Embaraso Hubenil—Un Tragedia Mundial

HENDE a yega di yama embaraso hubenil un epidemia. Sin embargo, pa realisá plenamente kuantu angustia e problema aki ta kousa, bo tin ku konsiderá e impakto ku un embaraso tin riba un mucha muhé tiner morto spantá. En todo kaso, lo e eksperensiá kambionan drástiko den su bida ku lo tin un impakto profundo no riba e so sino tambe riba su famia i sernan kerí.

Tinernan ta den loke Beibel ta yama nan ‘flor di hubentut.’ Esaki ta un tempu ora ku deseonan seksual ta hopi bes na nan punto máksimo. (1 Korintionan 7:36) Sin embargo, lo ta demasiado simplista pa konsiderá embaraso hubenil djis un asuntu di no a usa antikonseptivo. Tin evidensia ku embaraso hubenil ta enserá vários kuestion sosial i emoshonal kompliká.

Faktornan Ku Ta Kontribuí na Embaraso Hubenil

Investigashon ta mustra ku hopi mama tiner ta bin di famianan kibrá. Un ekspreshon ku hopi biaha bo ta tende di adolesentenan na estado ta: “Henter mi bida loke mas mi tabata desea ta pa por tin un berdadero famia.” Evidentemente anto, famianan ku problema por ta un faktor den kasonan di tiner ku ta sali na estado. Un programa pa yuda mamanan tiner a deskubrí ku e tinernan ei hopi biaha tin “relashonnan instabil ku nan mama i ningun klase di relashon ku nan tata.” Anita, kende a bira mama ku 18 aña, ta kòrda ku ounke su mama soltero a traha duru pa perkurá p’e materialmente, tòg e tabata sinti un bashí emoshonal debí ku su tata no tabat’ei.

Otro mucha muhénan ta bira mama soltero dor ku nan a ser violá. Pa algun di nan, e trouma aparentemente ta kousa un doló emoshonal ku despues por manifestá su mes den komportashon destruktivo. Por ehèmpel, Jasmine a ser violá ku 15 aña. E ta kòrda: “Despues di esei, mi no tabatin kunes si mi kousa daño na mi mes. Ora mi tabatin 19 aña, mi a sali na estado.” Tambe abusu seksual por pone un hende sinti ku e no ta bal nada. Jasmine a lamentá: “Nunka mi a sinti ku mi tabata meresé algu.” Anita tambe a pasa den kasi mesun eksperensia amargo. El a bisa: “For di tempu mi tabatin 7 aña te ku mi 11 aña, un tiner a hasi aktonan seksual indesente ku mi. Mi tabatin rabia riba mi mes. Mi a kulpa mi mes.” El a sali na estado ku 17 aña.

Di otro banda, tin hóbennan ku ta sali na estado pa motibu di nan kuriosidat i dor ku nan tin muchu konfiansa den nan mes. Nicole, sitá den e artíkulo anterior, a atmití: “Mi tabata pensa ku mi sa tur kos, ku mi por hasi tur kos. Desafortunadamente, mi por a sali na estado tambe.” Carol, kende tambe a bira un mama soltero na  un edat yòn, a disidí di tene relashon seksual pa kuriosidat. El a bisa: “Mi a sinti ku tabatin kos den bida ku tabata pasa mi forbei.”

Un otro kos ku ta hunga un ròl ta ku hóbennan no sa kiko ta e konsekuensianan di aktividat seksual. Na Gran Bretaña, segun sosiólogonan Karen Rowlingson i Stephen McKay, algun hóben “falta konosementu eksakto tokante . . . kiko pa spera den un relashon i kiko ke men sali na estado.” Tin hóben ku aparentemente no ta realisá ku relashon seksual ta kousa embaraso. Den un enkuesta, mamanan tiner “hopi bes a bisa ku nan a keda di shòk òf sorprendí ku nan tabata na estado asta si nan no a usa antikonseptivo.”

Sin embargo, loke mas a influensiá embaraso hubenil ta e kambio den aktitut pa ku sèks. Nos ta biba den un tempu ku hende ta ‘stimadó di plaser mas bien ku stimadó di Dios.’ (2 Timoteo 3:1-4) Investigadónan oustraliano Ailsa Burns i Cath Scott a bisa ku “medidanan di kastigu riba tereno sosial, religioso i ekonómiko no ta ser tumá mas manera ántes kontra relashon seksual pafó di matrimonio.” Haña un yu sin ta kasá kisas no ta karga e mesun bèrgwensa mas manera ántes. Figurá bo, na algun lugá tinernan ta asta mira un beibi komo un sorto di trofeo òf símbolo di prestigio!

Konsekuensianan Emoshonal

E realidat di ser un mama tiner ta hopi distinto for di fantasia hubenil.  Hopi biaha ora e mucha muhénan haña sa ku nan ta na estado, un avalancha di emoshon ta ataká nan. Hopi di nan ta atmití ku nan a keda di shòk òf babuká. Segun e Akademia Merikano di Sikiatria pa Mucha i Adolesente, “reakshonnan komun ta entre otro, rabia, sintimentu di kulpa i nenga di aseptá e realidat.” Pero ta peligroso ora un mucha muhé ta nenga di aseptá e realidat pasobra esei por strob’é di buska e yudansa médiko nesesario.

