Hoyanan Bibu di e Mundu di Insekto

DI UN ESKRITOR DI SPIÈRTA! NA SPAÑA

DEN e mondinan será di selvanan tropikal di yobida tin míles di prenda bibu. Algun ta lombra manera oro i plata; otronan ta bria manera esmeralda, rubí i safiro. E hoyanan di selva aki, ku por lo general hende no ta mira, ta tòr òf bakatòr.

Kiko ta bini na bo mente ora bo pensa riba bakatòr? Insektonan straño koló skur ku ta kana abou riba tera? En realidat, e famia di bakatòr ta pertenesé n’e kriaturanan mas kolorido i tambe mas numeroso riba tera. Segun The Guinness Book of Animal Records, e kasi 400.000 sorto di Coleoptera identifiká—e klasifikashon sientífiko ku ta inkluí bakatòr—ta forma kasi un tersera parti di tur espesie di bestia konosí riba e planeta aki. I si un dia bo mes haña gana di deskubrí un espesie nobo, bo por bien purba buska esei den e mundu di bakatòr. Dr. Terry Erwin, eksperto riba tereno di insekto, ta kalkulá ku lo por tin miónes di espesie di bakatòr mas ku te ainda ta deskonosí pa siensia. E mes no por a kere su bista ora el a haña rònt di 1.200 diferente tipo di bakatòr riba apénas 19 palu tropikal grandi.

Variedat Asombroso

Tumando na konsiderashon e kantidat di espesie di bakatòr ku tin, no keda sorprendí di topa nan den vários forma i tamaño. Segun e revista National Geographic, algun di nan ta “asina grandi ku e kolekshonistanan di ántes tabata tumba nan for di laira ku skopèt di santu.” E mesun revista aki ta bisa ku otronan ta “asina chikitu ku  nan ta tuma ‘kabes di boto’ riba boka di abeha. Tin asta bakatòr ku ta invadí museo i devorá kolekshon di bakatòr.”

Papiando di kolekshon di bakatòr, tin di nan por bal basta plaka. Mas bunita e kolónan ta i mas difísil nan ta pa haña, mas nan kosta. Por ehèmpel, mestkever (Scarabaeidae) ta bini na tur tipo di bèrdè ku kòrá, huntu ku kolónan di plata i oro. Un di e tòrnan aki kòrá bibu por kosta 360 florin, miéntras ku e tipo ku ta lombra ku un koló di oro fini por bal mas ku dos biaha e montante ei.

Algun bakatòr (Longicornia) ku nan antènanan eksepshonalmente grandi, tin patronchinan impreshonante i kolorido. Otronan ta lombra manera mozaïk chikitu. Nan kolónan bèrdè i blou briante no ta baha kabes pa e kolónan di blenchi. Pero no ta koló bunita so ta duna bakatòr un balor haltu. Dor di resiklá blachi di mata putrí i sushi di bestia, nan ta hunga un papel importante den yuda mantené e ekosistema saludabel.

Hoyanan di Insekto

No ta kolekshonistanan di bakatòr so ta duna hopi balor n’e hoyanan di insekto aki. Algun hende muhé riba kontinente amerikano ta traha kadena dor di pega alanan kolorido di bakatòr na otro. Na sierto parti di Mexico, nan ta leim pida-pida di glas di koló i kralchi na un tipo di tòr (Buprestidae) i kombertié den un borstspeld natural ku e doño por pega na su paña ku un kadena kòrtiku kologá na dje.

Sea bo ta preferá di atmirá bakatòr djaleu òf eksaminá nan mas djaserka, e hoyanan bibu aki ta demostrá na un manera briante e bunitesa fasinante i komplehidat di e kreashon di bestia riba tera.

[Kuadro/Plachi na página 16]

Bladhaantje

Pa bunita ku algun bakatòr ta, nan por bira un pèst. Por ehèmpel, bladhaantje (Chrysomelidae) ta devorá blachi, stam i rais di un variedat amplio di mata i kultivo.

Ounke tin rònt di 25.000 espesie di bladhaantje, e nòmber ta pone hopi kunukero pensa mesora riba unu en partikular: e coloradokever. E hendenan ku a establesé nan mes na Nort Amérika tabata e proménan ku na 1859 a ripará ku e bakatòr aki tabata un menasa pa nan kultivonan di batata. Na kuminsamentu di siglo 20 e bakatòr aki a invadí Europa, i awor a plama den e kontinente ei i drenta Asia.

Pa motibu ku e coloradokever ta kapas pa bira resistente kontra insektisida, el a bira un enemigu spantoso. Awe, nan ta usa un kombinashon di táktika biológiko, kímiko i di agrikultura pa tene e komedó di blachi insasiabel aki bou di kontròl.

[Plachi]

Coloradokever, Merka

[Rekonosementu]

Scott Bauer/Agricultural Research Service, USDA

[Kuadro/Plachinan na página 17]

E Kampeonnan

▪ Bakatòr ta biba mas largu ku otro insekto. Ounke mayoria insekto ta biba ménos ku un aña, algun prachtkever (di e famia di Buprestidae) ta biba mas ku 30 aña, i tin unu, segun datonan dokumentá, ku a alkansá 47 aña. E bakatòrnan aki “ta pone nan webunan bou di kaska di un palu bibu,” segun The Guinness Book of Animal Records. “Si kap e palu, ta masha normal ku algun di e larvanan ta sobrebibí i despues ser transportá rònt mundu den e palu. Ya ku algun sorto ta tuma añanan pa madurá, ku tempu e adultonan por surgi for di muebelnan trahá di e palunan aki.”

▪ Goliathkever di e zonanan tropikal di Afrika ta e kampeon peso pisá di e mundu di insekto. Algun machu ta pisa den kareda di 100 gram, tres biaha mas tantu ku un raton.

▪ E distinshon p’e kampeon hisadó di peso den e mundu di animal (na proporshon ku su tamaño) ta bai p’e neushoornkever di e famia Dynastinae. E kriatura robusto aki por hisa 850 biaha su peso.

[Plachi]

Goliathkever, Repúblika Demokrátiko di Congo

[Rekonosementu]

Faunia, Madrid

[Plachi]

Neushoornkever, Guinea Ekuatorial

[Plachi na página 16]

Mestkever, Mexico

[Plachi na página 16]

Mestkever, Hondúras

[Plachi na página 16]

Mestkever, Costa Rica

[Plachi na página 17]

Zandloopkever, Indonesia

[Plachi na página 17]

Mestkever, Tailandia

[Plachi na página 17]

Prachtkever, Tailandia

[Plachi na página 17]

Prachtkever, Hungria

[Plachi na página 17]

Mestkever, Hondúras

[Rekonosementu pa Potrèt na página 16]

Man robes ariba i meimei: © David Hawks; man drechi: © Barbara Strnadova/Photo Researchers, Inc.

[Rekonosementu pa Potrèt na página 17]

Ariba di robes pa drechi: Promé tresnan: Faunia, Madrid; di kuater: Gyorgy Csoka, Hungary Forest Research Institute, www.insectimages.org; di sinku: © Barbara Strnadova/Photo Researchers, Inc.