Origami—E Arte di Dobla Papel
Origami—E Arte di Dobla Papel
DI UN ESKRITOR DI SPIÈRTA! NA HAPON
I MAGINÁ un solo blachi di papel transformá den un bunita figura tridimenshonal di un para, un kraanvogel. Su alanan ta di span yen di pikete, i for di e kurpa elegante di e para ta sali un garganta largu i delegá, koroná pa un kabes elegante i un pik úniko. Sorprendentemente, e para aki ta ser kreá dor di dobla un pida papel firkant segun un proseso eksakto di 12 stap.
E trahamentu di un variedat asombroso di forma dor di dobla i habri un pida blachi di papel ta un tipo di arte hapones ku yama origami. E palabra mes ta nifiká “papel doblá.” Ounke hende no sa presis kon el a originá, nan a saka afó ku na Hapon origami tabata ser usá for di hopi tempu pasá, tempu ku nan tabata dobla dokumentonan ofisial na un manera masha elaborá. Historiadónan ta kere ku durante e periodo
Edo (1603-1867), origami a desaroyá komo un tipo di aktividat pa pasa tempu ku tur hende por a partisipá aden. Ta durante e tempu ei nan a desaroyá téknikanan nobo di dobla papel. E arte aki a pasa di un generashon pa otro segun ku mayornan tabata siña nan yunan i nietunan. Hopi hapones ku plaser ta kòrda kon na mucha nan tabata para wak boka habrí ora nan mama ábilmente tabata dobla papel i krea ophetonan masha bunita pa nan.A base di e formanan ku ta ser kreá, tin básikamente dos kategoria di origami. Unu yama origami tradishonal, ku ta enserá trahamentu di para, sapu, boto, balòn, insekto i mata di papel. E otro yama origami kreativo, ku no ta sigui e téknikanan tradishonal ku hende a usa pa siglonan. Ku e tipo di origami aki nan ta traha dinosouro grandi, insekto elaborá i otro diseñonan masha kompliká.
Den tempu moderno hopi kampo profeshonal, manera arkitektura, a apliká e prinsipionan di origami den e diseño di un variedat grandi di produktonan útil. Personal di kuido médiko tambe a usa origami komo un training efektivo di rehabilitashon pa hende di edat i esnan desabilitá.
Kon pa Traha Bo Propio Origami
Kon bo por traha origami? Origami tradishonal no ta difísil pa traha. Bo no tin mester di ningun hèrmènt ni entrenamentu spesial, simplemente bo mester presta bon atenshon i opservá. Klaru ku loke sí bo tin mester ta papel apropiá i e reglanan di doblamentu. Ken ku dobla e papel kuidadosamente i ku pasenshi, por transform’é den un forma atraktivo.
Bo por usa kualke papel ku bo tin na man, asta papel di korant, papel di propaganda òf papel di regalo. Abo ta skohe e tamaño, kalidat i koló di e papel a base di loke bo ke traha. Pero si bo ke traha algu ègt bunita, lo bo skohe e koló di papel kuidadosamente. Kon bunita bo obra lo keda ta dependé no solamente di e manera ku bo ta dobla e papel sino tambe di e tipo di papel ku bo usa. Lo ta bon pa usa papel trahá spesífikamente pa origami. Podisé bo ke usa asta washi, un tipo di papel hapones trahá na man. *
Pa mayoria forma ta masha importante pa e papel ta un firkant perfekto. Bo por chèk si e papel ta firkant dor di pone e hukinan opuesto riba otro i dobla e papel den forma di un triángulo. Si tur e rantnan ta pas presis riba otro, anto e papel ta bon kòrtá.
Pa logra un bunita resultado final, bo tin ku dobla e papel di tal manera ku huki ku huki i tambe rant ku rant ta pas presis riba otro. Ademas, e doblá mester keda steif. Ora bo ta dobla e papel na mitar pa forma un triángulo, tene e dos hukinan diagonal firmemente huntu i presis entre bo dùim i wijsvinger, kaba dobla e parti abou ku bo otro man. Ora bo ta dobla e papel na mitar pa forma un rektángulo, hasi sigur ku ámbos huki ta pas presis riba otro, kaba tene e rantnan firmemente huntu miéntras bo ta dobla e parti abou.
Ora di traha sierto forma di origami ta nesesario pa bo dobla e papel, kaba habrié bèk, produsiendo asina un marka di doblá komo preparashon pa e siguiente stap. Tin biaha tin ku lora e papel, ploi e, primié, push’é aden, supl’é pa habri òf bòltu e; tur esei pa por dun’é un forma pa logra un sierto efekto.
Bo por traha origami na unda ku bo ta i ki ora ku ta. Despues ku bo siña e arte aki, básikamente tur loke bo tin mester ta papel. Dor di djis usa bo dedenan, bo por traha un variedat di forma tradishonal òf asta krea formanan nobo ku bo mes ta inventá. Probablemente lo bo sinti bo frustrá de bes en kuando si bo ta purba siña traha origami di un seri di diagram pintá. Pero si pa kasualidat bo topa un persona ku konosé origami, probechá di e oportunidat pa siña e arte aki di dobla papel.
[Nota]
^ par. 9 Wak e artíkulo “Washi: Antiguo Artesania di Papel Hapones,” publiká den e edishon di Spièrta! na spañó di 8 di yanüari 1992.