Hóbennan Ku sin Miedu Ta Papia di Nan Kreensia Religioso

ENTRE Testigunan di Yehova tin hopi hóben. Nan ta stima Dios i ta hasi esfuerso pa biba na armonia ku su normanan deskribí den Beibel. E hóbennan aki ta orguyoso di nan kreensia religioso, i ta papia libremente ku otro hende tokante dje na skol. Konsiderá algun ehèmpel.

▪ Tempu ku Holly tabata den klas 6, su klas a haña e tarea pa skirbi un òpstèl riba e pregunta: “Kon abo lo a solushoná e problema di terorismo sin usa violensia?” Holly a probechá di e oportunidat aki pa skirbi tokante su speransa pa futuro basá riba Beibel. El a splika ku atraves di henter historia “hende a ehersé outoridat riba un otro hende pa su daño.” (Eklesiastés 8:9) Kaba el a dirigí atenshon na e úniko speransa real pa humanidat: e Reino di Dios. El a skirbi: “Ya ku Hesus ta e Rei nombrá di e Reino ei, lo e eliminá tur problema, inkluso terorismo.” Anto Holly a elaborá riba e manera ku Hesus lo realisá loke ningun gobernante humano por hasi. El a skirbi: “Tempu ku Hesus tabata riba tera el a demostrá ki klase di gobernante lo e ta. E tabata amoroso, i a perkurá pa hende. El a demostrá e poder ku e tabatin dor di kura malesa i dor di resusitá e mortonan. Ningun gobièrnu humano por duna bida bèk na hende ku a muri. Pero e Reino di Dios sí lo hasié.” Holly a konkluí su òpstèl ku e deklarashon: “E solushon ta serka Dios, no serka hende.”

Holly su maestra a skirbi bou di su òpstèl: “Wauw! Hopi konvinsente, Holly. I masha bon pensá.” E maestra a keda impreshoná tambe ku Holly su referensianan bíbliko. Esaki a duna Holly chèns di papia ku su maestra tokante e Skol di Ministerio Teokrátiko, un programa semanal ku Testigunan di Yehova tin ku ta trata tokante kon pa papia ku hende i siña nan. Su maestra gustosamente a aseptá un ehemplar di e buki di instrukshon ku nan ta usa den e Skol di Ministerio.

 ▪ Jessica tambe a haña chèns di papia tokante su kreensia religioso ora di skirbi òpstèl. El a bisa: “Mi tabatin e oportunidat di skirbi tres òpstèl tokante mi kreensianan. Unu tabata tokante Testigunan di Yehova i derecho religioso. E maestra a pon’é den biblioteka di skol ya asina ken ku tabata deseá di les’é por a hasi esei. Poko tempu pasá mi a skirbi un òpstèl tokante mi boutismo i kon importante e dia ei tabata pa mi. E alumnonan sa laga otro lesa e klat di nan òpstèl promé ku nan finalis’é, pues e muchanan di mi klas a haña chèns di lesa esun di mi. Un mucha muhé a bisa mi: ‘Bon trabou. Ta great pa sa kiko ta bo deber komo un Testigu di Yehova. Pabien ku bo boutismo!’ Un otro mucha muhé a deklará: ‘Bo relato tabata impreshonante! Mi ta kontentu ku bo fe ta asina fuerte!’ Un mucha hòmber a skirbi simplemente: ‘Bo ta usa bo kabes bon. Pabien.’”

▪ Tempu ku Melissa tabatin 11 aña, el a haña un oportunidat úniko pa papia tokante su kreensia religioso. “E verplegster di skol a bin den lès di biologia pa papia tokante nos sistema di inmunidat. E tema di transfushon di sanger a bin dilanti. Despues di lès mi a konta mi maestro di biologia tokante un di nos vidionan tokante sanger. Mi a bin skol kuné e siguiente dia, i mi maestro a bai kas kuné i a wak e vidio ku su famia. E siguiente dia el bin skol ku e vidio i a laga dos klas wak e, inkluso mi klas. Kaba el a papia bon di Testigunan di Yehova, bisando ku si no tabata pa nos, lo no tabata asina fásil pa haña alternativanan pa transfushon di sanger. Ora ku el a duna mi e vidio bèk, el a puntra: ‘Kon mi por haña un di e vidionan ei pa e biblioteka di skol?’ Mi a dun’é unu. E tabata hopi entusiasmá kuné, i ami tambe!”

Holly, Jessica i Melissa ta entre e tantísimo Testigunan di Yehova hóben ku ta sigui e konseho bíbliko pa nan kòrda riba nan Kreadó. (Eklesiastés 12:1) Abo tambe ta hasiendo esei? Si ta asina, bo por tin sigur ku bo ta hasi Yehova su kurason kontentu.—Proverbionan 27:11; Hebreonan 6:10.

Hóbennan, ora boso ta papia tokante boso kreensia religioso ku kompañeronan di skol i ku maestronan, esei ta duna un bon testimonio tokante Yehova Dios i su propósito. Esei ta fortalesé boso fe tambe, i ta desaroyá den boso e orguyo sano di tin e privilegio di ta un di e sirbidónan di Dios. (Jeremias 9:24) Prediká na skol ta sirbi tambe komo un protekshon. Jessica a deskribié asin’aki: “Un di e benefisionan di papia tokante mi kreensia ta ku e alumnonan no ta purba pone preshon riba mi pa hasi kosnan ku no ta na armonia ku loke Beibel ta bisa.”

[Plachi na página 24]

Holly

[Plachinan na página 24, 25]

Jessica

[Plachinan na página 24]

Melissa