Kon pa Enfrentá e Problemanan Komo un Mama Tiner

EMBARASO hubenil ta trese kuné e karga di tin ku tuma desishonnan di hende adulto. Un mama tiner a bisa: “Mi ta sinti komo si fuera mi tin 40 aña. Mi a pèrdè henter mi hubentut.” Sí, despues ku un hobensita haña sa ku e ta na estado, lo e por sintié kompletamente aplastá pa miedu i preokupashon.

Si bo ta un tiner na estado, kisas bo mes tambe ta sinti bo asina. Sin embargo, bo no ta logra nada dor di laga emoshonnan negativo paralisá bo. Beibel ta bisa: “Esun ku opservá bientu no ta sembra, i esun ku opservá e nubianan no ta kosechá.” (Eklesiastés 7:8; 11:4) Un kunukero ku ta stòp di traha pasobra e ta preokupá pa motibu di e wer, lo no tuma e akshonnan nesesario. Pues, no laga e situashon paralisá bo. Tardi òf trempan bo tin ku sigui ku bo bida i karga bo propio karga di responsabilidat.—Galationan 6:5.

Ki opshonnan bo tin? Podisé tin hende ta bisa bo pa pensa riba aborto. Pero esaki no ta un opshon pa hende ku ke hasi loke ta agradá Dios, ya ku Beibel ta mustra bon kla ku aborto ta kontra e lei di Dios. (Eksodo 20:13; 21:22, 23, NW; Salmo 139:14-16) Den bista di Dios, bida di kualke èmbrio òf supstansia sin forma ta presioso, inkluso di unu konsebí pafó di matrimonio.

Kiko di kasa ku tata di e beibi i kria boso yu huntu? Kisas bo ta pensa ku kasamentu por lo ménos lo skapa bo di poko bèrgwensa. Pero asta ora un tata hóben ta sinti un responsabilidat moral pa yuda ku kriansa di su yu, kasamentu no ta semper un opshon sabí. * E echo ku un mucha hòmber por prokreá, no nesesariamente ke men ku e tin e kapasidat emoshonal i mental pa ta un bon kasá i tata. Tampoko esei ke men ku finansieramente e por mantené un esposa i un yu. Ademas, si bo kasa ku un mucha hòmber ku no tin e mesun kreensianan religioso ku bo, bo ta bai kontra di e konseho bíbliko pa kasa “basta ta den Señor.” (1 Korintionan 7:39) Eksperensia ta mustra ku kore kasa promé ku tempu—i kisas pa korto tempu—por resultá solamente den mas doló i sufrimentu.

Kiko di laga un otro hende adoptá e beibi? Ounke esaki di mes ta mas mihó ku aborto, bo mester tene kuenta ku e echo ku apesar di bo sirkunstansia difísil, bo tin e oportunidat di kuida i kria bo yu.

Kon pa Enfrentá e Problemanan

Ta bèrdat ku no ta fásil pa kria un yu sin un kasá. Sin embargo, dor di sigui prinsipionan bíbliko lo mihó ku bo por i dor di konfia den Dios pa duna bo forsa i guia, bo por enfrentá e tantísimo problemanan ku éksito. At’akí algun paso ku bo por tuma pa yuda bo trata ku e situashon.

● Drecha bo relashon ku Dios. Bo tin ku realisá ku relashon seksual sin ta kasá ta un piká kontra Dios, un falta kontra su normanan moral haltu. (Galationan 5:19-21; 1 Tesalonisensenan 4:3, 4) Pues, un promé paso hopi importante ta di arepentí i pidi Dios pordon. (Salmo 32:5; 1 Juan 2:1, 2) Kisas bèrdat bo ta sinti ku bo no ta digno di su yudansa. Sin embargo, Yehova ta primintí ku e ta pordoná, i e ta yuda esnan ku arepentí di nan pikánan. (Isaias 55:6, 7) Na Isaias 1:18, Yehova ta bisa: “Maske boso pikánan ta manera skarlata [pisá, serio], nan  lo bira blanku manera sneu [limpi-limpi].” Tambe Beibel ta animá hende ku a hasi malu pa probechá di e yudansa spiritual ku e ansianonan nombrá den kongregashon ta ofresé.—Santiago 5:14, 15.

● Stòp di tene relashon seksual sin ta kasá. Esei probablemente ta nifiká ku bo tin ku kibra bo amistat ku e tata di bo yu. Siguiendo ku e amistat ei sin ta kasá kuné solamente lo pone preshon riba bo pa sigui hasi kosnan ku ta desagradá Dios. No lubidá nunka ku e leinan di Dios, maske nan ta estrikto, t’ei pa protehá nos. Nicole, sitá anteriormente den e seri aki, ta kòrda: “Mi a bin realisá ku Dios tin rason. E ke pa nos saka benefisio.”—Isaias 48:17, 18.

● Bisa bo mayornan. Podisé ku tur rason bo tin miedu ku bo mayornan lo rabia ku bo. Ta bèrdat ku nan lo ta malkontentu i preokupá ora nan haña sa ku bo ta na estado. Kisas nan por asta sinti ku nan a laga bo na kaya komo mayor i kulpa nan mes pa bo mal komportashon. Sin embargo, si bo mayornan realmente ta teme Dios, probablemente ku tempu e pena i doló fuerte ku nan ta sinti ta pasa. Ta bo mayornan nan ta, i apesar di bo erornan, nan stima bo. Ora nan mira na bo aktitut ku bo a repentí, sin duda nan lo sinti nan konmoví pa imitá e tata den Hesus su ilustrashon di e yu pèrdí, i pordoná bo amorosamente.—Lukas 15:11-32.

