Kleuterschool sin Ko’i Hunga

DI UN ESKRITOR DI SPIÈRTA! NA ALEMANIA

Un mainta ora e muchanan a yega nan kleuterschool, nan no a haña nada den nan klas ku eksepshon di e muebelnan. Nan a buska e pòpchinan, e weganan i e peluchenan, pero nan no por a haña nan. No tabatin ningun buki ni blòki di hunga tampoko. Asta papel ku skèr a disparsé. A saka tur ko’i hunga for di e klasnan i despues di tres luna lo a trese nan bèk. Kon bin?

E kleuterschool aki ta un tipo di skol ku ta birando mas i mas popular na Alemania, Oustria i Suisa. Nan ta partisipando den un proyekto remarkabel i inovativo ku yama Kleuterschool sin Ko’i Hunga. Pa straño ku e por zona, e proyekto aki su meta ta pa prevení adikshon. Ekspertonan di salú di Union Europeo a aploudí e proyekto aki masha hopi. Den último añanan investigadónan a bin realisá ku hende ta ménos vulnerabel pa kualke tipo di adikshon si for di trempan den bida nan desaroyá abilidatnan sosial. Segun un informe den korant, e abilidatnan ei ta enserá, “abilidat di komuniká i di buska kontakto ku otro hende fásilmente, di hèndel konflikto, di aseptá responsabilidat pa bo akshonnan, di pone metanan pa bo mes, di rekonosé problema, di buska yudansa i di haña un solushon.” Segun esnan ku ta boga pa e programa aki, mester desaroyá e abilidatnan ei mas trempan posibel, i e periodonan sin ko’i hunga ta apropiá pa e propósito aki, dor ku nan ta promové kreatividat i konfiansa propio.

E kleuterschool kuidadosamente a plania e tres lunanan sin ko’i hunga i a papia di e asuntu ku tantu e mayornan komo e muchanan. Na prinsipio, algun mucha no tabata sa kiko pa hasi sin ko’i hunga. E informe a bisa ku “tin skol kaminda e muchanan ta bira loko durante e promé kuater simannan,” i e kleuterleidsternan ta keda man na kabes. Pero e muchanan ta siña adaptá i ta siña bira kreativo. Komo ku e muchanan no tin kos pa hunga kuné, nan ta konsultá ku otro, plania i hunga mas tantu huntu, i asina nan ta mehorá nan abilidatnan sosial i di idioma. Muchanan ku tabatin kustumber di “skonde” tras di nan ko’i hunga awor ta sera amistat. Mayornan tambe a nota kambionan positivo. Segun nan, e muchanan ta komportá nan mes mas mihó ora di hunga i nan a bira mas kreativo ku promé.