulo di 8 di novèmber 2003, “Petroli—Lo Kaba un Dia?” Nunka promé mi no a mira e estadístikanan spantoso ku boso a sita relashoná ku deramenan petrolero. Mirando e kosnan aki ku hende ta hasi, no ta straño ku e tera ta den asina un mal estado! Esaki ta pone mi anhelá e tempu den futuro ora ku Yehova lo limpia tur kos di unabes pa semper i transformá e tera den un paradeis!

T. T., Merka

E artíkulonan a keda presentá den un manera masha atraktivo i sin prehuisio. Ounke mi tin mi doktorado di físika den proseso di ingenieria, nunka mi a tende di e teoria abiogéniko di orígen di petroli. Por lo general skolnan ta siña bo solamente e teoria biogéniko, esta, ku petroli ta e produkto di putrimentu di materialnan biológiko.

E. B., Fransia

Mi ta bai un universidat tékniko i mi tin masha problema pa haña bukinan di instrukshon ku ta usa diagram pa splika mekanismonan di mashin. Ta p’esei mi a keda impreshoná ku e diagram ku ta mustra kon nan ta produsí petroli. Esei a yuda hasi e artíkulo fásil pa komprondé.

M. I., Hapon

Eigenlijk boso mester a hasi un investigashon mas kabal pa boso seri di artíkulo. Boso no a menshoná ku ta James Miller Williams a koba e promé pos di petroli komersial di Norteamérika na Ontario, Canada. El a hasi esei un aña promé ku Edwin Drake a koba su pos na Titusville, Pennsylvania, Merka.

G. Y., Canada

“Spièrta!” ta kontestá: Tin bastante debate riba e asuntu aki. Un geólogo di petroli ku a skirbi tokante e historia di petroli a bisa “Spièrta!” ku tin hopi kontroversia relashoná ku e sitio di e promé pos. “The Canadian Encyclopedia” pues ta resumié asin’aki: “Tantu Williams komo E. L. Drake di Pennsylvania ta pretendé di a bora e promé pos di petroli na Norteamérika.”

Desaster di Mississippi Mi a keda di shòk pa e artíkulo “Tempu Ku e Riu A Kore Kontrali.” (8 di desèmber 2003) El a pone mi realisá kon poderoso naturalesa ta i kon impotente hende ta ora e hañ’é konfrontá ku kalamidat. Boso artíkulo a fortalesé mi determinashon pa konfia den Beibel.

M. J., Mauritania

Ounke e susesonan deskribí a tuma lugá kasi 200 aña pasá, mi a sinti komo si fuera ta un hende ku a mira e akontesimentunan tabata deskribí nan. Segun ku mi tabata lesa e artíkulo, mi a sinti komo si fuera mi tabata einan, ta tambaleá dor di e furia di e awa. Ansiosamente mi a lesa kada paragraf.

V. R., Rusia

Famianan Inkrédulo Danki pa e artíkulo “E Punto di Bista Bíbliko: Ora Bo Sernan Kerí No Tin e Mesun Religion Ku Bo.” (8 di novèmber 2003) Komo e úniko kristian den un famia di seis yu, mi tin años ta lucha pa ta balansá den e manera ku mi ta trata ku e situashon aki. E tekstonan bíbliko den e artíkulo aki tabata manera rayo di lus briante!

R. G., Merka

Mi no tin hopi tempu ku mi a kuminsá studia Beibel. Pero e tiki ku mi sa, mi ta purba kompartié ku mi sernan kerí, ku no ta kreyente. Komo ku mi tin 16 aña so, mi famia no ta permití mi batisá, pero mi ta spera di hasié un dia. E artíkulo aki lo yuda mi trata ku mi famia.

J. G., Merka