Mamanan Muchu Yòn

“Mi frei tabata un nèchi gai. E tabatin sèn, i nos tabata sali i pasa prèt. Ora mi no a haña mi regla, mi a komprondé ku un kos no tabata bon. Mi no tabata sa kon pa bisa mi mama. Kon e kos aki por a pasa ku mi? Mi tabatin 16 aña so, i mi no tabata sa kiko pa hasi.”—Nicole.

AWE Nicole * tin trint’i piku aña i ta mama di tres yu. E ta un mama aktivo ku konfiansa propio. Su yu mayó tin 20 aña. Sí, añanan pasá Nicole tabata un di e miónes di tinernan soltero na estado. Meskos ku otro mamanan tiner, el a sinti su mes konfundí i a pensa ku e no por a trata ku e situashon konfuso i e problemanan pisá, desishonnan difísil i perspektiva insigur ku el a konfrontá.

Masha poko biaha Nicole sa papia tokante e shòk, e nengamentu di realidat, e miedu, e rabia i e desesperashon ku a karakterisá su último añanan komo tiner; un periodo ku muchanan di su edat tabata preokupá tokante paña i ki punto nan lo haña riba nan rapòrt. No opstante, Nicole su situashon no tabata sin speransa. El a bin di un famia amoroso ku a purba inkulká prinsipionan moral haltu den dje. Ounke pa un tempu el a preferá di no hasi kaso di e prinsipionan ei—i a sufri e konsekuensia—mas despues, e mesun prinsipionan moral ei a yud’é hiba un bida produktivo i ku propósito. Su lema a bira: “Tur speransa no a kaba.”

Desafortunadamente, no ta tur mama tiner tin un famia ku ta apoy’é, òf un punto di bista positivo manera Nicole. Hopi mama tiner ta haña nan mes masha lihé den un situashon di pobresa aparentemente sin salida. Debí ku algun di nan tabata víktima di violashon òf di violensia, nan tin ku trata ku doló emoshonal.

Ademas, e problemanan ku mamanan tiner ta konfrontá por tin un efekto negativo riba nan yunan. Segun e buki Teen Moms—The Pain and the Promise (Mamanan Tiner—E Doló i e Promesa), beibi di mamanan tiner “sa nase bou di peso, sa haña mas malu di mucha, mas kaso di morto infantil, kuido médiko di ménos kalidat, sa sufri mas hamber i malnutrishon; nan ta konfrontá mas violensia i ta desaroyá ménos lihé ku yunan ku nase di mamanan mas grandi.” De echo, kompará ku yunan ku nase di mamanan mas grandi, yunan muhé di mamanan tiner tin mas chèns di bira mama tiner.

Embaraso hubenil ta algu komun? Kon mamanan tiner por tin éksito den enfrentá e problemanan di kria nan beibi? Tin manera pa yuda hóbennan pa asina nan no tin nodi kai mes den tantu angustia? E siguiente artíkulonan lo analisá e preguntanan aki.

[Nota]