● Demostrá gratitut. Mayornan, famia i amigunan hopi bes ta resultá di ta un bon fuente di yudansa i sosten. Por ehèmpel, bo mayornan kisas ta hasi areglo pa bo haña kuido  médiko. Despues ku bo beibi nase, kisas nan ta yuda bo siña e kosnan básiko di kuido di yu; tambe nan por ofresé pa wak e yu pa bo. Nicole a bisa di su mama: “Ami a haña e beibi, pero mi mama a yuda mi masha hopi mes.” Amigunan tambe kisas ta yuda, podisé dor di perkurá diskretamente pa bo haña paña di yu i otro artíkulonan ku lo por ta útil. (Proverbionan 17:17) Ora hende mustra bondat na bo, sigui e konseho di Beibel i mustra ku bo ta “gradisidu.” (Kolosensenan 3:15) Palabranan di apresio por evitá ku e personanan ei ta sinti ku bo no a duna masha balor na nan aktonan amoroso.

● Siña desempeñá e papel di mama. Klaru ku lo bo no ke dependé riba bo famia i amigunan pa semper. Pues kuminsá kultivá e abilidatnan ku lo yuda bo te na sierto grado pa bira kompetente den kuida bo yu i sòru pa un famia. No ta fásil pa siña perkurá pa un ser humano ku tin mester di hopi kuido i atenshon. Tin hopi kos ku bo tin ku siña tokante nutrishon, salú i otro aspektonan di kuido di yu. Un punto interesante ta ku Beibel ta enkurashá muhénan kristian mas grandi pa animá muhénan mas hóben pa nan ta “bon ama di kas.” (Tito 2:5) Kasi sigur bo mama—i kisas otro miembronan mas grandi di e kongregashon kristian—por duna bo algun entrenamentu balioso den e aspekto aki.

● Manehá plaka na un manera sabí. Beibel ta bisa ku “plaka ta protekshon.” (Eklesiastés 7:12) Nasementu di un beibi lo resultá den bastante gastu.

Kisas na prinsipio lo bo ke hasi uso di kualke yudansa públiko ku bo ta bin na remarke p’e. Sin embargo, hopi bes un mucha muhé tòg tin ku dependé finansieramente riba su mayornan. Si den bo kaso ta asina, lo ta sabí i un muestra di konsiderashon di bo parti pa baha gastu mas tantu posibel. Ounke sin duda lo bo tin gana di kumpra kos nobo pa bo beibi, kisas bo por spar plaka dor di kumpra kosnan segunda mano.

● Purba haña un edukashon. Proverbionan 10:14 ta bisa: “E hende sabí ta montoná sabiduria.” Ounke esaki ta sierto spesialmente di konosementu bíbliko, e ta sierto tambe di edukashon eskolar. Bo tin ku desaroyá e abilidatnan nesesario pa gana bo pan.

Ta bèrdat ku ta difísil pa bai skol i a la bes kuida un beibi. Sin embargo, un falta di edukashon básiko lo por obligá abo i bo yu na  hiba un bida di pobresa, di biba di ònderstant, di tin poko entrada, kas inadekuá òf sufri di malnutrishon. P’esei hasi tur loke ta posibel pa bo sigui bai skol. E mama di Nicole a insistí pa e kaba skol, i komo resultado, despues Nicole por a sigui un kurso pa mantené su mes komo un asistènt di abogado.

Pakiko bo no ta investigá kua ta e oportunidatnan di edukashon ku tin disponibel? Si ta muchu difísil pa bo bai sinta den klas, kisas bo por wak si bo por siña na kas. Por ehèmpel, kursonan via korespondensia por resultá práktiko pa bo situashon.

Bo Por Tin Éksito

Kria un yu sin ta kasá ta difísil pa un mucha muhé. Pero bo por tin éksito! Ku pasenshi, determinashon i e yudansa di Yehova Dios, bo por bira un mayor amoroso, kapas i kompetente. I yunan di mamanan soltero por krese bira adultonan emoshonalmente stabil. Podisé lo bo por tin asta e goso di mira bo yu reakshoná positivo riba e formashon i entrenamentu ku bo ta dun’é, anto bira un persona ku ta stima Yehova.—Efesionan 6:4.

Nicole a ekspres’é asin’aki: “Ku Dios su yudansa—i ounke lo por a parse improbabel—mi tabatin e goso di yuda mi yuchi bira un dams bondadoso, respetuoso i responsabel. Ora mi wak e, mi ta kòrda riba tur e anochinan ku mi a pasa sin drumi, pero tambe mi kurason ta yena ku felisidat.”

Pero kon hende grandi mester trata mamanan tiner i nan yunan? Tin un manera pa yuda hóbennan pa asina nan no tin nodi pasa den e doló di embaraso hubenil?

[Nota]

[Plachinan na página 8, 9]

Mamanan tiner ta konfrontá hopi problema pa kria nan yu

[Plachi na página 10]

Kore kasa promé ku tempu no ta e solushon

[Plachi na página 10]

Ansianonan kristian por yuda hóbennan ku a faya pa nan drecha nan relashon ku Dios

[Plachi na página 11]

Ta sabí pa mamanan soltero kaba nan edukashon básiko