Tatanan Ousente—Un Problema Kresiente

MAS i mas tata ta bandonando nan famia. Na kabamentu di dékada di 1990, e korant USA Today a kalifiká Merka komo “e lider mundial den famianan sin tata.” Sin embargo, ousensia di tata ta un fenómeno rònt mundu.

Na Brazil, un informe di senso di aña 2000 a revelá ku di 44,7 mion famia, 11,2 mion tabatin un muhé komo kabes di famia. Na Nicaragua, 25 porshento di mucha ta biba ku nan mama so. Na Costa Rica e kantidat di mucha ku no a ser rekonosé pa nan tata legítimo a oumentá durante dékada di 1990 di 21,1 porshento pa 30,4 porshento.

E estadístikanan di e tres paisnan aki ta djis un muestra di e tendensia mundial. Konsiderá un otro aspekto di e problema di tatanan ousente.

E T’ei Sí, Pero No Ta Kumpli ku Su Responsabilidat

Sea asina bon di wak e kuadro “Papi, Ki Dia Papi Ta Bin Bèk?” Nao, kende awor tin 23 aña, ta konfesá: “Promé ku mi a kuminsá bai skol básiko, masha poko mi tabata mira Tata. Un biaha ku e tabata sali kas, mi a rog’é, ‘Papi, bin bèk; ta bon Papi?’”

Relashonnan di famia manera esun di Nao ku su tata ta loke a pone e eskritor polako Piotr Szczukiewicz bisa: “E tata ta manera un faktor importante ku no t’ei den e famia.” Nos tin ku atmití ku hopi tata ta biba ku nan famia i ta trese sèn kas. Pero, manera e revista franses Capital a splika, “demasiado tata ta kontentá nan mes ku djis perkurá kuminda; nan no ta perkurá edukashon.”

Hopi bes, e situashon ta ku e tata ta biba na kas pero no ta enbolbí den e bida di su yunan. Su atenshon ta otro kaminda. E revista franses Famille chrétienne ta bisa ku “asta si [e tata] ta físikamente presente, sikológikamente e por ta ousente.” Pakiko asina tantu tata awe ta mentalmente i emoshonalmente ousente for di nan famia?

Manera e revista menshoná ariba ta splika, un motibu básiko ta ku nan “no ta komprondé kiko ta e papel di un tata òf esposo.” Segun e  punto di bista di hopi tata, e papel di un bon tata ta simplemente pa bin kas ku un bon salario. Manera e eskritor polako Józef Augustyn a deklará, “hopi tata ta kere ku nan ta bon mayor pa motibu ku nan ta trese plaka pa e famia.” Pero esei ta djis un parti di e responsabilidat di un tata.

Echo ta ku yunan no ta midi e balor di nan tata a base di e kantidat di sèn ku e ta gana ni a base di kon karu e regalonan ku e por duna nan ta. Mas bien, loke yunan realmente ke—muchu mas ku regalo material—ta e amor, tempu i atenshon di nan tata. Eseinan ta e kosnan ku berdaderamente ta konta pa nan.

Tatanan Tin Ku Reeksaminá Nan Mes

Segun un informe di e Konseho Sentral pa Edukashon na Hapon, “tatanan tin ku reeksaminá nan estilo di bida; nan ta muchu dediká na trabou.” Awor e pregunta ta: Un tata lo ta dispuesto pa hasi un ahuste pa kousa di su yunan? E korant aleman Gießener Allgemeine a informá di un investigashon den kua mayoria tata ku nan a entrevistá a nenga di pone nan yunan promé ku nan karera.

Un tata su aparente falta di interes den su yunan por hùrt esakinan profundamente. Lidia, kende awor tin 21 aña, ta kòrda bon kla kon su tata tabata tempu ku Lidia tabata un hobensita na Polonia. El a splika: “Nunka e tabata papia ku nos. Nos kada un tabata biba den un otro mundu. E no tabata sa ku mi tabata pasa mi tempu liber den diskoteka.” Di igual manera, Macarena di Spaña, kende awor tin 21 aña, ta bisa ku tempu ku e tabata mucha, su tata “tabata kore paranda fin di siman ku su amigunan, i vários biaha e tabata disparsé pa un par di dia.”

Fiha e Prioridatnan Korekto

Kisas mayoria tata ta realisá ku nan ta dediká muchu poko tempu i atenshon na nan yunan. Un tata hapones di un yu hòmber teenager a bisa: “Mi ta spera ku mi yu lo komprondé mi situashon. Semper mi ta pensa riba dje, asta ora mi ta drùk.” Pero, djis deseá pa un yu komprondé pakiko su tata no t’ei ta solushoná e problema?

Klaru ku nò. Pa por satisfasé e nesesidatnan di un yu mester hasi un berdadero esfuerso, sí, sakrifisio. Ta bisto anto ku no ta fásil pa duna yunan loke mas nan tin mester di dje, esta, amor, tempu i atenshon. Hesukristu a bisa: “Hende lo no biba di pan [òf, kuminda material] so.” (Mateo 4:4) Ta bèrdat tambe ku kos material so no ta hasi yunan krese bira adultonan eksitoso. Komo tata, bo ta dispuesto pa sakrifiká loke kisas ta hopi balioso pa bo—bo tempu òf posiblemente asta adelanto den bo karera—pa bo hasi bo mes disponibel pa bo yunan?

E korant Mainichi Daily News di 10 di febrüari 1986 a konta di un tata ku a bin komprondé kon importante su yunan realmente tabata. E korant a skirbi: “Un alto ehekutivo di e Kompania di Trein Nashonal di Hapon a preferá di entregá su retiro ku separá for di su famia.” Anto e korant a sita e ehekutivo: “Kualke otro hende por okupá e puesto di direktor general. Pero ami ta e úniko tata di mi yunan.”

En bèrdat, e promé paso pa bira un bon tata ta pa rekonosé e sorto di tata ku yunan tin mester. Laga nos analisá kiko ta enserá ser e tipo di tata ei.

[Kuadro na página 3]

“Papi, Ki Dia Papi Ta Bin Bèk?”

Asina Nao, un hobensita hapones di sinku aña, a puntra su tata un dia ora ku esaki tabata bayendo trabou. Ounke e tata tabata biba na kas, masha poko Nao tabata mir’é. E tabatin kustumber di yega kas for di trabou despues ku Nao a bai drumi kaba i sali bai traha mainta promé ku Nao a lanta.