Kiko Ta Vitiligo?

Di un eskritor di Spièrta! na Sur Afrika

▪ Tin biaha Sibongile mes ta hasi wega ku su problema di kueru. E ta bisa ku un smail: “M’a nase pretu, bira blanku, i awor mi no sa mas kiko mi ta.” E tin vitiligo.

Loke ta kousa vitiligo, yamá tambe leukoderma, ta pèrdida di sèl di kueru ku ta produsí pigmènt. Esaki ta resultá den formashon di pik-pik blanku i plèki mas grandi riba e kueru. Serka algun pashènt e problema no ta yega mas aleu ku un plèki. Serka otronan sí e ta plama masha lihé riba e kurpa. Di otro banda, tin hende ku ta sufri di un forma di vitiligo mas slow ku ta tuma hopi aña pa plama riba henter e kurpa. Vitiligo no ta kousa doló físiko ni e no ta kontagioso.

Kisas no tur kaso di vitiligo ta mes bisto ku esun di Sibongile pasobra e ta mas notabel serka hende koló skur. Pero tin hopi hende ta sufri di un òf otro grado di dje. Estadístikanan ta mustra ku entre 1 pa 2 porshento di poblashon tin e. Vitiligo no ta hasi distinshon di rasa i e ta afektá tantu hòmber komo muhé. Ainda su kousa ta deskonosí.

Ounke no tin un kura sigur pa vitiligo, tin hopi manera pa trat’é. Por ehèmpel, serka pashèntnan koló kla, e problema ta bira mas bisto ora e parti di e kueru ku tin su koló natural ainda kima den solo. P’esei, pa e problema ta ménos notabel, ta bon pa evitá muchu solo. Hende koló skur por usa kosmétika spesial pa yuda kamuflá e kontrastenan den koló di kueru. Algun pashènt a reakshoná bon riba un tratamentu pa oumentá pigmènt. Durante e tratamentu aki e pashèntnan tin ku tuma remedi pa hopi luna i tambe hasi uso di aparato spesial di rayo ultravioleta. Den algun kaso e tratamentu aki a yuda e partinan afektá di e kueru haña nan koló normal bèk. Otro pashèntnan ta skohe un tratamentu pa eliminá pigmènt. Meta di e tratamentu aki ta pa, ku uso di remedi, hasi henter e kueru bira blanku dor di destruí e sobrá sèlnan ku ta produsí pigmènt. Dor di esei, ta eliminá e kontrastenan.

Vitiligo por kousa angustia emoshonal pa hende ku ta sufri di dje, foral ora e plama riba kara. Sibongile ta bisa: “Resientemente ora dos mucha a wak mi, nan a kuminsá grita i kore limpi bai. Otronan tin miedu di papia ku mi, pensando ku mi por tin un enfermedat kontagioso òf ku mi a ser maldishoná. Si tin un kos ku mi por yuda otro hende komprondé ta, ku nan no tin nodi tene miedu di hende ku tin e problema aki. Nan no por haña vitiligo dor di kontakto físiko ni via aire.”

Komo Testigu di Yehova, Sibongile ta gusta siña otro hende Beibel, i e no ta laga su problema deskurash’é. Esaki ta enserá bishitá hende na nan kas i papia kara-kara ku nan. E ta bisa: “Mi a konformá mi ku mi aparensia. Awor mi ta sinti mi mas trankil, i mi ta anhelá e tempu ora mi haña mi koló natural bèk den e Paradeis riba tera ku Yehova Dios a primintí.”—Revelashon 21:3-5.

[Plachi na página 20]

Na 1967, promé ku e problema a presentá