Opservando Mundu

Sushi Komo Kuminda

“Ta asombroso pa mira kon importante sushi a bira komo fuente di kuminda pa hopi para i mamífero,” segun e biólogo Wilfried Meyer. “Na algun lugá a para bira ku ta sushi ta garantisá sobrebibensia di algun espesie.” Manera e revista di notisia Der Spiegel a informá, un proyekto di investigashon mundial a mustra ku kasi 70 espesie di para i 50 espesie di mamífero ta kome sushi. Na lèntfel a desaroyá henter un kadena di kuminda. Insektonan ta multipliká debí na e kalor ku e sushi den estado di deskomposishon ta produsí. Paranan i mamíferonan chikitu ta kome e insektonan aki i despues nan mes ta bira víktima di para yagdó i otro roofdier. Ta interesante pa nota ku algun para ku di naturalesa ta tímido no ta wòri ku zonidu duru di mashin ku ta komprimí sushi, ni e presensia di otro bestia i hende kaminda nan ta dùmp sushi.

 Bandidunan Grandi di Karetera

Ta parse ku no ta hende so ta ladron di karetera. Segun Bangkok Post, olefantenan tambe a djòin e filanan. Olefantenan golos di e selvanan ost di Bangkok ta blòkia e kayanan ku trùknan di kaña ta usa i hòrta nan kargamentu sukulento. Normalmente, tin mas o ménos 130 olefante ta biba den e reservaat di Ang Lue Nai, pero sekura a kaba ku e vegetashon disponibel pa nan, i esei a obligá e olefantenan golos pa sali for di selva en buska di kuminda. E supervisor prinsipal di e reservaat, Yoo Senatham, a informá ku algun olefante a kuminsá invadí plantashonnan, miéntras ku otronan ta rekohé kaña ku shofùrnan di trùk di bon kurason ta laga kai pa nan.

Antibiótika pa Bestia

Pa hopi tempu, e Organisashon Mundial di Salú (OMS) a spièrta kontra uso eksesivo i innesesario di antibiótika pa bestia di krio ku no ta sufri di ningun enfermedat. Segun e korant spañó ABC, riba un base regular nan ta bruha antibiótika den kuminda di bestia “pa gòrda bestia di krio lihé.” Resientemente, un estudio danes a mustra ku sin yudansa di antibiótika mes, krio di animal por ta rendabel. Ora e kriadónan a eliminá antibiótika for di kuminda di bestia, e produkshon di galiña a keda intakto i e kosto di produkshon di porko a oumentá ku solamente ún porshento. OMS a aploudí e inisiativa danes i ta animando otro paisnan pa nan tambe tuma e medida ei. Segun e korant, “si nan hasié, lo e ta benefisioso pa salú públiko tambe.”

Hungadónan di Ahedres Chatiger

“Hopi hungadó di ahedres no ta tuma e reglanan tur ora muchu na serio,” segun Frankfurter Allgemeine Zeitung. Un ehèmpel ta di un hungadó amatùr ku a gana un gran maestro. Pero despues nan a haña sa ku bou di su kabei largu e tabatin un mikrofon, un headphone i un kámara pa e por a komuniká ku un hungadó di ahedres sintá na un kòmpiuter den un otro sala. Ta konosí ku otronan ta bai tualèt, sera porta i saka un mini-kòmpiuter pa kalkulá nan siguiente zètnan. Hungamentu ‘online’ tambe sa tin masha triki kuné. Algun chatiger, tanten ku nan ta hunga online, tin un programa di ahedres habrí riba nan kòmpiuter. Den otro kasonan e hungadó ta partisipá bou di dos nòmber i hunga kontra su mes; dor ku semper un nòmber ta pèrdè, e otro ta klasifiká mas haltu. E korant ta bisa: “Pa hopi hende no ta kuestion di gana un premio. . . . Mayoria biaha, e motivashon no ta golosidat, sino djis pa e kick.”

Nunka Muchu Bieu pa Siña!

E korant Daily Nation di Nairobi a deklará: “Ora e muchanan di seis aña ta tuma lès na [un skol básiko na Rift Valley Province di Kenia], un di e alumnonan a ‘keda manera mi so den boso.’” Ta trata di un hòmber di 84 aña ku resientemente a djòin e muchanan di eerste klas pa “e por siña lesa Beibel.” Ounke e tin nietu den klasnan mas haltu kuné, tòg e ta bai su lèsnan. E hòmber a bisa e korant: “E hendenan ta bisa mi sierto kosnan di Beibel ku ami no sa si nan ta bèrdat òf laga. P’esei mi mes ke lesa e Buki Sagrado ei pa haña sa kiko ta kiko.” Kompletu ku su unifòrm i otro kosnan di skol, e ta hasi su bèst pa adaptá su mes n’e reglanan estrikto di skol. Tin otro kos sí ku nan ta hasi un eksepshon p’e. Por ehèmpel, ora e otro alumnonan ta hasi gimnastik i kore rònt, e “tin mag di strèch su múskulonan suavemente.”

Temblornan Mortal den 2003

Segun un komunikado di prensa, “e Departamentu Geológiko Merikano ta bisa ku 2003 tabata e aña mas mortal pa loke ta temblor for di 1990, 25 biaha mas fatal ku aña 2002. Na 2002, 1711 hende a muri den temblornan rònt mundu,” miéntras ku aña pasá 43.819 hende a pèrdè nan bida. Rònt di 41.000 di e mortonan ei a tuma lugá na Iran ora un temblor ku magnitut di 6,6 a asotá e stat di Bam dia 26 di desèmber. E temblor mas fuerte, i e úniko ku por ser kualifiká komo un temblor “grandi,” tabata esun ku a tuma lugá na Hokkaido, Hapon, dia 25 di sèptèmber. E tabatin un magnitut di 8,3. Segun e informe, “e Departamentu Geológiko Merikano ta lokalisá rònt di 50 temblor pa dia. . . . Komo promedio, tin 18 temblor prinsipal (magnitut di 7,0 pa 7,9) i un temblor grandi (8,0 òf mas haltu) pa aña rònt mundu. Tur aña tin miónes i miónes di temblor rònt mundu, pero hopi no ta ser detektá pasobra nan ta tuma lugá den áreanan remoto òf nan tin un magnitut masha chikitu.”

Pakiko Tin Tantu Delinkuensia Hubenil?

Spesialistanan ta kere ku problema di famia ta e kousa di e oumento rápido den e kantidat di mucha kriminal. Manera un informe den e korant Surafrikano Weekend Witness a señalá, mayoria di e muchanan aki ta bini di famianan kibrá òf famianan kaminda ámbos mayor ta traha i ta “muchu drùk, kansá òf na kareda” pa atendé ku nan. Segun e kriminólogo Dr. Irma Labuschagne, hopi teenager no ta ni komprondé e konsepto di “famia” i “tin masha deseo di haña amor i aseptashon.” P’esei nan ta buska e kosnan aki otro kaminda i ta bira víktima fásil di gèngnan kriminal ku ta duna nan e sintimentu ku nan ta wòrdu aseptá dor di e grupo. E sikólogo Dr. Cecelia Jansen a remarká ku mayornan “ta asina okupá den nan mes búskeda pa un mihó nivel di bida, éksito i materialismo ku nan no sa kiko ta pasando den bida di e miembronan di nan famia.” E korant ta bisa ku tantu Labuschagne komo Jansen ta rekomendá pa “bai bèk na e balornan di famia di ántes.” E ta konkluí: “No tin nada mas mihó ku un bida di famia salú, felis i normal.”