Elvenia ta kòrda e momentu ku el a keda konfrontá ku e resultadonan di su “aventura” ku sèks: “Mi tabata morto spantá.” Hopi mucha muhé na estado no tin un hende di konfiansa ku nan por papia kuné òf nan ta sinti muchu bèrgwensa pa papia tokante nan situashon. P’esei no ta nada straño ku miedu i sintimentu di kulpa ta dominá nan. Tambe hopi tiner na estado ta sufri di depreshon pisá. Jasmine a bisa: “Mi no tabata masha interesá pa biba, ni mi no tabatin kunes si mi muri.” *

Pero, kon ku un mucha muhé reakshoná na promé instante, na dado momentu e tin ku tuma vários desishon di largu alkanse pa su mes i pa su yu. Nos siguiente artíkulo lo trata kon un mucha muhé por tuma e desishonnan ei na un manera sabí.

[Nota]

 [Kuadro na página 7]

Echonan Tristu di Embaraso Hubenil

Ounke e siguiente sifranan ta deskribí e situashon na Merka, nan ta ilustrá problemanan ku en realidat tinernan na estado ta konfrontá mundialmente.

● Kuater di kada 10 mucha muhé ta sali na estado promé ku nan hasi 20 aña; esei ta mas ku 900.000 embaraso hubenil pa aña.

● Rònt di 40 porshento di mama tiner ta bou di 18 aña.

● Un porsentahe mas haltu di yunan di mayornan tiner ta sufri di maltrato i negligensia kompará ku yunan di mayornan mas grandi.

● Solamente 4 di kada 10 mama bou di 18 aña ta kaba skol sekundario.

● Kasi 80 porshento di hende hòmber ku saka un tiner na estado no ta kasa ku e mama tiner.

● Solamente 30 porshento di mama tiner ku kasa despues ku nan yu nase ta keda kasá; matrimonionan entre tiner tin dos biaha mas tantu chèns di kibra ku matrimonionan den kua e muhé tin por lo ménos 25 aña.

● Yunan di mama tiner tin mas chèns di nase prematuro i bou di peso, lokual ta oumentá e probabilidat ku e beibi ta muri òf ta nase siegu, surdu, ku problemanan króniko di halamentu di rosea, mentalmente retardá, ku malesa mental, parálisis selebral, disleksia òf hiperaktivo.

[Rekonosementu]

Saká for di Not Just Another Single Issue: Teen Pregnancy Prevention’s Link to Other Critical Social Issues, E Kampaña Nashonal pa Prevení Embaraso Hubenil, febrüari 2002.

[Kuadro/Plachi na página 7]

Embaraso Hubenil Mundialmente

BRAZIL: Segun informe, “698.439 mucha muhé tiner bou di 19 aña a duna lus na 1998 hasiendo uso di Brazil su Sistema di Salubridat di Estado . . . 31.857 di e mucha muhénan aki tabatin entre 10 pa 14 aña. Lokual—indudablemente bo mester ta di akuerdo—ta un edat apsurdo pa haña yu.”—Folha de S. Paulo, 25 di ougùstùs 1999.

GRAN BRETAÑA: “Gran Bretaña tin e porsentahe mas haltu di mamanan tiner ku ta duna lus na Wèst Europa . . . Na 1997, tabatin kasi 90.000 kaso di tiner ku a sali na estado na Inglatera. Aproksimadamente 60 porshento a resultá den nasementu (56.000), i 90 porshento di e yunan ku a nase di mama tiner na 1997 tabata pafó di matrimonio (rònt di 50.000).”—Lone Parent Families, 2002.

MALASIA: “E kantidat di yu ku ta nase pafó di matrimonio den e pais a oumentá desde 1998. Mayoria mama ta entre 17 pa 19 aña.”—New Straits Times–Management Times, 1 di aprel 2002.

RUSIA: “Kasi un tersera parti di tur beibi ku a nase na Rusia aña pasá a nase di mama soltero, dòbel e porsentahe di un dékada pasá i na un nivel ku nan no a mira desde Segundo Guera Mundial, segun estadístikanan di gobièrnu. Mas ku 40 porshento di e beibinan aki ta di muchanan tiner.”—The Moscow Times, 29 di novèmber 2001.

MERKA: “Apesar di e redukshon resien den e porsentahe di embaraso hubenil, 4 di kada 10 mucha muhé tiner ta sali na estado por lo ménos un biaha promé ku nan hasi 20 aña.”—Whatever Happened to Childhood? The Problem of Teen Pregnancy in the United States, 1997.

[Plachi na página 5]

Ora mayornan kibra ku otro, tin mas chèns di embaraso hubenil

[Plachi na página 6]

Tin hóbennan ku aparentemente no ta realisá ku relashon seksual ta kousa embaraso

[Plachi na página 6]

Embaraso ta afektá tantu e mucha muhé komo su sernan kerí na un manera drástiko