E Punto di Bista Bíbliko

Kon Nos Tin Ku Trata Hende di Edat?

DEN e zomer di 2003, míles di hende rònt Europa a muri debí na un di e pió olanan di kalor den 60 aña ku a asotá e kontinente. Mayoria di e mortonan tabata hende di edat. Algun di nan a keda nan so atras dor ku nan famianan a bai ku fakansi. Segun informenan, otronan a ser deskuidá òf neglishá dor di hospital i personal di kasnan di kuido ku tabatin nan mannan yen e dianan ei. E korant Le Parisien a informá ku na Paris so, tabatin 450 kadaver ku ningun famia no a bin reklamá. “Ta den ki tipo di situashon nos ta bibando ku nos ta lubidá riba nos mama ku tata i nos welanan?” e korant a puntra relashoná ku situashon di e personanan ku a muri nan so sin ku ningun hende tabata sa mes ta ken nan ta.

Den un mundu kaminda e poblashon di 65 aña bai ariba ta kresiendo ku un rapides nunka bisto di 795.000 persona pa luna, kuido di hende grandi a bira un di e mayor preokupashonnan djawe. Nancy Gordon, direktor athunto di programanan demográfiko di e Departamentu di Senso Merikano, a bisa: “E proporshon di hende grandi na tur parti di mundu ta oumentando na un ritmo nunka bisto i nos lo tin ku paga masha tinu na kon paisnan ta reakshoná n’e retonan i oportunidatnan di bira hende grandi.”

Nos Kreadó tambe tin interes den hende di edat. De echo, su Palabra, Beibel, ta duna nos guia riba kon nos mester trata nan.

Respetá Hende di Edat

E Lei di Dios, duná na Moisés, a animá e pueblo pa respetá hende di edat. E Lei a deklará: “Lanta para pa esun ku tin kabei blanku, onra e ansiano.” (Levítiko 19:32) Adoradónan obediente di Dios mester a “lanta para” pa hende di edat (1) komo un señal di rèspèt pa un persona mas grandi i (2) komo muestra di e temor respetuoso ku adoradónan di Dios mester tin p’e. Pues, mester a onra hende di edat i mira nan komo personanan útil i di gran balor.—Proverbionan 16:31; 23:22.

Ounke awe kristiannan no ta bou di e Lei di Moisés, su prinsipionan ta revelá e pensamentu- i prioridatnan di Yehova, i no ta laga duda ku hende di edat tin gran balor den su bista. Miembronan di e kongregashon kristian di promé siglo a komprondé e prinsipionan aki. E promé evidensia di esei nos ta haña den e buki bíbliko di Echonan. Entre e kristiannan na Yerusalèm di e tempu ei tabatin algun biuda den nesesidat. Kasi sigur vários di nan tabata hende di edat. E apòstelnan a nombra shete “hòmber di bon reputashon” pa hasi sigur ku e muhénan aki a risibí suministro diario di kuminda na un manera ordená. E apòstelnan a konsiderá e kuido spesial ei komo un “tarea” di e kongregashon.—Echonan 6:1-7.

Apòstel Pablo a apliká e prinsipio di ‘lanta para pa kabei blanku’ na e kongregashon kristian. El a bisa e superintendente kristian mas hóben, Timoteo: “No reprendé un hòmber bieu na manera brutu, ma mas bien spièrt’é manera ta spièrta un tata. Trata . . . e muhénan mas bieu manera mama.” (1 Timoteo 5:1, 2) Ounke e hóben Timoteo tabatin sierto outoridat riba kristiannan di edat, apòstel Pablo a bis’é pa no  menospresiá un hòmber di edat. Mas bien, e mester a respet’é manera un tata. I e mester a mustra e mesun onor aki na muhénan di edat den e kongregashon. Bon mirá, apòstel Pablo a spièrta Timoteo—lokual ta apliká na tur miembro di e kongregashon kristian tambe—pa ‘lanta para pa kabei blanku.’

Naturalmente, hende deboto na Dios no tin mester di un sèt di lei pa trata hende di edat ku dignidat i rèspèt. Konsiderá e ehèmpel bíbliko di Hosé. Ningun esfuerso pa trese su tata di edat Egipto tabata di mas p’e, i dor di esei el a salba Jakòb di 130 aña di un hamber ekstenso. Ora Hosé a mira su tata pa promé bes den mas ku dos dékada, “el a kai den su brasa i a yora . . . pa un bon ratu.” (Génesis 46:29) Ku su akshon Hosé a reflehá e punto di bista di Dios hopi tempu promé ku e asuntu di trata hende di edat ku kompashon i rèspèt profundo a bira lei p’e israelitanan.

Durante Hesus su ministerio, e tambe a mustra interes den hende di edat. Enérgikamente el a kondená e lidernan religioso ku a neglishá nan mayornan di edat, hustifikando esei ku nan tradishonnan religioso. (Mateo 15:3-9) Hesus, komo muestra di su amor, a perkurá pa su mes mama tambe. Den tur e doló agonisante ku e tabata sufriendo riba e staka di tormento, el a hasi sigur ku Juan, su apòstel stimá, lo a kuida su mama di edat.—Juan 19:26, 27.

Dios No Ta Bandoná Hende Ku Ta Leal na Dje

E salmista a pidi den orashon: “No benta mi afó den tempu di behes; no bandoná mi ora mi forsa ta faya.” (Salmo 71:9) Dios no ta “benta” su sirbidónan fiel “afó” ni ora nan mes haña ku nan no ta útil mas. E salmista no a sinti ku Yehova a bandon’é; mas bien el a rekonosé ku e mes tabatin ku dependé riba su Kreadó mas ku nunka segun ku e tabata birando bieu. Yehova ta rekompensá e lealtat ei dor di sostené nos den henter nos bida. (Salmo 18:25, NW) Hopi bes e sosten ei ta bini mediante nos rumannan kristian.

En bista di loke nos a konsiderá, nos a mira bon kla ku tur hende ku ke onra Dios mester onra hende di edat tambe. En bèrdat, hende grandi ta presioso den bista di nos Kreadó. Komo kriaturanan trahá den Dios su imágen, laga nos semper manifestá su punto di bista di “kabei blanku.”—Salmo 71:18.

[Plachi na página 25]

Kristiannan ta trata hende di edat ku onor i rèspèt